Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Jeremias 22:1-30

22  Daytoy ti kinuna ni Jehova: “Sumalogka iti balay ti ari ti Juda, ket masapul a sawem sadiay daytoy a sao.  Ket kunaem, ‘Denggem ti sao ni Jehova, O ari ti Juda a situtugaw iti trono ni David,+ sika agraman dagiti adipenmo ken ti ilim, dagidiay sumsumrek kadagitoy a ruangan.+  Daytoy ti kinuna ni Jehova: “Aramidenyo ti kinahustisia ken kinalinteg, ket daydiay mataktakawan ispalenyo iti ima ti manangsaur; ket saanyo nga irurumen ti asinoman a ganggannaet nga agnanaed, awan amana nga ubing wenno balo a babai.+ Saanyo a ranggasan ida.+ Ket dikay mangibukbok iti aniaman nga awanan basol a dara iti daytoy a disso.+  Ta no siguraduenyo nga aramiden daytoy a sao, pudno unay a kadagiti ruangan daytoy a balay addanto met sumrek nga ar-ari nga agtugtugaw maipaay ken David iti tronona,+ a nakasakayda kadagiti karuahe ken kabkabalio, isu agraman dagiti adipenna ken ti ilina.”’+  “‘Ngem no dikayto agtulnog kadagitoy a sasao, babaen kaniak a mismo isapatak,’+ kuna ni Jehova, ‘a daytoy a balay agbalinto laengen a walangwalang a disso.’+  “Ta daytoy ti kinuna ni Jehova maipapan iti balay ti ari ti Juda, ‘Kaslaka iti Galaad kaniak, ti ulo ti Libano.+ Maipasigurado a pagbalinenkanto a maysa a let-ang;+ no maipapan kadagiti siudad, awan maysa a mapagnaedanto.+  Ket santipikarekto a maibusor kenka dagidiay mangdaddadael,+ tunggal maysa ken dagiti igamna;+ ket masapul a pukanenda ti kasayaatan kadagiti sedrom+ ket pagtinnagenda ida iti apuy.+  Ket adu a nasion pudno a lumabasdanto iti daytoy a siudad ket kunaenda ti maysa iti sabali: “Ania ti makagapu nga inaramid ni Jehova ti kastoy iti daytoy dakkel a siudad?”+  Ket kasapulan a kunaendanto: “Maigapu iti kinapudno a pinanawanda ti tulag ni Jehova a Diosda+ ket nagruknoyda kadagiti sabali a didios ken nagserbida kadakuada.”’+ 10  “Dikay sangitan daydiay natay,+ ket dikay makipagrikna kenkuana. Sangitanyo unay daydiay pumanaw, ta saanton nga agsubli ket pudno a saannanto a makita ti daga dagiti kabagianna. 11  Ta daytoy ti kinuna ni Jehova maipapan ken Sallum+ nga anak ni Josias, ti ari ti Juda nga agturturay imbes a ni Josias nga amana,+ a rimmuar manipud iti daytoy a disso, ‘Saanton nga agsubli sadiay. 12  Ta iti disso a nangidestieruanda kenkuana isu matayto, ket daytoy a daga saannanton a makita.’+ 13  “Asi pay daydiay mangibangon iti balayna,+ ngem saan a buyogen ti kinalinteg, ken kadagiti makinngato a siledna, ngem saan a buyogen ti kinahustisia, babaen ti panangusar iti padana a tao nga agserbi nga awan aniamanna, ket dagiti tangdanna saanna nga ited kenkuana;+ 14  daydiay agkunkuna, ‘Ibangonak ti bagik iti nalawa a balay ken iti adu ti malaonna a makinngato a silsiled;+ ket dagiti tawak masapul a mapalawa maipaay iti dayta, ket ti didingna addaanto iti sedro+ ken mapulagidan iti bermelion.’+ 15  Agtultuloykanto aya nga agturay agsipud ta makisinsinnalisalka babaen ti panagusar iti sedro? No maipapan ken amam, saan kadi a nangan ken imminum ken nangipakat iti kinahustisia ken kinalinteg?