Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Jeremias 23:1-40

23  “Asi pay dagiti pastor a mangdaddadael ken mangiwarawara kadagiti karnero iti pagpaarabak!”+ kuna ni Jehova.  Gapuna daytoy ti kinuna ni Jehova a Dios ti Israel maibusor kadagiti pastor a mangipaspastor iti ilik: “Dakayo pinagwarawarayo dagiti karnerok; ket agtultuloy nga inwarawarayo ida, ket saanyo nga inturong ti asikasoyo kadakuada.”+ “Adtoy iturongko ti asikasok kadakayo gapu iti kinadakes dagiti pannakilangenyo,”+ kuna ni Jehova.  “Ket ummongekto a sangsangkamaysa ti natda kadagiti karnerok manipud kadagiti amin a daga a nangiwarawaraak kadakuada,+ ket isublikto ida iti pagarabanda,+ ket sigurado nga agbalindanto a nabunga ken umaduda.+  Ket mangibangonakto kadakuada iti papastor a pudno a mangipastorto kadakuada;+ ket saandanton nga agbuteng, saandanto met a makabil iti aniaman a panagaligaget,+ ket awanto ti mapukpukaw,” kuna ni Jehova.  “Adtoy! Adda um-umayen nga al-aldaw,” kuna ni Jehova, “ket mangibangonakto ken David iti nalinteg a tarubong.+ Ket maysa nga ari ti sigurado nga agturayto+ ken agtignay a buyogen ti kinamasirib ken mangipakat iti kinahustisia ken kinalinteg iti daga.+  Kadagiti aldawna maisalakanto ti Juda,+ ket ti met laeng Israel agtaengto a sitatalged.+ Ket daytoy ti naganna a mayawagto kenkuana, Ni Jehova Isu ti Kinalintegtayo.”+  “Gapuna, adtoy! adda um-umayen nga al-aldaw,” kuna ni Jehova, “ket saandanton a kunaen, ‘Sibibiag ni Jehova a nangaon iti annak ti Israel iti daga ti Egipto,’+  no di ket, ‘Sibibiag ni Jehova a nangaon ken nangiserrek iti kaputotan ti balay ti Israel manipud iti daga ti amianan ken manipud iti amin a dagdaga a nangiwaraak kadakuada,’ ket pudno unay nga agnaeddanto iti bukodda a daga.”+  No maipapan kadagiti mammadto, ti pusok nadunor iti unegko. Amin dagiti tulangko nangrugida nga agkutukot. Nagbalinak a kas iti maysa a lalaki a nabartek,+ ken kas iti maysa a nabaneg a lalaki a pinarmek ti arak, gapu ken Jehova ken gapu iti nasantuan a sasaona. 10  Ta ti daga napno+ kadagiti mannakikamalala.+ Ta gapu iti lunod napagleddaang ti daga,+ nagmaga dagiti pagpaaraban iti let-ang;+ ket dakes ti turongen ti panagtignayda, ken saan nga umiso ti kinamannakabalinda. 11  “Ta ti met laeng mammadto ken ti padi agpadpadada a narugitan.+ Kasta met iti bukodko a balay nasarakak ti kinadakesda,”+ kuna ni Jehova. 12  “Gapuna ti dalanda agbalinto kadakuada a kas kadagiti nagalis a disso+ iti daguyemyem, a pakaiduronandanto ket sigurado a matnagda.”+ “Ta mangipagtengakto kadakuada iti didigra, ti tawen ti pannakaasikasoda,”+ kuna ni Jehova. 13  “Ket kadagiti mammadto ti Samaria+ nakakitaak iti di kinaumiso. Nagakemda a kas mammadto a ginargari ni Baal,+ ket itultuloyda a pagallaallaen ti ilik, ti mismo nga Israel.+ 14  Ket kadagiti mammadto ti Jerusalem nakakitaak iti nakaal-alingget a bambanag,+ pannakikamalala+ ken pannagna iti kinaulbod;+ ket pinapigsada ti im-ima dagiti managaramid iti dakes tapno saanda koma nga agsubli,+ tunggal maysa manipud iti bukodna a kinadakes. Kaniak nagbalinda amin a kas iti Sodoma,+ ket dagiti agnanaed kenkuana kas iti Gomorra.”+ 15  Gapuna daytoy ti kinuna ni Jehova ti buybuyot maibusor kadagiti mammadto: “Adtoy pakanek ida iti ajenjo, ket ikkakto ida iti nasabidongan a danum nga inumen.+ Ta manipud kadagiti mammadto ti Jerusalem nagwaras ti apostasia+ iti intero a daga.” 16  Daytoy ti kinuna ni Jehova ti buybuyot: “Dikay imdengan ti sasao dagiti mammadto nga agipadpadto kadakayo.+ Pagbalbalinendakayo nga ubbaw.+ Ti sirmata ti bukodda a puso isu ti sawenda+—saan nga aggapu iti ngiwat ni Jehova.+ 17  Maulit-ulit a kunkunaenda kadagidiay awanan panagraem kaniak, ‘Sinao ni Jehova: “Talna ti maaddanto kadakayo.”’+ Ket iti tunggal maysa a magmagna iti kinasungit ti pusona+ kinunada, ‘Awanto ti didigra a dumteng kadakayo.’+ 18  Ta siasino ti nagtakder iti nasinged+ a bunggoy ni Jehova tapno makita ken mangngegna ti saona?+ Siasino ti nangipangag iti saona tapno mangngegna dayta?