Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Jeremias 29:1-32

29  Ket dagitoy ti sasao ti surat nga impatulod ni Jeremias a mammadto manipud Jerusalem kadagiti nabatbati iti lallakay ti naidestiero nga umili ken iti papadi ken kadagiti mammadto ken kadagiti amin nga umili, nga impan ni Nabucodonosor iti pannakaidestiero manipud Jerusalem agingga idiay Babilonia,+  kalpasan a ni Jeconias+ nga ari ken ti ina a reyna+ ken dagiti opisial ti palasio, dagiti prinsipe ti Juda ken Jerusalem,+ ken dagiti nasigo a trabahador ken dagiti managibangon kadagiti baluarte+ nakaruarda manipud Jerusalem.  Babaen idi iti ima ni Elasa nga anak ni Safan+ ken ni Gemarias nga anak ni Hilkias, nga imbaon ni Zedekias+ nga ari ti Juda idiay Babilonia ken ni Nabucodonosor nga ari ti Babilonia, a kinunana:  “Daytoy ti kinuna ni Jehova ti buybuyot, ti Dios ti Israel, kadagiti amin a naidestiero nga umili, a pinaidestierok+ manipud Jerusalem agingga idiay Babilonia,  ‘Agibangonkayo kadagiti balay ket pagnaedanyo ida, ket agmulakayo kadagiti minuyongan ket kanenyo ti bungada.+  Mangalakayo iti assawa a babbai ket agbalinkayo nga amma iti annak a lallaki ken annak a babbai;+ ket ti bukodyo nga annak a lallaki iyalaanyo iti assawa ket ti bukodyo nga annak a babbai itedyo iti assawa a lallaki, tapno mangipasngayda iti annak a lallaki ken annak a babbai; ket umadukayo sadiay, ket saankayo a bumassit.  Kasta met, sapulenyo ti talna ti siudad a nangidestieruak kadakayo, ket agkararagkayo ken Jehova maigapu iti dayta, ta iti talnana maaddanto ti talna maipaay kadakayo.+  Ta daytoy ti kinuna ni Jehova ti buybuyot, ti Dios ti Israel: “Saandakay koma a maallilaw dagiti mammadtoyo nga adda iti tengngayo ken dagiti managipadlesyo,+ ket dikay imdengan dagiti tagtagainep a tagtagainependa.+  Ta ‘iti kinaulbod nga agipadpadtoda kadakayo iti naganko. Saanko nga imbaon ida,’+ kuna ni Jehova.”’” 10  “Ta daytoy ti kinuna ni Jehova, ‘Maitunos iti pannakatungpal ti pitopulo a tawen iti Babilonia iturongkonto ti asikasok kadakayo,+ ket patalgedakto kadakayo ti naimbag a saok iti panangisublik kadakayo iti daytoy a disso.’+ 11  “‘Ta siak pagaammok unay ti pampanunot a pampanunotek kadakayo,’+ kuna ni Jehova, ‘pampanunot iti talna, ket saan nga iti didigra,+ tapno ipaayankayo iti maysa a masanguanan ken maysa a namnama.+ 12  Ket pudno unay nga awagandakto ken umaykayo ken agkararagkayo kaniak, ket denggenkayto.’+ 13  “‘Ket pudno a sapulendakto ket masarakandak,+ ta birokendakto buyogen ti isuamin a pusoyo.+ 14  Ket bay-akto a mabirokandak,’+ kuna ni Jehova. ‘Ket urnongekto ti bagi dagiti kautiboyo ken ummongenkayto a sangsangkamaysa manipud kadagiti amin a nasion ken manipud kadagiti amin a disso a nangiwarawaraak kadakayo,’+ kuna ni Jehova. ‘Ket isublikayto iti disso a manipud iti dayta impaidestierokayo.’+ 15  “Ngem kinunayo, ‘Ni Jehova nangibangon kadagiti mammadto maipaay kadatayo idiay Babilonia.’ 16  “Ta daytoy ti kinuna ni Jehova iti ari a situtugaw iti trono ni David+ ken kadagiti amin nga umili nga agnanaed iti daytoy a siudad, ti kakabsatyo a saan a rimmuar a naikuyog kadakayo iti pannakaidestiero,+ 17  ‘Daytoy ti kinuna ni Jehova ti buybuyot: “Adtoy ibaonko a maibusor kadakuada ti kampilan,+ ti nakaro a bisin+ ken ti angol,+ ket pagbalinekto ida a kas kadagiti nabusak a higos a saan a mabalin a kanen gapu iti kinadakes.”’