Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Jeremias 25:1-38

25  Ti sao a dimteng ken Jeremias maipapan kadagiti amin nga umili ti Juda iti maikapat a tawen ni Jehoiaquim+ nga anak ni Josias, ti ari ti Juda, awan sabali, ti umuna a tawen ni Nabucodorosor nga ari ti Babilonia;  a sinao ni Jeremias a mammadto maipapan kadagiti amin nga umili ti Juda ken maipapan kadagiti amin nga agnanaed iti Jerusalem, a kunkunana:  “Manipud iti maikasangapulo ket tallo a tawen ni Josias+ nga anak ni Amon, ti ari ti Juda, ken agingga itoy nga aldaw, kadagitoy duapulo ket tallo a tawen dimteng kaniak ti sao ni Jehova, ket nagsasaoak kadakayo, a bimmangonak a nasapa ket nagsaoak, ngem saankayo nga immimdeng.+  Ket ni Jehova imbaonna kadakayo dagiti amin nga adipenna a mammadto, a bimmangon a nasapa ket imbaonna ida, ngem saankayo nga immimdeng,+ saanyo met nga inyallingag ti lapayagyo tapno umimdeng,+  a kunkunada, ‘Agbaw-ingkayo, pangngaasiyo, tunggal maysa manipud iti dakes a dalanna ken manipud iti kinadakes dagiti pannakilangenyo,+ ket agtultuloykayo nga agnaed iti rabaw ti daga nga inted ni Jehova kadakayo ken kadagidi ammayo manipud iti nabayagen a tiempo ken agingga iti mabayag a tiempo nga umay.+  Ket dikay sumurot kadagiti sabali a didios tapno agserbikayo kadakuada ken agruknoykayo kadakuada, iti kasta saandak a mapagrurod babaen iti aramid dagiti imayo, ken tapno saanak a mangpataud iti pakadidigraanyo.’+  “‘Ngem dikay immimdeng kaniak,’ kuna ni Jehova, ‘iti panggep a mapagruroddak babaen iti aramid dagiti imayo, maipaay a pakadidigraanyo.’+  “Gapuna daytoy ti kinuna ni Jehova ti buybuyot, ‘“Gapu ta saankayo a nagtulnog iti sasaok,  adtoy agbaonak ket alaekto amin dagiti pamilia iti amianan,”+ kuna ni Jehova, “mismo nga agbaonak ken Nabucodorosor nga ari ti Babilonia, ti adipenko,+ ket iyegkonto ida maibusor iti daytoy a daga+ ken maibusor kadagiti agnanaed iti dayta ken maibusor kadagitoy amin a nasion iti aglikmut;+ ket ipaaykonto ida iti pannakadadael ket pagbalinekto ida a maysa a banag a pagmalangaan ken maysa a banag a sagawisiwan+ ken disdisso a walangwalang agingga iti tiempo a di nakedngan.+ 10  Ket dadaelekto manipud kadakuada ti uni ti panagragsak ken ti uni ti panagrag-o,+ ti timek ti nobio ken ti timek ti nobia,+ ti uni ti paggilingan a pusiposen ti ima+ ken ti lawag ti pagsilawan.+ 11  Ket isuamin daytoy a daga agbalinto a walangwalang a disso, maysa a banag a pagmalangaan, ket dagitoy a nasion kasapulan nga agserbidanto iti ari ti Babilonia iti pitopulo a tawen.”’+ 12  “‘Ket mapasamakto nga inton natungpalen ti pitopulo a tawen+ isingirkonto maibusor iti ari ti Babilonia ken maibusor iti dayta a nasion,’+ kuna ni Jehova, ‘ti biddutda, maibusor a mismo iti daga dagiti Caldeo,+ ket pagbalinekto dayta a langalang a rebrebbek agingga iti tiempo a di nakedngan.+ 13  Ket iti dayta a daga iyegkonto ti amin a sasaok a sinaok maibusor iti dayta, ti met laeng isuamin a naisurat iti daytoy a libro nga impadto ni Jeremias maibusor kadagiti amin a nasion.+ 14  Ta uray isuda, dagiti adu a nasion ken naindaklan nga ar-ari,+ ginundawayanda ida kas ad-adipen;+ ket supapakakto ida maitunos iti aramidda ken maitunos iti aramid dagiti imada.’”+ 15  Ta daytoy ti kinuna kaniak ni Jehova a Dios ti Israel: “Alaem manipud iti imak daytoy a kopa ti arak ti pungtot, ket masapul a painumem iti dayta dagiti amin a nasion a pangibaonak kenka.+ 16  Ket masapul nga uminumda ken aglugayogda ken agtignayda a kasla mauyong a tattao gapu iti kampilan nga ibaonko iti tengngada.”