+ 19  Adtoy! Ti allawig ni Jehova, ti met laeng pungtot, sigurado a rummuarto, ti mismo nga agal-alipuno a nadawel a bagyo.+ Iti rabaw ti ulo dagidiay nadangkes agalipunonto a mismo dayta.+ 20  Ti unget ni Jehova saanto nga agbaw-ing agingga a naitungpalnanton+ ken agingga a napagbalinnanton a pudno dagiti kapanunotan ti pusona.+ Iti kamaudianan a paset dagiti aldaw utobenyonto dayta buyogen ti pannakaawat.+ 21  “Saanko nga imbaon dagiti mammadto, kaskasdi nga isuda nagtarayda. Saanak a nagsao kadakuada, kaskasdi nga isuda nagipadtoda.+ 22  Ngem no nagtakderda koma iti nasinged+ a bunggoyko, iti kasta pinagdengngegda koma ti ilik iti bukodko a sasao, ket pinagbaw-ingda koma ida manipud iti dakes a dalanda ken manipud iti kinadakes dagiti pannakilangenda.”+ 23  “Maysaak aya a Dios iti asideg,” kuna ni Jehova, “ket saan a Dios iti adayo?”+ 24  “Wenno ti asinoman a tao mabalin aya a mailemmeng kadagiti lugar a paglemmengan ket saanko a makita?”+ kuna ni Jehova. “Saan aya a ti langlangit ken ti daga ti punnuek a mismo?”+ kuna ni Jehova. 25  “Nangngegko ti kinuna dagiti mammadto nga agipadpadto iti kinaulbod iti bukodko a nagan,+ a kunkunada, ‘Naaddaanak iti tagtagainep! Naaddaanak iti tagtagainep!’+ 26  Kasano kabayag nga addanto dayta iti puso dagiti mammadto nga agipadpadto iti kinaulbod ken isuda a mammadto ti kinaallilaw ti bukodda a puso?+ 27  Pampanunotenda nga ipalipat iti ilik ti naganko babaen kadagiti tagtagainepda nga isalsalaysayda tunggal maysa iti sabali,+ no kasano a dagiti ammada linipatanda ti naganko babaen ken Baal.+ 28  Ti mammadto nga addaan tagtagainep, isalaysayna koma ti tagtagainep; ngem daydiay a kenkuana adda ti bukodko a sao, sawenna koma a sipupudno ti saok.”+ “Ania ti pakainaigan ti garami iti bukel?”+ kuna ni Jehova. 29  “Saan aya a ti saok mayasping unay iti apuy,”+ kuna ni Jehova, “ken kas iti pagpanday a martilio a mangburak iti napasdok a bato?”+ 30  “Gapuna adtoy bumusorak kadagiti mammadto,”+ kuna ni Jehova, “dagidiay mangtaktakaw iti sasaok, tunggal maysa manipud iti kaduana.”+ 31  “Adtoy bumusorak kadagiti mammadto,” kuna ni Jehova, “dagidiay a mangar-aramat kadagiti dilada tapno mayebkasda ti, ‘Maysa a sao!’”+ 32  “Adtoy bumusorak kadagiti mammadto kadagiti ulbod a tagtagainep,” kuna ni Jehova, “isuda a mangisalaysay kadakuada ken mamagallaalla iti ilik gapu kadagiti kinaulbodda+ ken gapu iti panagpasindayagda.”+ “Ngem saanko nga imbaon ida wenno binilin ida. Gapuna saandanto a pulos magunggonaan daytoy nga ili,”+ kuna ni Jehova. 33  “Ket no daytoy nga ili wenno ti mammadto wenno padi agimtuod kenka, a kunkunana, ‘Ania ti dadagsen ni Jehova?’+ masapul a kunaem met kadakuada, ‘“Dakayo a tattao—O anian a dadagsen!+ Ket pudno unay a baybay-ankayto,”+ kuna ni Jehova.’ 34  No maipapan iti mammadto wenno iti padi wenno kadagiti umili nga agkuna, ‘Ti dadagsen ni Jehova!’ iturongkonto met ti asikasok iti dayta a tao ken iti sangakabbalayanna.+ 35  Daytoy ti agtultuloy a kunaenyo tunggal maysa iti kaduana ken tunggal maysa iti kabsatna, ‘Ania ti insungbat ni Jehova? Ket ania ti sinao ni Jehova?’+ 36  Ngem ti dadagsen+ ni Jehova saanyon a dakamaten,+ ta ti met laeng dadagsen agbalin a bukod a sao ti tunggal maysa,+ ket binaliwanyo ti sasao ti sibibiag a Dios,+ ni Jehova ti buybuyot, a Diostayo. 37  “Daytoy ti kunaemto iti mammadto, ‘Ania ti insungbat kenka ni Jehova? Ket ania ti sinao ni Jehova?+ 38  Ket no “Ti dadagsen ni Jehova!” isu ti agtultuloy a sawenyo, gapuna daytoy ti kinuna ni Jehova: “Gapu iti panagkunayo, ‘Daytoy a sao isu ti mismo a dadagsen ni Jehova,’ idinto ta nagbabaonak kadakayo, a kinunak, ‘Dikay kunaen: “Ti dadagsen ni Jehova!”’ 39  gapuna adtoyak! Ket liwayankayto, buyogen ti kinasigurado,+ ket panawankayto ken ti siudad nga intedko kadakayo ken kadagidi ammayo—manipud iti sanguanak.+ 40  Ket mangikabilakto kadakayo iti umsi agingga iti tiempo a di nakedngan ken pannakaipababa agingga iti tiempo a di nakedngan, a saanto a malipatan.”’”+

Footnotes