Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Jeremias 31:1-40

31  “Iti dayta a tiempo,” kuna ni Jehova, “agbalinakto a Dios kadagiti amin a pamilia ti Israel; ket no maipapan kadakuada, agbalindanto nga ilik.”+  Daytoy ti kinuna ni Jehova: “Ti ili a buklen dagiti nakalasat iti kampilan nakasarak iti parabur idiay let-ang,+ idi a ti Israel magmagna tapno aginana.”+  Manipud iti adayo nagparang kaniak ni Jehova a mismo, a kunkunana: “Ket buyogen ti ayat nga agingga iti tiempo a di nakedngan inayatka.+ Dayta ti makagapu nga inyasidegka babaen ti naayat a kinamanangngaasi.+  Iti kasta bangonenkanto manen ket pudno a mabangonkanto manen,+ O birhen ti Israel. Iti kasta arkosamto ti bagim kadagiti panderetam ket pudno a mapankanto iti sala dagidiay agkatkatawa.+  Agmulakanto pay kadagiti kaubasan iti bambantay ti Samaria.+ Dagiti managimula pudno unay nga agmuladanto ket rugianda nga usaren ida.+  Ta adda maysa nga aldaw inton dagiti agsipsiput iti nakabambantay a rehion ti Efraim pudno nga ipukkawdanto, ‘O tumakderkayo, ket sumang-attayo idiay Sion, ken Jehova a Diostayo.’”+  Ta daytoy ti kinuna ni Jehova: “Umkiskayo a sipipigsa ken Jacob buyogen ti panagrag-o, ket umkiskayo iti makatitileng iti sanguanan dagiti nasion.+ Ipablaakyo dayta.+ Mangipaaykayo iti daydayaw ket kunaenyo, ‘Isalakanmo, O Jehova, ti ilim, ti natda iti Israel.’+  Adtoy iyegko ida manipud iti daga ti amianan,+ ket ummongekto ida a sangsangkamaysa manipud kadagiti kaadaywan a paset ti daga.+ Mairamanto kadakuada ti bulsek ken ti pilay, ti masikog a babai ken daydiay agpaspasngay, isuda amin.+ Kas maysa a dakkel a kongregasion agsublidanto ditoy.+  Umaydanto a buyogen ti panagsangit,+ ket iyegkonto ida babaen kadagiti panagpakaasida iti pabor. Papagnaekto ida kadagiti naapres a ginget ti danum,+ iti umiso a dalan nga iti dayta saandanto a maitibkol. Ta nagbalinak a maysa nga Ama iti Israel;+ ket no maipapan ken Efraim, isu ti inaunak.”+ 10  Denggenyo ti sao ni Jehova, O dakayo a nasnasion, ket ibagayo dayta kadagiti isla iti adayo,+ ket kunaenyo: “Isu ummongento a sangsangkamaysa+ Daydiay mangwarawara iti Israel, ket pudno unay nga isu aywanannanto a kas iti panangaywan ti maysa a pastor iti pangenna.+ 11  Ta ni Jehova pudno a subbotennanto ni Jacob+ ket bawyennanto iti ima daydiay napigpigsa ngem isu.+ 12  Ket pudno unay nga umaydanto ket agdir-ida a sirarag-o iti kangatuan ti Sion+ ket agraniagdanto gapu iti kinaimbag ni Jehova,+ gapu iti bukel ken gapu iti baro nga arak+ ken gapu iti lana ken gapu kadagidiay urbon ti arban ken ti bakbaka.+ Ket ti kararuada agbalinto laeng a kas iti maysa a nasayaat-pannakapadanumna a minuyongan,+ ket saandanto manen nga aglupoy.”+ 13  “Iti dayta a tiempo, ti birhen agrag-onto iti panagsala, kasta met dagiti agtutubo a lallaki ken dagiti lallakay, isuda amin.