Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Jeremias 38:1-28

38  Ket ni Sefatias nga anak ni Mattan ken ni Gedalias nga anak ni Pasur ken ni Jucal+ nga anak ni Selemias ken ni Pasur nga anak ni Malkias+ nangngegda ti sasao a sasawen idi ni Jeremias kadagiti amin nga umili,+ a kunkunana:  “Daytoy ti kinuna ni Jehova, ‘Daydiay agtultuloy nga agnaed iti daytoy a siudad isunto ti matay babaen ti kampilan,+ babaen ti nakaro a bisin+ ken babaen ti angol.+ Ngem daydiay rummuar a mapan kadagiti Caldeo isunto ti agtultuloy nga agbiag ket sigurado a matagikuananto ti kararuana kas maysa a samsam ken sibibiag.’+  Daytoy ti kinuna ni Jehova, ‘Di bumurong a daytoy a siudad maitedto iti ima ti puersa militar ti ari ti Babilonia, ket sigurado a kautibuennanto dayta.’”+  Ket rinugian dagiti prinsipe a kunaen iti ari: “Daytoy a tao, pangngaasim, mapapatay koma,+ ta kasta ti panangpakpakapuyna iti im-ima dagiti lallaki ti gubat a nabati iti daytoy a siudad ken iti im-ima dagiti amin nga umili, babaen ti panagsaona kadakuada maitunos kadagitoy a sasao.+ Ta daytoy a tao ket maysa nga agsapsapul saan nga iti talna daytoy nga ili no di ket iti didigra.”  Gapuna kinuna ni Ari Zedekias: “Adtoy! Isu adda kadagiti imayo. Ta awan a pulos ti banag a pangdaeran kadakayo ti mismo nga ari.”+  Ket innalada ni Jeremias ket impisokda iti pagurnongan ti danum ni Malkias+ nga anak ti ari, nga adda iti Paraangan ti Guardia.+ Gapuna impababada ni Jeremias babaen kadagiti tali. Ita iti pagurnongan ti danum awan idi ti danum, no di ket pitak; ket ni Jeremias nangrugi a mailumlom iti pitak.+  Ket ni Ebed-melec nga Etiope,+ maysa a lalaki a eunuko ken adda iti balay ti ari, nangngegna nga inkabilda ni Jeremias iti pagurnongan ti danum; ket ti ari situtugaw idi iti Ruangan ti Benjamin.+  Gapuna rimmuar ni Ebed-melec manipud iti balay ti ari ket nagsao iti ari, a kunkunana:  “O apok nga ari, dagitoy a lallaki nagaramidda iti dakes iti isuamin nga inaramidda ken Jeremias a mammadto, nga impisokda iti pagurnongan ti danum, iti kasta isu matayto+ iti ayanna gapu iti nakaro a bisin.+ Ta awanen ti tinapay iti siudad.” 10  Idin ti ari binilinna ni Ebed-melec nga Etiope, a kunkunana: “Mangalaka manipud iti daytoy a lugar iti tallopulo a lallaki a maadda iti aywanmo, ket masapul nga aonem ni Jeremias a mammadto iti pagurnongan ti danum sakbay a matay.”+ 11  Iti kasta innala ni Ebed-melec dagiti lallaki nga adda iti aywanna ket simrek iti balay ti ari agingga iti baba ti pagidulinan iti gameng+ ket nangala sadiay kadagiti rutrot a rigis ken kadagiti rutrot a pedaso ti lupot ket impababana ida ken Jeremias iti pagurnongan ti danum+ babaen kadagiti tali. 12  Idin ni Ebed-melec nga Etiope kinunana ken Jeremias: “Ikabilmo, pangngaasim, dagiti rutrot a rigis ken dagiti pedaso ti lupot kadagiti kilikilim iti baba dagiti tali.” Ni Jeremias inaramidna ita ti kasta.+ 13  Kamaudiananna inaonda ni Jeremias babaen kadagiti tali ket insang-atda manipud iti pagurnongan ti danum. Ket ni Jeremias nagtultuloy nga agnaed iti Paraangan ti Guardia.+ 14  Ket ni Ari Zedekias nagbaon ket impaiyegna kenkuana+ ni Jeremias a mammadto idiay maikatlo a seserrekan,+ nga adda iti balay ni Jehova,+ ket kalpasanna ti ari kinunana ken Jeremias: “Imtuodek kenka ti maysa a banag. Dika ilemmeng kaniak ti aniaman.”