Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Jeremias 3:1-25

3  Adda maysa a pagkukuna: “No ti maysa a lalaki pagtalawenna ti asawana ket isu pudno a pumanaw kenkuana ket agbalin a kukua ti sabali a lalaki, rebbeng kadi nga agsubli pay kenkuana?”+ Saan kadi a dayta a daga di bumurong a narugitan?+ “Ket sika nagbalangkantiska iti adu a kakadua;+ ket rebbeng kadi nga adda isusubli kaniak?”+ kuna ni Jehova.  “Itangwam dagita matam kadagiti naasak-asak a dana ket kitaem.+ Sadino ti saanmo a nakaramesan?+ Iti igid dagiti dalan nagtugawka maipaay kadakuada, kas iti maysa nga Arabiano iti let-ang;+ ket agtultuloy a rugitam ti daga kadagiti aramidmo a panagbalangkantis ken iti kinadakesmo.+  Gapuna maipaidam dagiti naruay nga arbis,+ ket uray tudo iti primavera saan a dimteng.+ Ket ti muging ti asawa a babai nga agbalbalangkantis isu ti nagbalin a kukuam. Nagkedkedka a makarikna iti pannakaipababa.+  Manipuden ita immawagka aya kaniak, ‘Amak,+ sika ti piaren a gayyem ti kinaagtutubok!+  Rebbeng aya a ti maysa agtalinaed a maluksaw agingga iti tiempo a di nakedngan, wenno agtultuloy nga agbantay iti maysa a banag iti agnanayon?’+ Adtoy! Nagsaoka, ken nagaramidka iti dakes a bambanag ket nagballigika.”+  Ket kinuna kaniak ni Jehova idi kaaldawan ni Josias nga ari:+ “‘Nakitam kadi ti inaramid ti di matalek nga Israel?+ Mapmapan iti rabaw ti tunggal nangato a bantay+ ken iti sirok ti tunggal nabaludbod a kayo,+ tapno agbalangkantis sadiay.+  Ket kalpasan ti panangaramidna kadagitoy amin a banag kinunkunak nga isu rebbeng nga agsubli kaniak a mismo, ngem saan a nagsubli;+ ket ti Juda nagtultuloy a kimmita iti bukodna a nagulib a kabsat a babai.+  Idi nakitak dayta, gapu iti mismo a rason a ti di matalek nga Israel nakikamalala, isu pinagtalawko+ ket intedko kenkuana ti kasuratan ti naan-anay a pannakidiborsiona,+ kaskasdi a ti sigugulib ti pannakilangenna a Juda a kabsatna a babai saan a nagbuteng, no di ket isu nangrugi met a mapan ken agbalangkantis.+  Ket ti panagbalangkantisna napasamak gapu iti natagilag-an a panangmatmatna, ket rinugrugitanna ti daga+ ken nakikamalala kadagiti bato ken kadagiti kayo;+ 10  ket agpapan pay isuamin daytoy ti nagulib a kabsatna a babai a Juda saan a nagsubli kaniak buyogen ti isuamin a pusona,+ naginsusubli laeng,’+ kuna ni Jehova.” 11  Ket kinuna kaniak ni Jehova: “Ti di matalek nga Israel pinaneknekanna a nalinlinteg ti bukodna a kararua ngem iti nagulib pannakilangenna a Juda.+ 12  Mapanka, ket masapul nga iwaragawagmo dagitoy a sasao iti amianan+ ket kunaem: “‘“Agsublika, O managlikud nga Israel,” kuna ni Jehova.’+ ‘“Saankonto a pagdissuen ti rupak a siuunget kadakayo,+ ta nasungdoak,”+ kuna ni Jehova.’ ‘“Saanakto nga agtalinaed a maluksaw agingga iti tiempo a di nakedngan.+ 13  Isuna laeng ta imutektekam ti biddutmo, ta maikaniwas ken Jehova a Diosmo a nagsalungasingka.+ Ket intultuloymo nga inwarawara ti daldalanmo kadagiti ganggannaet+ iti sirok ti tunggal nabaludbod a kayo,+ ngem iti timekko saankayo nga immimdeng,” kuna ni Jehova.’” 14  “Agsublikayo, O dakayo a managlikud nga annak,”+ kuna ni Jehova. “Ta siak nagbalinak nga asawa a makinkukua kadakayo;+ ket alaenkayto, maysa manipud iti maysa a siudad ken dua manipud iti maysa a pamilia, ket iyegkayto iti Sion.+ 15  Ket ipaayankayto kadagiti pastor maitunos iti pusok,+ ket sigurado a pakanendakayto iti pannakaammo ken pannakatarus.+ 16  Ket mapasamakto nga umadukayto ket sigurado nga agbungakayo iti daga kadagidiay nga aldaw,” kuna ni Jehova.+ “Saandanton a kunaen, ‘Ti lakasa ti tulag ni Jehova!’+ ket saanto met a tumpuar dayta iti puso, saandanto met a malagip dayta+ wenno uray sapulsapulen dayta, ket saanton a maaramid dayta. 17  Iti dayta a tiempo awagandanto ti Jerusalem iti trono ni Jehova;+ ket amin dagiti nasion masapul a mapagkaykaysa+ kenkuana maipaay iti nagan ni Jehova idiay Jerusalem,+ ket saandanton a sumurot iti kinasungit ti dakes a pusoda.”+ 18  “Kadagidiay nga aldaw magnadanto, ti balay ti Juda a kaassibay ti balay ti Israel,+ ket sangsangkamaysa+ a rummuardanto manipud iti daga ti amianan a mapan iti daga nga intedko kas maysa a patawid a sanikua kadagidi ammayo.+ 19  Ket kinunak, ‘O anian ta insaadka iti tengnga ti annak ken impaayko kenka ti makaay-ayo a daga,+ ti pagtatawidan a sanikua ti arkos ti buybuyot dagiti nasion!’ Ket kinunak pay, ‘“Amak!”+ isu ti iyawagyonto kaniak, ket manipud isusurot kaniak saankayto nga agtallikud.’ 20  ‘Pudno unay kas iti maysa nga asawa a babai a sigugulib a pimmanaw iti kaduana,+ kasta, O balay ti Israel, ti pannakilangenyo a sigugulib kaniak,’+ kuna ni Jehova.” 21  Kadagiti naasak-asak a dana adda nangngegan nga uni, ti panagsangit, ti panagpakpakaasi ti annak ti Israel. Ta tiniritirda ti dalanda;+ linipatda ni Jehova a Diosda.+ 22  “Agsublikayo, dakayo a managlikud nga annak.+ Paimbagekto ti managlikud a kasasaadyo.”+ “Adtoykami! Immaykami kenka, ta sika, O Jehova, ti Diosmi.+ 23  Pudno unay a dagiti turod kasta met ti bellaak iti bambantay+ ket kinaulbod.+ Pudno unay nga adda ken Jehova a Diosmi ti pakaisalakanan ti Israel.+ 24  Ngem ti met laeng nakababain a banag+ inibusna ti nagbannogan dagidi ammami manipud iti kinaagtutubomi, dagiti arbanda ken dagiti pangenda, ti annakda a lallaki ken ti annakda a babbai. 25  Agiddakami iti bainmi,+ ket ti pannakaipababami agtultuloy a mangabbong kadakami;+ ta ken Jehova a Diosmi a nagbasolkami,+ dakami ken dagiti ammami manipud pay kinaagtutubomi agingga itoy nga aldaw,+ ket saankami a nagtulnog iti timek ni Jehova a Diosmi.”+

Footnotes