+ Ket ti panagleddaangda baliwakto iti panagragsak, ket liwliwaekto ida ken pagrag-oek ida manipud iti ladingitda.+ 14  Ket pennekekto ti kararua ti papadi iti kinalukmeg,+ ket iti kinaimbagko mapnekto ti bukodko nga ili,”+ kuna ni Jehova. 15  “Daytoy ti kinuna ni Jehova, ‘Idiay Rama+ mangmangngegan ti maysa a timek, un-unnoy ken napait a panagsangit;+ ni Raquel+ agsangsangit gapu iti annakna.+ Nagkitakit a maliwliwa maipuon iti annakna,+ gapu ta awandan.’”+ 16  Daytoy ti kinuna ni Jehova: “‘Medmedam ti timekmo iti panagsangit, ken dagiti matam iti lulua,+ ta adda gunggona maipaay iti aramidmo,’ kuna ni Jehova, ‘ket pudno unay nga agsublidanto manipud iti daga ti kabusor.’+ 17  “‘Ket adda namnama+ maipaay iti masanguanam,’ kuna ni Jehova, ‘ket ti annak pudno unay nga agsublidanto iti bukodda a teritoria.’”+ 18  “Pudno a nangngegak a ni Efraim umas-asug a mismo,+ ‘Linintegnak, tapno mailintegak,+ kas iti maysa a kigaw a baka a saan a nasanay.+ Pagsubliennak, ket sisasaganaakto nga agsubli,+ ta sika ni Jehova a Diosko.+ 19  Ta kalpasan ti panagsublik nagbabawiak;+ ket kalpasan a napakaammuanak sinipatko ti luppo.+ Nagbainak, ket nariknak met ti pannakaipababa,+ ta inawitko ti pannakaumsi ti kinaagtutubok.’”+ 20  “Ni Efraim maysa kadi a napateg nga anak kaniak, wenno maysa nga ubing a natrato a siaayat?+ Ta no kasano ti kinakaro ti panagsaok a maibusor kenkuana di bumurong nga isu malagipkonto nga ad-adda pay.+ Dayta ti makagapu a dagiti bagisko nagbalin a naariwawa maipaay kenkuana.+ Sigurado a maasianakto kenkuana,”+ kuna ni Jehova. 21  “Mangipasdekka kadagiti marka ti dalan maipaay kenka. Mangikabilka kadagiti teddek a pagilasinan maipaay kenka.+ Ipamaysam ta pusom iti kangrunaan a kalsada, ti dalan a kasapulan a papanamto.+ Agsublika, O birhen ti Israel. Agsublika kadagitoy a siudadmo.+ 22  Kasano kabayag a bumaw-ingka ditoy ken idiay,+ O di matalek nga anak a babai?+ Ta ni Jehova nangparsua iti baro a banag iti daga: Ti maysa a babai laeng dupudopennanto a likmuten ti maysa a nabaneg a lalaki.” 23  Daytoy ti kinuna ni Jehova ti buybuyot, ti Dios ti Israel: “Sawendanto pay daytoy a sao iti daga ti Juda ken kadagiti siudadna, inton ummongek dagiti kautibo kadakuada, ‘Bendisionannaka koma ni Jehova,+ O nalinteg a disso a pagnaedan,+ O nasantuan a bantay.’+ 24  Ket iti dayta, ti Juda ken amin dagiti siudadna sigurado nga agnaeddanto a sangsangkamaysa, dagiti mannalon ken dagidiay nagluas a naikuyog iti pangen.+ 25  Ta pennekekto ti nabannog a kararua, ket ti tunggal aglulupoy a kararua punnuekto.”+ 26  Iti daytoy a banag nagriingak ket rinugiak ti kumita; ket no maipapan iti turogko, makaparagsak idi kaniak dayta. 27  “Adtoy! Adda um-umayen nga al-aldaw,” kuna ni Jehova, “ket mulaakto ti balay ti Israel ken ti balay ti Juda iti bin-i ti tao ken iti bin-i ti naamo nga animal.”