Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Jeremias 36:1-32

36  Ita naaramid iti maikapat a tawen ni Jehoiaquim+ nga anak ni Josias, ti ari ti Juda, a daytoy a sao dimteng ken Jeremias manipud ken Jehova, a kunkunana:  “Iyalaam ta bagim iti maysa a lukot a libro,+ ket masapul nga isuratmo iti dayta ti amin a sasao+ a sinaok kenka a maibusor iti Israel ken maibusor iti Juda+ ken maibusor iti amin a nasnasion,+ manipud idi aldaw a nagsaoak kenka, manipud idi kaaldawan ni Josias, agingga itoy nga aldaw.+  Bareng no dagiti kameng ti balay ti Juda imdengandanto ti isuamin a didigra a pampanunotek nga aramiden kadakuada,+ iti panggep nga agsublida koma, tunggal maysa manipud iti dakes a dalanna,+ ken tapno pudno a mapakawanko ti biddutda ken ti basolda.”+  Ket ni Jeremias inayabanna ni Baruc+ nga anak ni Nerias tapno manipud ngiwat ni Jeremias maisurat ni Baruc ti amin a sasao ni Jehova a sinaona kenkuana, iti lukot ti libro.+  Kalpasanna ni Jeremias binilinna ni Baruc, a kunkunana: “Sipupupokak. Saanko a kabalinan ti sumrek iti balay ni Jehova.+  Ket sika masapul a sumrekka ket manipud iti lukot nga insuratmo manipud ngiwatko basaem a sipipigsa ti sasao ni Jehova+ kadagiti lapayag dagiti umili idiay balay ni Jehova iti aldaw ti panagayunar;+ ken kasta met a kadagiti lapayag ti isuamin a Juda a sumsumrek manipud kadagiti siudadda rebbeng nga ibasam ida a sipipigsa.+  Bareng no ti panagkiddawda iti parabur makagtengto iti sanguanan ni Jehova+ ket agsublidanto, tunggal maysa manipud iti dakes a dalanna,+ ta dakkel ti unget ken ti pungtot a sinao ni Jehova maibusor iti daytoy nga ili.”+  Ket ni Baruc+ nga anak ni Nerias inaramidna ti maitunos iti isuamin nga imbilin kenkuana ni Jeremias a mammadto, a manipud iti libro basaenna+ a sipipigsa iti balay ni Jehova ti sasao ni Jehova.+  Ita naaramid iti maikalima a tawen ni Jehoiaquim+ nga anak ni Josias, ti ari ti Juda, iti maikasiam a bulan,+ nga amin dagiti umili ti Jerusalem ken amin dagiti umili nga um-umay manipud kadagiti siudad ti Juda nga agturong iti Jerusalem nangiwaragawagda iti maysa a panagayunar iti sanguanan ni Jehova.+ 10  Ket rinugian ni Baruc a basaen a sipipigsa ti sasao ni Jeremias manipud iti libro iti balay ni Jehova, iti siled a panganan+ ni Gemarias+ nga anak ni Safan+ a managkopia,+ iti makinngato a paraangan, iti pagserkan ti baro a ruangan ti balay ni Jehova,+ kadagiti lapayag dagiti amin nga umili. 11  Ket ni Mikaias nga anak ni Gemarias nga anak ni Safan+ nangngegna amin a sasao ni Jehova manipud iti libro. 12  Iti kasta isu simmalog a napan iti balay ti ari, iti siled a panganan ti sekretario, ket, adtoy! sadiay a situtugaw idi dagiti amin a prinsipe, ni Elisama+ a sekretario ken ni Delaias+ nga anak ni Semaias ken ni Elnatan+ nga anak ni Acbor+ ken ni Gemarias+ nga anak ni Safan+ ken ni Zedekias nga anak ni Hananias ken amin dagiti dadduma a prinsipe. 13  Ket imbaga kadakuada ni Mikaias+ ti amin a sasao a nangngegna idi a ni Baruc nagbasa a sipipigsa manipud iti libro kadagiti lapayag dagiti umili.+ 14  Idin amin dagiti prinsipe imbaonda ken Baruc+ ni Jehudi+ nga anak ni Netanias nga anak ni Selemias nga anak ni Cusi, a kunkunada: “Ti lukot a nagbasaam a sipipigsa kadagiti lapayag dagiti umili—alaem ita imam ket umayka.” Iti kasta ni Baruc nga anak ni Nerias innalana ti lukot iti imana ket simrek a napan kadakuada.+ 15  Kalpasanna kinunada kenkuana: “Agtugawka, pangngaasim, ket ibasam dayta a sipipigsa kadagiti lapayagmi.” Gapuna ni Baruc+ nagbasa a sipipigsa kadagiti lapayagda. 