Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Jeremias 50:1-46

50  Ti sao a sinao ni Jehova maipapan iti Babilonia,+ maipapan iti daga dagiti Caldeo,+ babaen ken Jeremias a mammadto:  “Ibagayo dayta kadagiti nasion ket ipablaakyo.+ Ket mangibayogkayo iti pagilasinan;+ ipablaakyo dayta. Dikay ilemmeng ti aniaman, O tattao. Kunaenyo, ‘Ti Babilonia nakautibon.+ Ni Bel naibabain.+ Ni Merodac napagkullayaw. Dagiti ladawanna naibabain.+ Dagiti makadurmen nga idolona napagkullayaw.’  Ta maibusor kenkuana simmang-at ti maysa a nasion manipud iti amianan.+ Isu daydiay mamagbalin iti dagana a maysa a banag a pagmalangaan, iti kasta awan ti agnaed kenkuana.+ Agpadpada a ti tao ken naamo nga animal nagtalawda.+ Pimmanawda.”+  “Kadagidiay nga aldaw ken iti dayta a tiempo,”+ kuna ni Jehova, “ti annak ti Israel, isuda ken ti annak ti Juda a sangsangkamaysa, umaydanto.+ Magnadanto, nga agsangsangitda bayat a magnada,+ ket sapulendanto ni Jehova a Diosda.+  Im-imtuodendanto ti dana nga agturong iti Sion, a dagiti rupada situturong iti dayta,+ a kunkunada, ‘Umaykayo ket tumipontayo ken Jehova iti di nakedngan ti kapautna a tulag a saanto a malipatan.’+  Ti ilik nagbalin nga arban dagiti agpukpukawen a parsua.+ Pinagallaalla ida dagiti bukodda a pastor.+ Inturongda ida iti bambantay.+ Napanda manipud iti bantay agingga iti turod. Nalipatanda ti lugar a paginanaanda.+  Amin dagidiay makasarak kadakuada inibusda ida,+ ket kinuna dagiti mismo a kabusorda,+ ‘Saankamto a makabasol,+ gapu iti kinapudno a nagbasolda a maikaniwas ken Jehova a disso a pagyanan ti kinalinteg+ ken ti namnama dagidi ammada,+ ni Jehova.’”  “Agtalawkayo iti tengnga ti Babilonia, ket rummuarkayo manipud a mismo iti daga dagiti Caldeo,+ ket agbalinkayo a kas mangidadaulo nga an-animal iti sanguanan ti arban.+  Ta adtoy manggutugotak ken mangpasang-atak maibusor iti Babilonia iti kongregasion dagiti dadakkel a nasion manipud iti daga ti amianan,+ ket pudno unay nga aguurnosdanto a maibusor kenkuana.+ Manipud sadiay isu makautibonto.+ Dagiti pana ti maysa kaslada kadagiti pana ti nabileg a lalaki a mangpaulila iti annak, a saan nga agsubli nga awanan kadagiti nagbanagan.+ 10  Ket ti Caldea agbalinto a samsam.+ Amin dagidiay manggamgam-ud kenkuana agpennekdanto,”+ kuna ni Jehova. 11  “Ta nagragrag-okayo,+ ta nagragragsakkayo idi kinamkamyo ti bukodko a tawid.+ Ta nagkarkarukaykayo a kas iti bumalasang a baka iti naganus a ruot,+ ket naggargaraigikayo a kas kadagiti kabalio a bulog.+ 12  Ni inayo nabainan iti kasta unay.+ Isuna a nangipasngay kadakayo naupay.+ Adtoy! Isu ti kabassitan ti pateg kadagiti nasion, maysa a let-ang nga awanan danum ken maysa a desierto a tanap.+ 13  Gapu iti rurod ni Jehova isu saanto a mapagnaedan,+ ket agbalinto a langalang a rebbek iti pakabuklanna.+ No maipapan iti asinoman a lumabas iti Babilonia, isu agmulagatto a simamalanga ken agsagawisiw maigapu kadagiti amin a saplitna.+ 14  “Aguurnoskayo a maibusor iti Babilonia iti tunggal sikigan,+ dakayo amin nga agibadbaddek iti bai.+ Isu panaenyo.+ Awan iliklikyo a pana, ta maikaniwas ken Jehova nga isu nagbasol.+ 15  Mangiriawkayo iti ikkis ti gubat maibusor kenkuana iti tunggal sikigan.+ Inyawatna ti imana.+ Natuang dagiti adigina. Narban dagiti paderna.+ Ta dayta ti pammales ni Jehova.+ Agibaleskayo kenkuana. Kas iti inaramidna, aramidenyo kenkuana.