+ Iti dayta a kasasaad naglak-am iti naimbag.+ 16  Inrupirna ti legal a dawat daydiay naparigatan ken daydiay napanglaw.+ Iti dayta a kasasaad naimbag idi. ‘Saan kadi a maysa dayta a kasasaad a panangammo kaniak?’ kuna ni Jehova. 17  ‘Maipasigurado a dagiti matam ken ti pusom addada laeng iti nakillo a gunggonam,+ ken iti dara daydiay awanan basol tapno ibukbokmo dayta,+ ken iti panagsaur ken iti panagbirkog tapno itultuloymo nga aramiden ida.’ 18  “Gapuna daytoy ti kinuna ni Jehova maipapan ken Jehoiaquim+ nga anak ni Josias, ti ari ti Juda, ‘Saandanto nga idung-aw kenkuana: “Ay, kabsatko a lalaki! Ken ay, kabsatko a babai!” Saandanto nga idung-aw kenkuana: “Ay, O apok! Ken ay, ti dayawna!”+ 19  Iti pannakaitabon ti maysa nga asno isu maitabonto,+ buyogen ti pannakaiguyodguyod ken pannakaipalladaw, iti labes dagiti ruangan ti Jerusalem.’+ 20  “Sumang-atka agingga iti Libano+ ket agpukkawka, ket iti Basan+ iyesngawmo ti timekmo. Ket agpukkawka manipud Abarim,+ agsipud ta amin dagidiay nasged a mangay-ayat kenka nadadaelda.+ 21  Nagsaoak kenka bayat ti kinawayawayam iti panagdanag.+ Kinunam, ‘Saanakto nga agtulnog.’+ Daytoy idin ti wagasmo manipud iti kinaagtutubom, ta saanka a nagtulnog iti timekko.+ 22  Ti maysa nga angin ipastorannanto amin a bukodmo a papastor;+ ket no maipapan kadagidiay nasged a mangay-ayat kenka, mapandanto iti mismo a pannakakautibo.+ Ta iti dayta a tiempo mabainankanto ket pudno unay a mariknamto ti pannakaipababa gapu iti isuamin a didigram.+ 23  O sika nga agnanaed iti Libano,+ a nayumok kadagiti sedro,+ anian ti sigurado a panagsennaaymonto inton dumteng kenka dagiti ut-ot iti panaganak,+ dagiti panagpasikal a kas kadagiti panagpasikal ti maysa a babai nga agpaspasngay!”+ 24  “‘Kas sibibiagak,’ kuna ni Jehova, ‘uray pay no ni Conias+ nga anak ni Jehoiaquim,+ ti ari ti Juda, nagbalin koma a pangselio a singsing+ iti makannawan nga imak, manipud sadiay uksotenkanto!+ 25  Ket iyawatkanto iti ima dagidiay mangsapsapul iti kararuam+ ken iti ima dagidiay kaamakmo ken iti ima ni Nabucodorosor nga ari ti Babilonia ken iti ima dagiti Caldeo.+ 26  Ket sika ken ti inam+ a nangipasngay kenka ipuruakkonto iti sabali a daga a saanyo a nakayanakan, ket sadiay ti pakatayanyonto.+ 27  Ket iti daga a tartarigagayan unay ti kararuada a pagsublian, sadiay saandanto nga agsubli.+ 28  Daytoy kadi a lalaki a Conias+ sukog laeng a naumsi, naburak,+ wenno maysa a basehas a saan a pakaragsakan?+ Apay nga isu ken ti kaputotanna masapul a maipuruak ken maipalladaw iti daga a saanda a naammuan?’+ 29  “O daga, daga, daga, denggem ti sao ni Jehova.+ 30  Daytoy ti kinuna ni Jehova, ‘Isuratyo daytoy a lalaki kas awanan putot,+ kas nabaneg a lalaki nga awananto iti aniaman a balligi kadagiti aldawna; ta manipud iti kaputotanna awan uray maysa ti maaddaanto iti aniaman a balligi,+ iti panagtugaw iti trono ni David+ ken iti panagturay uray kaanoman iti Juda.’”

Footnotes