Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Jeremias 52:1-34

52  Duapulo ket maysa ti tawen ni Zedekias+ idi nangrugi nga agturay,+ ket iti sangapulo ket maysa a tawen nagturay idiay Jerusalem.+ Ket ti nagan ti inana Hamutal+ nga anak ni Jeremias ti Libna.+  Ket intuloyna nga aramiden no ania ti dakes kadagiti mata ni Jehova,+ maitunos iti amin nga inaramid ni Jehoiaquim.+  Ta maigapu iti unget ni Jehova napasamak dayta idiay Jerusalem ken Juda, agingga a napagtalawna ida iti sanguananna.+ Ket ni Zedekias nagrebelde iti ari ti Babilonia.+  Kamaudiananna naaramid iti maikasiam a tawen ti panagarina,+ iti maikasangapulo a bulan, iti maikasangapulo nga aldaw ti bulan, a dimteng ni Nabucodorosor nga ari ti Babilonia, isu ken ti intero a puersa militarna, a bumusor iti Jerusalem,+ ket nangrugida nga agpakarso maibusor kenkuana ken mangibangon maibusor kenkuana iti pader a panglakub iti intero nga aglikmut.+  Iti kasta ti siudad naadda iti pannakalakub agingga iti maikasangapulo ket maysa a tawen ni Ari Zedekias.+  Iti maikapat a bulan, iti maikasiam nga aldaw ti bulan,+ ti met bisin kimmaro iti siudad ket awan idi ti tinapay a maipaay kadagiti umili ti daga.+  Kamaudiananna naserrek ti siudad;+ ket no maipapan iti amin a lallaki ti gubat, nangrugida nga agtaray+ ken rummuar manipud iti siudad iti rabii a dimmalanda iti ruangan iti baet ti dua a pader nga adda iti denna ti minuyongan ti ari,+ bayat nga adda dagiti Caldeo iti intero nga aglikmut a bumusor iti siudad; ket nagtultuloyda a napan a dumalan iti Araba.+  Ket ti maysa a puersa militar dagiti Caldeo kinamatna ti ari,+ ket nakamakamda ni Zedekias+ iti desierto a tantanap ti Jerico; ket naiwarawara manipud iti dasigna ti intero a bukodna a puersa militar.+  Kalpasanna kinemmegda ti ari ket impanda iti ari ti Babilonia+ idiay Ribla+ iti daga ti Hamat,+ tapno makaisawang kenkuana kadagiti hudisial a pangngeddeng.+ 10  Ket ti ari ti Babilonia ginudasna ti annak ni Zedekias iti imatangna,+ ken kasta met ginudasna amin dagiti prinsipe ti Juda idiay Ribla.+ 11  Ket binulsekna dagiti mata ni Zedekias,+ a kalpasan dayta isu pinarautan ti ari ti Babilonia kadagiti gambang a grilios ket impanna idiay Babilonia+ ket inkabilna iti balay a pakaipupokan agingga iti aldaw ti ipapatayna. 12  Ket iti maikalima a bulan, iti maikasangapulo nga aldaw ti bulan, awan sabali, iti maikasangapulo ket siam a tawen ni Ari Nabucodorosor,+ ti ari ti Babilonia, ni Nabuzaradan+ a panguluen ti para-guardia, nga agtaktakder iti sanguanan ti ari ti Babilonia, immay idiay Jerusalem. 13  Ket pinuoranna ti balay ni Jehova+ ken ti balay ti ari ken amin a balbalay ti Jerusalem;+ ket tunggal dakkel a balay pinuoranna iti apuy.+ 14  Ket amin dagiti pader ti Jerusalem, iti aglikmut, rinugpo dagiti amin a puersa militar dagiti Caldeo a naikuyog iti panguluen ti para-guardia.+ 15  Ket ti sumagmamano kadagidiay nanumo kadagiti umili ken ti natedda kadagiti umili a nabati iti siudad+ ken dagiti manangpanaw a kimmappon iti ari ti Babilonia ken ti dadduma pay kadagiti nasigo a managobra indestiero ni Nabuzaradan a panguluen ti para-guardia.+ 16  Ket ti sumagmamano kadagidiay nanumo iti daga pinagtalinaed ni Nabuzaradan a panguluen ti para-guardia kas agay-aywan iti kaubasan ken kas inkapilitan a trabahador.+ 17  Ket dagiti adigi a gambang+ a kukua ti balay ni Jehova ken dagiti kareton+ ken ti baybay a gambang+ nga adda iti balay ni Jehova rinumekrumek dagiti Caldeo ket ti isuamin a gambangda inawitda nga impan idiay Babilonia.