+ 16  Gessatenyo ti managmula manipud Babilonia,+ ken daydiay agig-iggem iti kumpay iti tiempo ti panagani. Gapu iti kampilan a mangirurumen agsublidanto tunggal maysa iti bukodna nga ili, ket agtalawdanto tunggal maysa nga agturong iti bukodna a daga.+ 17  “Ti Israel ket maysa a naiwarawara a karnero.+ Dagiti met laeng leon ti nangiwarawara.+ Iti immuna a gundaway isu inalun-on ti ari ti Asiria,+ ket iti daytoy naud-udi a gundaway kinibkiban ni Nabucodorosor nga ari ti Babilonia dagiti tulangna.+ 18  Gapuna daytoy ti kinuna ni Jehova ti buybuyot, ti Dios ti Israel, ‘Adtoy iturongko ti asikasok iti ari ti Babilonia ken iti dagana iti isu met laeng a wagas a panangiturongko ti asikasok iti ari ti Asiria.+ 19  Ket isublikto ti Israel iti pagarabanna,+ ket isu pudno unay nga agarabto iti Carmelo+ ken iti Basan;+ ket iti nakabambantay a rehion ti Efraim+ ken iti Galaad+ mapnekto ti kararuana.’” 20  “Ket kadagidiay nga aldaw ken iti dayta a tiempo,”+ kuna ni Jehova, “ti biddut ti Israel masukimatto,+ ngem awanto dayta; ken dagiti basol ti Juda,+ ket saanto ida a masarakan, ta pakawanekto dagidiay impalubosko a matedda.”+ 21  “Maibusor iti daga ti Merataim—sumang-atka a maibusor kenkuana+ ken maibusor kadagiti agnanaed iti Pekod.+ Adda koma panangikisap ken panangipaay iti pannakadadael a dumteng kadakuada,” kuna ni Jehova, “ket aramidem ti maitunos iti isuamin nga imbilinko kenka.+ 22  Adda ti uni ti gubat iti daga, ken dakkel a pannakarba.+ 23  O anian ti pannakaputed ken pannakatukkol ti pagpanday a martilio+ ti intero a daga!+ O Anian ti panagbalin ti Babilonia a maysa laeng a banag a pagmalangaan iti tengnga dagiti nasion!+ 24  Nangipakatak iti pangsilo kenka ket natiliwka met, O Babilonia, ket sika saanmo nga ammo dayta.+ Nasarakanka ken natengngelka met, ta maibusor idi ken Jehova a ginargarim ti bagim.+ 25  “Linuktan ni Jehova ti kamaligna, ket iruarna dagiti igam ti panangkondenarna.+ Ta adda trabaho a kukua ti Soberano+ nga Apo, ni Jehova ti buybuyot, iti daga dagiti Caldeo.+ 26  Sumrekkayo kenkuana manipud iti kaadaywan a paset.+ Luktanyo dagiti sarusarna.+ Isu gaburanyo, kas kadagidiay mangar-aramid kadagiti bunton,+ ket ipaayyo iti pannakadadael.+ Saan koma a maaddaan kadagiti aniaman a nabatbati.+ 27  Ikisapyo amin dagiti urbon a torona.+ Sumalogda koma iti pannakaparti.+ Asida pay, ta dimtengen ti aldawda, ti tiempo a pannakaasikasoda!+ 28  “Adda ti uni dagidiay pumampanaw ken dagidiay tumaltalaw iti daga ti Babilonia+ tapno isaritada iti Sion ti pammales ni Jehova a Diostayo,+ ti pammales a maipaay iti templona.+ 29  “Mangpaayabkayo kadagiti pumapana maibusor iti Babilonia, dagiti amin nga agibadbaddek iti bai.+ Agpakarsokayo maibusor kenkuana iti intero nga aglikmut. Awan koma dagiti makatalaw.+ Isu supapakanyo maitunos iti aramidna.+ Maitunos iti isuamin nga inaramidna, aramidenyo kenkuana.+ Ta maibusor ken Jehova nga isu nagtignay a sidudursok, maibusor iti Daydiay Santo ti Israel.+ 30  Gapuna dagiti agtutubo a lallakina mapasagdanto kadagiti publiko a plasana,+ ket uray dagiti amin a lallakina ti gubat mapagulimekdanto iti dayta nga aldaw,”+ kuna ni Jehova. 31  “Adtoy! Bumusorak kenka,+ O Kinadursok,”+ kuna ti Soberano+ nga Apo, ni Jehova ti buybuyot, “ta ti aldawmo masapul a dumteng, ti tiempo a masapul nga asikasuenka. 32  Ket ti Kinadursok sigurado a maitibkolto ken mapasag,+ ket awananto iti mangpatakder kenkuana.