Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Jeremias 21:1-14

21  Ti sao+ a dimteng ken Jeremias manipud ken Jehova, idi a ni Ari Zedekias+ imbaonna kenkuana ni Pasur+ nga anak ni Malkias ken ni Sofonias+ nga anak ni Maasias, ti padi, a kunkunana:  “Pangngaasim ta agimtuodka ken Jehova maigapu kadakami,+ agsipud ta ni Nabucodorosor nga ari ti Babilonia makigubgubat kadakami.+ Bareng aramiden kadakami ni Jehova ti maitunos iti amin a nakaskasdaaw nga ar-aramidna, iti kasta isu pumanawto kadakami.”+  Ket ni Jeremias kinunana kadakuada: “Daytoy ti kunaenyonto ken Zedekias,  ‘Daytoy ti kinuna ni Jehova a Dios ti Israel: “Adtoy pagbaw-ingek nga agsubli dagiti igam ti gubat nga adda iti imayo, isuda a pakiruprupakyo iti ari ti Babilonia,+ ken kadagiti Caldeo+ a manglaklakub maibusor kadakayo iti ruar ti pader, ket ummongekto ida iti tengnga daytoy a siudad.+  Ket siak makirupakakto kadakayo+ babaen ti siuunnat nga ima ken babaen ti napigsa a takiag ken buyogen ti unget ken buyogen ti pungtot ken buyogen ti dakkel a rurod.+  Ket kabilekto dagiti agnanaed iti daytoy a siudad, agpadpada ti tao ken animal. Babaen ti dakkel nga angol mataydanto.”’+  “‘“Ket kalpasan dayta,” kuna ni Jehova, “iyawatkonto ni Zedekias nga ari ti Juda ken dagiti adipenna ken dagiti umili ken dagidiay matedda iti daytoy a siudad manipud iti angol, manipud iti kampilan ken manipud iti nakaro a bisin, iti ima ni Nabucodorosor nga ari ti Babilonia, iti mismo nga ima dagiti kabusorda ken iti ima dagidiay mangsapsapul iti kararuada, ket pudno unay a kabilennanto ida babaen iti tadem ti kampilan.+ Saanto a maay-ay kadakuada, saanto met a mangipakita iti panangngaasi wenno maaddaan iti aniaman nga asi.”’+  “Ket kunaemto iti daytoy nga ili, ‘Daytoy ti kinuna ni Jehova: “Adtoy ikabilko iti sanguananyo ti dalan ti biag ken ti dalan ni patay.+  Daydiay agtugtugaw a sitatalna iti daytoy a siudad matayto babaen iti kampilan ken iti nakaro a bisin ken iti angol;+ ngem daydiay rummuar ken pudno a kumappon kadagiti Caldeo a manglaklakub maibusor kadakayo agtultuloyto nga agbiag, ket ti kararuana pudno unay nga agbalinto a kukuana a kas samsam.”’+ 10  “‘“Ta inturongko ti rupak maibusor iti daytoy a siudad maipaay iti didigra ket saan a maipaay iti pagimbagan,”+ kuna ni Jehova. “Maitedto iti ima ti ari ti Babilonia,+ ket sigurado a puorannanto dayta iti apuy.”+ 11  “‘Ket no maipapan iti sangakabbalayan ti ari ti Juda, denggenyo, O tattao, ti sao ni Jehova.+ 12  O balay ni David,+ daytoy ti kinuna ni Jehova: “Tunggal bigat+ mangipaayka iti sentensia a buyogen ti hustisia,+ ket daydiay mataktakawan ispalem iti ima ti manangsaur,+ tapno ti pungtotko saan koma a rummuar a kas iti apuy+ ket pudno a sumged ket awan ti makaiddep iti dayta gapu iti kinadakes dagiti pannakilangenyo.”’+ 13  “‘Adtoy bumusorak kenka, O babai nga agnanaed iti nababa a tanap,+ O bato iti nalantag a daga,’ kuna ni Jehova. ‘No maipapan kadakayo nga agkunkuna: “Siasinonto ti bumaba a bumusor kadatayo? Ket siasinonto ti sumrek kadagiti pagnaedantayo?”+ 14  makikuentaakto met maibusor kadakayo+ maitunos iti bunga dagiti pannakilangenyo,’+ kuna ni Jehova. ‘Ket paggayebgebekto ti maysa nga apuy iti bakirna,+ ket sigurado nga alun-onennanto ti amin a bambanag iti aglikmutna.’”+

Footnotes