+ 18  “‘Ket kamatekto ida iti kampilan, iti nakaro a bisin ken iti angol, ket itedkonto ida kadagiti amin a pagarian ti daga maipaay iti panagkintayeg,+ maipaay a lunod ken maipaay a banag a pagmalangaan ken maipaay a pagsagawisiwan ken maipaay nga umsi iti tengnga dagiti amin a nasion a pudno unay a pangiwarawaraakto kadakuada,+ 19  gapu iti kinapudno a saanda nga inimdengan ti sasaok,’ kuna ni Jehova, ‘nga impatulodko kadakuada babaen kadagiti adipenko a mammadto, a bimmangonak a nasapa ket imbaonko ida.’+ “‘Ngem saankayo nga immimdeng,’+ kuna ni Jehova. 20  “Ket no maipapan kadakayo, denggenyo ti sao ni Jehova, dakayo amin a naidestiero nga umili,+ a pinapanawko manipud Jerusalem nga agturong idiay Babilonia.+ 21  Daytoy ti kinuna ni Jehova ti buybuyot, ti Dios ti Israel, maipapan ken Acab nga anak ni Colaias ken ni Zedekias nga anak ni Maasias, isuda nga agipadpadto kadakayo iti kinaulbod iti bukodko a nagan,+ ‘Adtoy itedko ida iti ima ni Nabucodorosor nga ari ti Babilonia, ket masapul a kabilenna ida iti imatangyo.+ 22  Ket pudno unay a maalanto kadakuada ti maysa a lunod iti biang ti intero a bagi dagiti destiero ti Juda nga adda idiay Babilonia, a kunana: “Ni Jehova pagbalinennaka koma a kas ken Zedekias ken kas ken Acab,+ isuda nga intuno ti ari ti Babilonia iti apuy!”+ 23  gapu iti rason a nagaramidda iti kinakuneng iti Israel,+ ket agtultuloyda a makikamalala iti assawa a babbai dagiti kaduada+ ken itultuloyda a sawen a siuulbod iti bukodko a nagan ti sao a saanko nga imbilin kadakuada.+ “‘“Ket siak Daydiay makaammo ken maysaak a saksi,”+ kuna ni Jehova.’” 24  “Ket kunaemto ken Semaias+ ti Nehelam, 25  ‘Daytoy ti kinuna ni Jehova ti buybuyot, ti Dios ti Israel: “Iti rason nga iti naganmo nangipatulodka iti sursurat+ kadagiti amin nga umili nga adda idiay Jerusalem, ken ni Sofonias+ nga anak ni Maasias, ti padi, ken iti amin a papadi, a kinunam, 26  ‘Ni met laeng Jehova pinagbalinnaka a padi imbes a ni Jehoiada a padi, tapno agbalinka a naindaklan a manangaywan ti balay ni Jehova+ iti asinoman a tao a napagmauyong+ ken agtigtignay a kasla maysa a mammadto, ket masapul nga isu ikabilmo kadagiti tul-ong ken iti pagipitan;+ 27  ita, ngarud, apay a dika binabalaw ni Jeremias ti Anatot,+ nga agtigtignay a kasla maysa a mammadto kadakayo?+ 28  Ta dayta ti makagapu nga isu nagbaon kadakami iti Babilonia, a kunkunana: “Nakapapaut dayta! Agibangonkayo kadagiti balay ket pagnaedanyo ida, ket agmulakayo kadagiti minuyongan ket kanenyo ti bungada,+—”’”’” 29  Ket ni Sofonias+ a padi binasana daytoy a surat kadagiti lapayag ni Jeremias a mammadto. 30  Idin ti sao ni Jehova dimteng ken Jeremias, a kunkunana: 31  “Agbaonka kadagiti amin a naidestiero nga umili,+ a kunaem, ‘Daytoy ti kinuna ni Jehova maipapan ken Semaias ti Nehelam: “Iti rason a ni Semaias nagipadto kadakayo, ngem isu saanko nga imbaon, ket pinadasnakayo a pagtaleken iti kinaulbod,+ 32  gapuna daytoy ti kinuna ni Jehova, ‘Adtoy iturongko ti asikasok ken Semaias+ ti Nehelam ken iti kaputotanna.’+ “‘“‘Isu saanto a maaddaan iti maysa a lalaki nga agnaed iti tengnga daytoy nga ili;+ ket saanto a kumita iti naimbag nga ar-aramidek maipaay iti ilik,’+ kuna ni Jehova, ‘ta isu nagsao iti nalawag nga iyaalsa ken Jehova.’”’”+

Footnotes