+ 18  Ket innalada dagiti lata ken dagiti suplad+ ken dagiti pagiddep+ ken dagiti malukong+ ken dagiti kopa ken amin dagiti aruaten a gambang nga inusarda a pagserbi.+ 19  Ket dagiti palanggana+ ken dagiti pagikkan ti apuy ken dagiti malukong+ ken dagiti lata ken dagiti pagsaadan ti silaw+ ken dagiti kopa ken dagiti malukong a naaramid iti pudpudno a balitok,+ ken dagidiay a naaramid iti pudpudno a pirak,+ innala ti panguluen ti para-guardia.+ 20  Ken ti dua nga adigi,+ ti maysa a baybay,+ ken ti sangapulo ket dua a toro a gambang+ nga adda iti sirok ti baybay, dagiti kareton, nga inaramid ni Ari Solomon maipaay iti balay ni Jehova.+ Saan idi a matimbang ti gambangda—dagitoy amin nga aruaten.+ 21  Ket no maipapan kadagiti adigi, sangapulo ket walo a kasiko ti kangato ti tunggal adigi,+ ket maysa a linabag a mismo a sangapulo ket dua a kasiko ti manglikmut iti dayta;+ ket ti kapuskolna uppat a ramayan, a dayta ket lungogan. 22  Ket ti paratok iti rabawna naaramid iti gambang,+ ket ti kangato ti maysa a paratok lima a kasiko;+ ket no maipapan iti aramid nga iniket ken dagiti granada iti rabaw ti paratok, iti intero nga aglikmut,+ gambang amin; ket ti maikadua nga adigi addaan iti kas met laeng kadagitoy, kasta met kadagiti granada.+ 23  Ket dagiti granada siam a pulo ket innemda idi, kadagiti sikigan, amin dagiti granada sangagasutda iti rabaw ti aramid nga iniket iti aglikmut.+ 24  Kanayonanna pay, ti panguluen ti para-guardia innalana ni Seraias+ a panguluen a padi ken ni Sofonias+ a maikadua a padi ken ti tallo nga agay-aywan iti ruangan,+ 25  ket manipud iti siudad nangala iti maysa nga opisial ti palasio nga isu idi ti komisionado kadagiti lallaki ti gubat, ken pito a lallaki kadagidiay makaadani iti ari,+ isuda a nasarakan iti siudad, ken ti sekretario ti panguluen ti buyot, daydiay mangur-urnong kadagiti umili ti daga, ken innem a pulo a lallaki kadagiti umili ti daga, isuda a nasarakan iti tengnga ti siudad.+ 26  Gapuna dagitoy innala ni Nabuzaradan+ a panguluen ti para-guardia ket inturongna ida agingga iti ari ti Babilonia idiay Ribla.+ 27  Ket dagitoy kinabil ti ari ti Babilonia+ ket pinapatayna ida idiay Ribla+ iti daga ti Hamat.+ Iti kasta ti Juda napan iti pannakaidestiero manipud iti dagana.+ 28  Dagitoy dagiti tattao nga indestiero ni Nabucodorosor: iti maikapito a tawen, tallo ribu duapulo ket tallo a Judio.+ 29  Iti maikasangapulo ket walo a tawen ni Nabucodorosor,+ manipud Jerusalem adda idi walo gasut tallopulo ket dua a kararua. 30  Iti maikaduapulo ket tallo a tawen ni Nabucodorosor, ni Nabuzaradan a panguluen ti para-guardia indestierona dagiti Judio, pito gasut uppat a pulo ket lima a kararua.+ Amin dagiti kararua uppat a ribu innem a gasut idi. 31  Idi agangay naaramid iti maikatallopulo ket pito a tawen ti pannakaidestiero ni Jehoiaquin+ nga ari ti Juda, iti maikasangapulo ket dua a bulan, iti maikaduapulo ket lima nga aldaw ti bulan, a ni Evil-merodac nga ari ti Babilonia, iti tawen a panagbalinna nga ari, intal-ona ti ulo+ ni Jehoiaquin nga ari ti Juda ket inruarna manipud iti balay a pagbaludan. 32  Ket rinugianna ti agsao kenkuana iti naimbag a bambanag ken isaad ti tronona a nangatngato ngem kadagiti trono ti dadduma nga ar-ari nga adda idi kenkuana idiay Babilonia.+ 33  Ket inuksobna dagiti kawesna iti pagbaludan,+ ket nangan iti tinapay+ iti sanguananna a patinayon iti amin nga al-aldaw ti panagbiagna.+ 34  Ket no maipapan iti sustentona, adda patinayon a sustento a naited kenkuana manipud iti ari ti Babilonia, iti inaldaw kas maiparbeng, agingga iti aldaw ti ipapatayna,+ iti amin nga al-aldaw ti panagbiagna.

Footnotes