+ 15  Gapu itoy ni Jeremias kinunana ken Zedekias: “No kas pagarigan ibagak kenka, saannakto kadi a papatayen a di bumurong? Ket no kas pagarigan balakadanka, saannakto nga imdengan.”+ 16  Iti kasta ni Ari Zedekias nagsapata ken Jeremias iti lugar a paglemmengan, a kunkunana: “Kas sibibiag ni Jehova, a nangaramid maipaay kadatayo iti daytoy a kararua,+ saankanto a papatayen, ket saankanto nga iyawat iti ima dagitoy a lallaki a mangsapsapul ita kararuam.”+ 17  Ni Jeremias kinunana ita ken Zedekias: “Daytoy ti kinuna ni Jehova, ti Dios ti buybuyot,+ ti Dios ti Israel,+ ‘No di bumurong a rummuarkanto a mapan kadagiti prinsipe ti ari ti Babilonia,+ sigurado nga agtultuloyto met nga agbiag ti kararuam ket daytoy met laeng a siudad saanto a mapuoran iti apuy, ket sika ken ti sangakabbalayam sigurado nga agtultuloyto nga agbiag.+ 18  Ngem no saankanto a rummuar a mapan kadagiti prinsipe ti ari ti Babilonia, daytoy a siudad mayawatto met iti ima dagiti Caldeo, ket pudno a puorandanto iti apuy,+ ket sika saankanto a makatalaw iti imada.’”+ 19  Idin ni Ari Zedekias kinunana ken Jeremias: “Maaliawak kadagiti Judio a kimmappon kadagiti Caldeo,+ ta amangan no iyawatdak iti imada ket pudno a pagpalaluandak.”+ 20  Ngem kinuna ni Jeremias: “Saandanto nga aramiden ti kasta a panangyawat. Agtulnogka, pangngaasim, iti timek ni Jehova iti banag a sasawek kenka, ket aglak-amkanto iti naimbag,+ ket ti kararuam agtultuloyto nga agbiag. 21  Ngem no agkitakitka a rummuar,+ daytoy ti banag nga impakita kaniak ni Jehova: 22  Ket, adtoy! amin dagiti babbai a nabati iti balay ti ari ti Juda+ mairuruarda a maipan kadagiti prinsipe ti ari ti Babilonia,+ ket kunkunada, ‘Dagiti lallaki a sikakappia kenka ginuyugoydaka+ ket nagballigida kenka.+ Inlumlomda ti sakam iti mismo a lan-ak; nagtalawda iti sungani a turong.’+ 23  Ket amin nga assawam ken annakmo iruarda nga ipan kadagiti Caldeo, ket sika saankanto a makatalaw iti imada,+ no di ket babaen iti ima ti ari ti Babilonia makemmegkanto, ket gapu kenka daytoy a siudad mapuoranto iti apuy.”+ 24  Ket ni Zedekias kinunana ken Jeremias: “Awan koma a pulos ti tao a makaammo maipapan kadagitoy a banag, tapno saanka a matay. 25  Ket no kas pagarigan mangngegan dagiti prinsipe+ a nakisaoak kenka ket pudno nga umayda kenka ket kunaenda kenka, ‘Ibagam kadakami, pangngaasim, Ania ti sinaom iti ari? Dika ilemmeng ti aniaman manipud kadakami, ket saandakanto a papatayen. Ket ania ti sinao kenka ti ari?’ 26  masapul a kunaem met kadakuada, ‘Idatdatagko idi ti panagkiddawko iti parabur iti sanguanan ti ari, a saannak koma a pagsublien iti balay ni Jehonatan+ tapno matayak sadiay.’” 27  Idi agangay immay ken Jeremias dagiti amin a prinsipe ket rinugianda a sinaludsodan. Kalpasanna, imbagana kadakuada ti maitunos kadagitoy amin a sasao nga imbilin ti ari.+ Gapuna nagulimekda iti sanguananna, ta ti banag saan a nangngegan. 28  Ket ni Jeremias nagtultuloy nga agnaed iti Paraangan ti Guardia+ agingga iti aldaw a pannakakautibo ti Jerusalem.+ Ket napasamak dayta apaman a nakautibo ti Jerusalem.+

Footnotes