Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Jeremias 37:1-21

37  Ket ni Ari Zedekias+ nga anak ni Josias+ nangrugi nga agturay a mangsandi ken Conias+ nga anak ni Jehoiaquim,+ a pinagari ni Nabucodorosor nga ari ti Babilonia iti daga ti Juda.+  Ket isu ken dagiti adipenna ken dagiti umili ti daga saanda nga inimdengan ti sasao ni Jehova+ a sinaona babaen ken Jeremias a mammadto.+  Ket ni Ari Zedekias imbaonna da Jehucal+ nga anak ni Selemias ken Sofonias+ nga anak ni Maasias+ a padi a mapan ken Jeremias a mammadto, a kunkunana: “Agkararagka, pangngaasim, ken Jehova a Diostayo maigapu kadakami.”+  Ket ni Jeremias sumsumrek ken rumrummuar idi iti tengnga dagiti umili,+ yantangay isu saanda nga inkabil iti balay a pagikulongan.  Ket adda idi rimmuar manipud Egipto a puersa militar ni Faraon;+ ket dagiti Caldeo a manglaklakub iti Jerusalem nangngegda ti damag maipapan kadakuada. Gapuna nagsanudda manipud ibubusor iti Jerusalem.+  Idin ti sao ni Jehova dimteng ken Jeremias a mammadto, a kunkunana:  “Daytoy ti kinuna ni Jehova a Dios ti Israel, ‘Daytoy ti rebbeng a sawenyo iti ari ti Juda, daydiay mangibabaon kadakayo nga umay kaniak tapno agimtuod kaniak:+ “Adtoy! Ti puersa militar ni Faraon a rumrummuar nga agturong kadakayo iti panggep a panangtulong kasapulan nga agsublinto iti dagada, iti Egipto.+  Ket sigurado nga agsublinto dagiti Caldeo ket makirupakda iti daytoy a siudad ket kautibuenda ken puoranda iti apuy.”+  Daytoy ti kinuna ni Jehova: “Dikay allilawen dagiti kararuayo,+ a kunayo, ‘Dagiti Caldeo di bumurong a pumanawdanto manipud ibubusor kadatayo,’ agsipud ta saandanto a pumanaw. 10  Ta no kinabilyo ti intero a puersa militar dagiti Caldeo a makiruprupak kadakayo+ ket adda nabati iti tengngada a lallaki a nasalput,+ tumakderdanto tunggal maysa iti toldana ket pudno a puoranda daytoy a siudad iti apuy.”’” 11  Ket napasamak idi a ti met laeng puersa militar dagiti Caldeo nagsanud manipud ibubusor iti Jerusalem+ gapu iti puersa militar ni Faraon,+ 12  a ni Jeremias nangrugi a rummuar manipud Jerusalem tapno mapan iti daga ti Benjamin+ ken tapno ti bingayna alaenna sadiay iti tengnga dagiti umili. 13  Gapuna naaramid nga idi isu adda iti Ruangan ti Benjamin,+ adda sadiay ti opisial a mangak-akem iti panangaywan, nga agnagan Irias nga anak ni Selemias nga anak ni Hananias. Dagus a tinengngelna ni Jeremias a mammadto, a kunkunana: “Kadagiti Caldeo a kumapkapponka!” 14  Ngem kinuna ni Jeremias: “Ulbod dayta!+ Saanak a kumapkappon kadagiti Caldeo.” Ngem isu saan nga immimdeng kenkuana. Gapuna ni Irias intultuloyna a tinengngel ni Jeremias ket inyegna kadagiti prinsipe. 15  Ket dagiti prinsipe+ nangrugida nga agrurod ken Jeremias,+ ket kinabilda+ ken inkabilda iti balay dagiti grilios,+ iti balay ni Jehonatan+ a sekretario, ta daytoy ti pinagbalinda a balay a pagikulongan.+ 16  Idi dimteng ni Jeremias iti balay ti pagurnongan ti danum+ ken kadagiti immarko a siled, iti kasta nagtultuloy a nagnaed ni Jeremias sadiay iti adu nga aldaw. 17  Ket ni Ari Zedekias nagbaon ket isu impaalana, ket ti ari nangrugi a nangyimtuod kenkuana iti salsaludsod iti balayna iti maysa a lugar a paglemmengan.+ Ket kinunana: “Adda kadi sao manipud ken Jehova?” Iti daytoy kinuna ni Jeremias: “Adda!” Ket kinunana pay: “Iti ima ti ari ti Babilonia mayawatkanto!”+ 18  Idin ni Jeremias kinunana ken Ari Zedekias: “Iti ania a pamay-an a nagbasolak maikaniwas kenka ken maikaniwas kadagiti adipenmo ken maikaniwas itoy nga ili,+ iti kasta inkabildak iti balay a pagikulongan? 19  Sadino, ita, ti ayan dagiti mammadtoyo a nagipadto kadakayo, a kunkunada, ‘Ti ari ti Babilonia saanto nga umay a bumusor kadakayo ken bumusor iti daytoy a daga’?+ 20  Ket ita umimdengka, pangngaasim, O apok nga ari. Ti panagkiddawko iti parabur,+ pangngaasim, maiyeg koma iti sanguanam, ket saannak a pagsublien iti balay ni Jehonatan a sekretario,+ tapno saanak a matay sadiay.”+ 21  Iti kasta nagbilin ni Ari Zedekias, ket kalpasanna impupokda ni Jeremias idiay Paraangan ti Guardia;+ ket adda idi inaldaw a panangted kenkuana iti nagbukel a tinapay manipud iti kalsada dagiti panadero,+ agingga a ti isuamin a tinapay naibus iti siudad.+ Ket ni Jeremias nagtultuloy a nagnaed iti Paraangan ti Guardia.+

Footnotes