+ 17  Ket innalak ti kopa manipud iti ima ni Jehova ket pinainumko dagiti amin a nasion a nangibaonan kaniak ni Jehova:+ 18  awan sabali, ti Jerusalem ken dagiti siudad ti Juda ken ti ar-arina, dagiti prinsipena, tapno pagbalinen ida a walangwalang a disso, maysa a banag a pagmalangaan,+ maysa a banag a sagawisiwan ken maysa a lunod, kas iti daytoy nga aldaw;+ 19  ni Faraon nga ari ti Egipto ken dagiti adipenna ken dagiti prinsipena ken amin dagiti umilina;+ 20  ken ti isuamin a naglalaok a bunggoy, ken ti amin nga ar-ari ti daga ti Uz,+ ken ti amin nga ar-ari ti daga dagiti Filisteo+ ken Ascalon+ ken Gaza+ ken Ekron+ ken ti natda ti Asdod;+ 21  ti Edom+ ken Moab+ ken ti annak ti Ammon;+ 22  ken ti amin nga ar-ari ti Tiro+ ken ti amin nga ar-ari ti Sidon+ ken ti ar-ari ti isla nga adda iti rehion ti baybay; 23  ken ti Dedan+ ken ti Tema+ ken ti Buz ken amin dagidiay naputdan ti buokda kadagiti pispis;+ 24  ken ti amin nga ar-ari dagiti Arabo+ ken ti amin nga ar-ari ti naglalaok a bunggoy nga agtataeng iti let-ang; 25  ken ti amin nga ar-ari ti Zimri ken ti amin nga ar-ari ti Elam+ ken ti amin nga ar-ari dagiti Medo;+ 26  ken ti amin nga ar-ari iti amianan nga adda iti asideg ken adayo, ti maysa kalpasan ti sabali, ken amin dagiti sabsabali a pagarian ti daga nga adda iti rabaw ti daga; ket ti met laeng ari ti Sesac+ uminumto iti kalpasanda. 27  “Ket masapul a kunaem kadakuada, ‘Daytoy ti kinuna ni Jehova ti buybuyot, ti Dios ti Israel: “Uminumkayo ket mabartekkayo ken agbakuarkayo ken mapasagkayo iti kasta saankayo a makabangon+ gapu iti kampilan nga ibaonko iti tengngayo.”’+ 28  Ket mapasamakto a no kas pagarigan agkitakitda a mangala iti kopa manipud iti imam tapno uminumda, masapul a kunaem met kadakuada, ‘Daytoy ti kinuna ni Jehova ti buybuyot: “Uminumkayto a di bumurong.+ 29  Ta, adtoy! iti siudad a nakayawagan ti naganko ti pangrugiak a mangipagteng iti didigra,+ ket rebbeng kadi a dakayo iti aniaman a pamay-an siwayawayakayo iti pannakadusa?”’+ “‘Saankayto a mawayawayaan iti pannakadusa, ta adda kampilan nga awagak maibusor kadagiti amin nga agnanaed iti daga,’ kuna ni Jehova ti buybuyot. 30  “Ket no maipapan kenka, ipadtomto kadakuada dagitoy amin a sasao, ket masapul a kunaem kadakuada, ‘Manipud iti ngato agungorto a mismo ni Jehova,+ ket manipud iti nasantuan a pagnaedanna iyesngawnanto ti timekna.+ Di bumurong nga isu agungorto iti disso a pagyananna. Maysa a pukkaw a kas iti pukkaw dagidiay agibadbaddek iti pagpespesan iti ubas iyikkisnanto maibusor kadagiti amin nga agnanaed iti daga.’+ 31  “‘Maysa a daranudor ti sigurado nga umayto agingga iti kaadaywan a paset ti daga, ta ni Jehova addaan iti pannakisubang kadagiti nasion.+ Isu isaadnanto ti bagina iti panangukom iti isuamin a lasag.+ No maipapan kadagidiay nadangkes, iyawatnanto ida iti kampilan,’+ kuna ni Jehova. 32  “Daytoy ti kinuna ni Jehova ti buybuyot, ‘Adtoy! Ti maysa a didigra rummuar manipud iti nasion agingga iti nasion,+ ket ti met laeng nadawel a bagyo maibangonto manipud kadagiti kaadaywan a paset ti daga.+ 33  Ket dagidiay pinapatay ni Jehova pudno unay a maaddanto iti dayta nga aldaw manipud iti maysa nga ungto ti daga agingga iti sabali nga ungto ti daga.+ Saandanto a madung-awan, saandanto met a maurnong wenno maitabon.+ Agbalindanto a kas ganagan iti rabaw ti daga.’+ 34  “Aganug-ogkayo, dakayo a papastor, ket umkiskayo!+ Ket agilad-iladkayo,+ dakayo a nadadaeg iti arban,+ agsipud ta dagiti aldaw ti pannakagudasyo ken dagiti pannakaiwarawarayo natungpalen,+ ket matnagkayto a kas iti maysa a makaay-ayo a basehas!+ 35  Ket ti maysa a disso a pagkamangan napukaw kadagiti pastor, ket ti maysa a pamay-an ti panagtalaw napukaw kadagidiay nadaeg iti arban.+ 36  Imdenganyo! Ti ikkis dagiti pastor, ken ti panaganug-og dagidiay nadaeg iti arban, ta ni Jehova ag-agawanna dagiti pagpaarabanda. 37  Ket dagiti natalna a disso a pagyanan napagbalinda nga awanan biag gapu iti sumsumged nga unget ni Jehova.+ 38  Pinanawanna ti talimengna a kas iti burboran a bumaro a leon,+ ta ti dagada nagbalin a maysa a banag a pagmalangaan gapu iti mangirurumen a kampilan ken gapu iti sumsumged nga ungetna.”+

Footnotes