+ 28  “Ket mapasamakto a no kasano a nagal-alibtakak kadakuada+ a mangparut ken mangrugpo ken mangrebba ken mangdadael ken mangdangran,+ kastanto ti panagal-alibtakko kadakuada a mangibangon ken agmula,”+ kuna ni Jehova. 29  “Kadagidiay nga aldaw saandanton a kunaen, ‘Dagiti amma isuda dagidiay nangan iti naata nga ubas, ngem ti naalino isu dagiti ngipen ti annak.’+ 30  Ngem tunggal maysa maipaay iti bukodna a biddut ti pakatayanto ti maysa.+ Asinoman a tao a mangan iti naata nga ubas, dagiti ngipenna a mismo ti maalinonto.” 31  “Adtoy! Adda um-umayen nga al-aldaw,” kuna ni Jehova, “ket mamatalgedakto iti baro a tulag+ iti balay ti Israel+ ken iti balay ti Juda;+ 32  saan a kas iti tulag a pinatalgedak kadagidi ammada iti daydi aldaw a panangkibinko kadakuada tapno iruar ida manipud iti daga ti Egipto,+ ‘a dayta a tulagko rinakrakda a mismo,+ nupay siak tinagikuak ida a kas asawa,’+ kuna ni Jehova.” 33  “Ta daytoy ti tulag+ a patalgedakto iti balay ti Israel kalpasan dagidiay nga aldaw,”+ kuna ni Jehova. “Ikabilkonto ti lintegko iti unegda,+ ket iti pusoda isuratkonto dayta.+ Ket agbalinakto a Diosda, ket isuda agbalindanto nga ilik.”+ 34  “Ket saandanton a mangisuro tunggal maysa iti kaduana ken tunggal maysa iti kabsatna,+ a kunkunana, ‘Ammuenyo ni Jehova!’+ ta isuda amin am-ammodakto, manipud iti kababassitan kadakuada agingga a mismo iti kadadakkelan kadakuada,”+ kuna ni Jehova. “Ta pakawanekto ti biddutda, ket ti basolda saankonton a lagipen.”+ 35  Daytoy ti kinuna ni Jehova, ti Manangipaay iti init a maipaay a lawag iti aldaw,+ kadagiti paglintegan+ ti bulan+ ken kadagiti bituen a maipaay a lawag iti rabii,+ Daydiay mangkibkibur iti baybay tapno dagiti dalluyonna agbalin a naariwawa,+ Daydiay nga agnagan Jehova ti buybuyot:+ 36  “‘No dagitoy nga alagaden mabalin a maikkat iti sanguanak,’+ kuna ni Jehova, ‘dagidiay a bin-i ti Israel mabalin met nga agsardengda iti panagbalin a maysa a nasion iti sanguanak a kanayon.’”+ 37  Daytoy ti kinuna ni Jehova: “‘No ti langlangit iti ngato mabalin a marukod ket dagiti pamuon ti daga ditoy baba mabalin a masukimat,+ siak met mabalinko a laksiden ti intero a bin-i ti Israel maigapu iti isuamin nga inaramidda,’+ kuna ni Jehova.” 38  “Adtoy! Adda um-umayen nga al-aldaw,” kuna ni Jehova, “ket ti siudad sigurado a maibangonto+ ken Jehova manipud iti Torre ni Hananel+ agingga iti Makinsuli a Ruangan.+ 39  Ket ti banteng a pagrukod+ pudno a mapanto pay nga aglaylayon agingga iti turod ti Gareb, ket pudno unay nga aglikawto nga agturong iti Goa. 40  Ket ti isuamin a nababa a tanap dagiti bangkay+ ken ti nataba a dapdapo,+ ken amin dagiti natukantukad a talon agingga iti naapres a ginget ti Kidron,+ agingga idiay suli ti Ruangan ti Kabalio+ nga agpaleleggakan ti init, nasantuandanto ken Jehova.+ Saanto a maparut, saanto met a marba uray kaanoman agingga iti tiempo a di nakedngan.”+

Footnotes