+ Ket mangpagayebgebakto iti apuy kadagiti siudadna, ket masapul nga alun-onenna amin dagiti aglawlawna.”+ 33  Daytoy ti kinuna ni Jehova ti buybuyot: “Ti annak ti Israel ken ti annak ti Juda sangsangkamaysada a mairurrurumen, ket amin dagidiay mangkakautibo kadakuada tinengngelda ida.+ Nagkedkedda a mangpalubos kadakuada.+ 34  Ti Manangsaka kadakuada napigsa,+ Jehova ti buybuyot isu ti naganna.+ Di bumurong a tamingennanto ti legal a kasoda,+ tapno pudno a maitedna ti inana iti daga+ ken mapaglagawna dagiti agnanaed iti Babilonia.”+ 35  “Adda kampilan a maibusor kadagiti Caldeo,”+ kuna ni Jehova, “ken maibusor kadagiti agnanaed iti Babilonia+ ken maibusor kadagiti prinsipena+ ken maibusor kadagidiay mamasiribna.+ 36  Adda kampilan a maibusor kadagiti mannanao iti ubbaw,+ ket pudno unay nga agtignaydanto a simamaag.+ Adda kampilan a maibusor kadagiti nabileg a lallakina,+ ket pudno a mapagkullayawdanto.+ 37  Adda kampilan a maibusor kadagiti kabalioda+ ken maibusor kadagiti karuaheda a pakigubat ken maibusor kadagiti isuamin a naglalaok a bunggoy nga adda iti tengngana,+ ket pudno unay nga agbalindanto a babbai.+ Adda kampilan a maibusor kadagiti gamengna,+ ket pudno a masamsamdanto. 38  Adda panamagwalangwalang iti dandanumna, ket masapul a mamagaanda.+ Ta maysa dayta a daga ti kinitikitan a ladladawan,+ ket gapu kadagiti nakaal-aliaw a sirmatada agtultuloyda nga agtignay a simamauyong. 39  Gapuna dagiti agay-ayuyang kadagiti awanan danum a rehion makipagnaeddanto kadagiti agtagtaguob nga animal, ket masapul nga agnaed kenkuana dagiti abestrus;+ ket isu saanton a pulos mapagnaedan, saanto met nga agtaeng iti kinapkaputotan.”+ 40  “Kas iti panangduprak ti Dios iti Sodoma ken iti Gomorra+ ken kadagiti kabangibangna nga ili,”+ kuna ni Jehova, “awanto ti tao nga agnaed sadiay, ti anak ti sangatauan saanto met nga agtaeng kenkuana kas maysa a ganggannaet.+ 41  “Adtoy! Ti maysa nga ili um-umay manipud iti amianan; ket ti maysa a dakkel a nasion+ ken ti met laeng naindaklan nga ar-ari+ magutugotdanto manipud iti kaadaywan a paspaset ti daga.+ 42  Agiggemda iti bai ken gayang.+ Naulpitda ket saandanto a mangipakita iti asi.+ Ti unida ket kas iti baybay a naariwawa,+ ket agsakaydanto kadagiti kabalio;+ nayurnosda a kasla maymaysa a lalaki maipaay iti gubat maibusor kenka, O anak a babai ti Babilonia.+ 43  “Ti ari ti Babilonia nangngegna ti damag maipapan kadakuada,+ ket nagsalupaypay dagiti imana.+ Adda rigat! Isu kinemmeg dagiti nakaro nga ut-ot, kas iti babai nga agpaspasngay.+ 44  “Adtoy! Addanto sumang-at a kas iti maysa a leon manipud kadagiti napannakkel a kasamekan iti igid ti Jordan nga agturong iti manayon a disso a pagyanan,+ ngem iti apagkanito pagtarayekto ida manipud kenkuana.+ Ket daydiay mapili dutokakto a mamangulo kenkuana.+ Ta siasino ti kas kaniak,+ ken siasinonto ti mangkarit kaniak,+ ket siasino, ita, ti pastor a makapagtakder iti sanguanak?+ 45  Gapuna denggenyo, O tattao, ti pammatigmaan+ ni Jehova a binukelna maibusor iti Babilonia+ ken dagiti kapanunotanna a pinanunotna maibusor iti daga dagiti Caldeo.+ Sigurado a maiguyodguyodto dagidiay babassit iti arban.+ Sigurado a maigapu kadakuada paglangalangennanto ti disso a pagyananda.+ 46  Gapu iti daranudor inton naalan ti Babilonia, ti daga sigurado a mapagyugayogto,+ ket iti tengnga dagiti nasion maysa nga ikkis ti mangngegan a mismo.”+

Footnotes