Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Jeremias 18:1-23

18  Ti sao a dimteng ken Jeremias manipud ken Jehova, kunkunana:  “Tumakderka, ket masapul a sumalogka a mapan iti balay ti agdamdamili,+ ket sadiay ipangngegkonto kenka ti sasaok.”  Ket simmalogak a mapan iti balay ti agdamdamili, ket sadiay agtartrabaho idi iti rabaw dagiti pilid ti agdamdamili.  Ket ti basehas nga ar-aramidenna iti pila nadadael babaen iti ima ti agdamdamili, ket isu nagsubli ket pinagbalinna dayta a sabali a basehas, kas iti agparang nga umiso kadagiti mata ti agdamdamili nga aramiden.+  Ket ti sao ni Jehova nagtultuloy a dimteng kaniak, a kunkunana:  “‘Saanko kadi a kabaelan nga aramiden kadakayo ti kas iti daytoy nga agdamdamili, O balay ti Israel?’ kuna ni Jehova. ‘Adtoy! Kas iti pila iti ima ti agdamdamili, kastakayo met iti imak, O balay ti Israel.+  Iti aniaman a kanito a panagsaok maibusor iti maysa a nasion ken maibusor iti maysa a pagarian a parutek dayta ken rugpuek ken dadaelek,+  ket dayta a nasion pudno nga agbaw-ing manipud iti kinadakesna a maibusor iti dayta nagsaoak,+ pagladingitakto met ti didigra a pinanunotko nga ipakat iti dayta.+  Ngem iti aniaman a kanito a panagsaok maipapan iti maysa a nasion ken maipapan iti maysa a pagarian a bangonek dayta ken imulak,+ 10  ket pudno nga aramidenna no ania ti dakes kadagiti matak babaen ti saan a panagtulnog iti timekko,+ pagladingitakto met ti naimbag a sinaok iti bagik nga aramidek maipaay iti pagimbaganna.’ 11  “Ket ita sawem, pangngaasim, kadagiti tattao ti Juda ken kadagiti agnanaed iti Jerusalem, ‘Daytoy ti kinuna ni Jehova: “Adtoy mangbukbukelak maibusor kadakayo iti maysa a didigra ken mangpampanunotak maibusor kadakayo iti maysa a kapanunotan.+ Agbaw-ingkayo, pangngaasiyo, tunggal maysa manipud iti dakes a dalanna, ket pasayaatenyo ti daldalanyo ken dagiti pannakilangenyo.”’”+ 12  Ket kinunada: “Awan pangnamnamaan!+ Ta magnakamto a sumurot kadagiti bukodmi a kapanunotan, ket itungpalmi tunggal maysa ti kinasungit ti dakes a pusona.”+ 13  Gapuna daytoy ti kinuna ni Jehova: “Agimtuodkayo maipaay iti bagbagiyo, pangngaasiyo, iti tengnga dagiti nasion. Siasino ti nakangngeg iti bambanag a kas kadagitoy? Ti birhen ti Israel adda nakaal-alingget a banag nga inaramidna iti nakalablabes.+ 14  Pumanawto kadi ti niebe ti Libano manipud iti bato ti nawayang a tay-ak? Wenno agmaganto kadi ti karkarna a dandanum, nalamiis, agar-aruyot? 15  Ta ti ilik linipatannak+ iti panangpataudda iti asuk a sakripisio iti maysa a banag nga awan pategna,+ ken iti panangitibkolda kadagiti tattao iti daldalanda,+ dagiti dana ti nabayagen a tiempo,+ tapno magnada kadagiti dana, maysa a dalan a saan a nagaburan, 16  tapno pagbalinenda ti dagada a maysa a banag a pagmalangaan,+ a pagsagawisiwan agingga iti tiempo a di nakedngan.+ Ti tunggal maudi a lumabas iti dayta agmulagatto a simamalanga ket iwingiwingna ti ulona.+ 17  Kas babaen ti wayaway nga angin iwarawarakto ida iti sanguanan ti kabusor.+ Ti bukot, ket saan a ti rupa,+ ipakitakto kadakuada iti aldaw ti pannakadidigrada.” 18  Ket kinunada: “Umaykayo, ket mangpanunottayo iti sumagmamano a kapanunotan maibusor ken Jeremias,+ ta ti linteg saanto a mapukaw manipud iti padi+ wenno pammatigmaan manipud iti daydiay masirib wenno ti sao manipud iti mammadto.+ Umaykayo ket isu kabilentayo babaen ti dila,+ ket saantayo nga ipangag ti aniaman kadagiti saona.” 19  Ipangagnak, O Jehova, ket imdengam ti timek dagiti kabusorko.+ 20  Rebbeng aya a ti dakes maisupapak iti naimbag?+ Ta nangkalida iti abut maipaay iti kararuak.+ Lagipem ti panagtakderko iti sanguanam tapno agsaoak iti naimbag maipapan a mismo kadakuada, tapno ibaw-ingmo ti pungtotmo manipud kadakuada.+ 21  Gapuna itedmo ti annakda iti nakaro a bisin,+ ket iyawatmo ida iti pannakabalin ti kampilan;+ ket ti assawada agbalinda koma a babbai a naulila iti annak, ken babbalo.+ Ket dagiti bukodda a lallaki agbalinda koma a dagidiay napapatay iti makapapatay a saplit, dagiti agtutuboda a lallaki dagidiay nakabil iti kampilan iti bakal.+ 22  Ti maysa nga ikkis mangngegan koma manipud kadagiti balayda, inton giddato nga iyegmo kadakuada ti maysa a buyot dagiti tulisan.+ Ta nangkalida iti maysa nga abut tapno kautibuendak, ket nangilemmengda kadagiti silo maipaay kadagiti sakak.+ 23  Ngem sika, O Jehova, pagaammom unay ti isuamin a pammatigmaanda maibusor kaniak maipaay iti ipapatayko.+ Dika abbongan ti biddutda, ket dika punasen dayta a basolda manipud iti sanguanam; no di ket bay-am ida nga agbalin a dagidiay maitibkol iti sanguanam.+ Iti tiempo ti ungetmo agtignayka a maibusor kadakuada.+

Footnotes