16  Ita naaramid nga apaman a nangngegda ti amin a sasao, nagkikinnitada a siaalinggaget; ket kinunada ken Baruc: “Di bumurong nga ibagaminto iti ari amin dagitoy a sasao.”+ 17  Ket nagimtuodanda ni Baruc, a kunkunada: “Ibagam kadakami, pangngaasim, Kasano ti panangisuratmo amin kadagitoy a sasao manipud ngiwatna?”+ 18  Idin kinuna kadakuada ni Baruc: “Manipud ngiwatna nagtultuloy nga indeklarana kaniak dagitoy amin a sasao, ket nagsursuratak iti libro babaen iti tinta.”+ 19  Kamaudiananna kinuna dagiti prinsipe ken Baruc: “Mapanka, aglemmengka, sika ken ni Jeremias, tapno awanto a pulos ti makaammo no sadino ti ayanyo.”+ 20  Kalpasanna simrekda a napan iti ari, iti paraangan,+ ket ti lukot intalekda iti siled a panganan+ ni Elisama+ a sekretario; ket rinugianda nga ibaga ti amin a sasao kadagiti lapayag ti ari. 21  Gapuna ti ari imbaonna ni Jehudi+ nga alaenna ti lukot. Iti kasta innalana dayta manipud iti siled a panganan ni Elisama+ a sekretario.+ Ket rinugian ni Jehudi nga ibasa a sipipigsa kadagiti lapayag ti ari ken kadagiti lapayag dagiti amin a prinsipe a sitatakder iti sibay ti ari. 22  Ket ti ari situtugaw idi iti balay a pagnaedan iti kalam-ekna,+ iti maikasiam a bulan,+ nga adda paginuduan+ a sumsumged iti sanguananna. 23  Idin naaramid nga apaman a nakabasa ni Jehudi iti tallo wenno uppat a binatog ti panid, pinirsayna dayta babaen iti imuko ti sekretario, nga impuruakna pay iti apuy nga adda iti paginuduan agingga a ti intero a lukot nanungpal iti apuy nga adda iti paginuduan.+ 24  Ket saanda a nakarikna iti panagalinggaget;+ uray ti ari ken amin nga adipenna, nga umim-imdeng kadagitoy amin a sasao, saanda met a rinay-ab dagiti kawesda.+ 25  Ket uray da Elnatan+ ken Delaias+ ken Gemarias+ nagpakaasida a mismo iti ari a saanna a puoran ti lukot, ngem saan nga immimdeng kadakuada.+ 26  Kanayonanna, ti ari binilinna ni Jerameel nga anak ti ari ken ni Seraias nga anak ni Azriel ken ni Selemias nga anak ni Abdeel nga alaenda ni Baruc a sekretario ken ni Jeremias a mammadto.+ Ngem ni Jehova pinagtalinaedna ida a silelemmeng.+ 27  Ket ti sao ni Jehova dimteng pay ken Jeremias kalpasan a ti ari pinuoranna ti lukot nga addaan iti sasao nga insurat ni Baruc+ manipud ngiwat ni Jeremias,+ a kunkunana: 28  “Iyalaam manen ta bagim iti maysa a lukot, sabali pay a lukot, ket isuratmo iti dayta dagiti amin nga immuna a sasao nga adda idi iti umuna a lukot, a pinuoran ni Jehoiaquim nga ari ti Juda.+ 29  Ket maibusor ken Jehoiaquim nga ari ti Juda rebbeng a kunaem, ‘Daytoy ti kinuna ni Jehova: “Sika pinuoram daytoy a lukot,+ a kinunam, ‘Apay nga insuratmo iti dayta,+ a kinunam: “Ti ari ti Babilonia umayto a di bumurong ket sigurado a dadaelennanto daytoy a daga ket ikkatennanto ti tao ken animal manipud iti dayta”?’+ 30  Gapuna daytoy ti kinuna ni Jehova maibusor ken Jehoiaquim nga ari ti Juda, ‘Isu awananto iti asinoman nga agtugaw iti trono ni David,+ ket ti mismo a natay a bagina agbalinto a maysa a banag a naipalladaw+ iti pudot iti aldaw ken iti nakaro a lamiis iti rabii. 31  Ket isingirkonto kenkuana+ ken iti kaputotanna ken kadagiti adipenna ti biddutda,+ ket ipagtengkonto kadakuada ken kadagiti agnanaed iti Jerusalem ken kadagiti tattao ti Juda ti isuamin a didigra a sinaok maibusor kadakuada,+ ket saanda nga immimdeng.’”’”+ 32  Ket ni met laeng Jeremias nangala iti sabali pay a lukot ket intedna ken Baruc nga anak ni Nerias, ti sekretario,+ a nangisurat iti dayta manipud ngiwat+ ni Jeremias iti amin a sasao ti libro a pinuoran ni Jehoiaquim nga ari ti Juda iti apuy;+ ket adda nainayon kadakuada nga ad-adu pay a sasao a kas kadagidiay.

Footnotes