Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Jeremias 17:1-27

17  “Ti basol ti Juda naisurat babaen ti pagyurit a landok.+ Babaen iti tirad ti diamante naikitikit dayta iti tapi ti pusoda,+ ken kadagiti sara ti al-altarda,+  no ti annakda malagipda ti al-altarda ken dagiti sagrado a teddek iti abay ti maysa a nabaludbod a kayo, iti rabaw dagiti nangato a turod,+  iti bambantay iti tay-ak. Dagiti sanikuam, amin dagiti gamengmo, itdekto a maipaay a samsam laeng+—dagiti nangato a dissom gapu iti basol kadagiti amin a teritoriam.+  Ket rimmuk-atka, iti mismo a kabukbukodam a nakem, manipud iti pagtatawidan a sanikuam nga intedko kenka.+ Pagserbienkanto met kadagiti kabusormo iti daga a saanmo a naammuan;+ ta kas iti maysa nga apuy napasgedankayo iti ungetko.+ Agingga iti tiempo a di nakedngan agtultuloyto a sumged dayta.”  Daytoy ti kinuna ni Jehova: “Mailunod ti nabaneg a lalaki a mangikabil ti panagtalekna iti naindagaan a tao+ ket pudno a pagbalinenna ti lasag a takiagna,+ ket ti pusona tumallikud ken Jehova a mismo.+  Ket sigurado nga isu agbalinto a kas agmaymaysa a kayo iti desierto a tanap ket saanto a makakita no umay ti naimbag;+ no di ket isu agtaengto kadagiti namagmagan a disso iti let-ang, iti maysa nga asin a pagilian a saan a mapagnaedan.+  Bendito ti nabaneg a lalaki a mangikabil ti panagtalekna ken Jehova, ket ni Jehova ti nagbalin a pagkammatalkanna.+  Ket isu pudno unay nga agbalinto a kas maysa a kayo a naimula iti igid ti dandanum, a mangparuar kadagiti ramutna iti mismo nga igid ti pagay-ayusan ti danum; ket saannanto a makita no umay ti pudot, no di ket ti bulbulongna pudno nga agbalinto a nabaludbod.+ Ket iti tawen ti tikag+ saanto a maringgoran, saanto met a mamingga a mangpataud iti bunga.  “Ti puso nagulgulib ngem iti aniaman a banag ket desperado.+ Siasino ti makaammo iti dayta? 10  Siak, ni Jehova, suksukisokek ti puso,+ suksukimatek dagiti bekkel,+ tapno itden a mismo iti tunggal maysa ti maitunos iti daldalanna,+ maitunos iti bungbunga dagiti pannakilangenna.+ 11  Kas iti tukling nga inurnongna a sangsangkamaysa ti saanna nga inyitlog kasta daydiay manggunggun-od iti kinabaknang, ngem saan a buyogen ti kinahustisia.+ Iti kagudua dagiti aldawna panawannanto ida,+ ket iti pagnguduanna isu agbalinto a nakuneng.”+ 12  Adda ti nadayag a trono iti ngato manipud pangrugian;+ isu ti disso ti santuariotayo.+ 13  O Jehova, ti namnama ti Israel,+ amin dagidiay mangpanaw kenka maibabaindanto.+ Dagidiay agapostata kaniak+ maisuratdanto iti mismo a daga, agsipud ta pinanawanda ti ubbog ti sibibiag a danum, ni Jehova.+ 14  Paimbagennak, O Jehova, ket mapaimbagakto.+ Isalakannak, ket maisalakanakto;+ ta sika ti daydayawko.+ 15  Adtoy! Adda dagidiay agkunkuna kaniak: “Sadino ti ayan ti sao ni Jehova?+ Umay koma, pangngaasina.” 16  Ngem no maipapan kaniak, saanak a nagganat manipud panagbalin a pastor a sumursurot kenka, ket maipaay iti aldaw nga awanan inanama saanak a nangipakita iti aniaman a panaggartem. Sika naammuam ti ebkas dagiti bibigko; iti sanguanan ti rupam napasamak dayta. 17  Dika agbalin a banag a makapakullayaw kaniak.+ Sika ti kamangko iti aldaw ti didigra.+ 18  Maibabain koma dagiti manangidadanes kaniak,+ ngem siak a mismo saanak koma a maibabain.+ Isuda koma dagidiay agaligaget, ngem siak a mismo saanak koma nga agaligaget. Ipagtengmo kadakuada ti aldaw ti didigra,+ ket dadaelem ida uray iti mamindua ti kaaduna a pannakarba.+ 19  Daytoy ti kinuna kaniak ni Jehova: “Mapanka, ket masapul nga agtakderka iti ruangan ti annak dagiti umili nga isu ti serkan ti ar-ari ti Juda ken isu ti ruaranda, ken kadagiti amin a ruangan ti Jerusalem.+ 20  Ket masapul a kunaem kadakuada, ‘Denggenyo ti sao ni Jehova, dakayo nga ar-ari ti Juda ken isuamin a Juda ken dakayo amin nga agnanaed iti Jerusalem, a sumsumrek kadagitoy a ruangan.+ 21  Daytoy ti kinuna ni Jehova: “Annadanyo dagiti kararuayo,+ ket iti aldaw ti sabbath dikay agawit iti aniaman nga awit nga iserrekyonto kadagiti ruangan ti Jerusalem.+ 22  Ket dikay mangiruar iti aniaman nga awit manipud kadagiti pagtaenganyo iti aldaw ti sabbath; ket masapul nga awan a pulos trabaho nga aramidenyo.+ Ket masapul a santipikarenyo ti aldaw ti sabbath, kas iti imbilinko kadagidi ammayo;+ 23  ngem saanda nga immimdeng wenno inyallingag ti lapayagda,+ ket pinatangkenda dagiti lengngesda+ tapno saanda a makangngeg ken tapno saanda nga umawat iti disiplina.”’+ 24  “‘“Ket mapasamakto a, no siiinget nga agtulnogkayo kaniak,”+ kuna ni Jehova, “a saankayo a mangiserrek iti awit kadagiti ruangan daytoy a siudad iti aldaw ti sabbath+ ken santipikarenyo ti aldaw ti sabbath babaen ti saan a panagaramid iti dayta iti aniaman a trabaho,+ 25  pudno unay a kadagiti ruangan daytoy a siudad addanto met sumrek nga ar-ari agraman piprinsipe,+ a nakatugaw iti trono ni David,+ a nakasakay iti karuahe ken iti kabkabalio, isuda ken dagiti prinsipeda, dagiti tattao ti Juda ken dagiti agnanaed iti Jerusalem; ket daytoy a siudad pudno unay a mapagnaedanto agingga iti tiempo a di nakedngan. 26  Ket pudno nga umayto dagiti tattao manipud kadagiti siudad ti Juda ken manipud iti aglikmut ti Jerusalem ken manipud iti daga ti Benjamin+ ken manipud iti patad a daga+ ken manipud iti nakabambantay a rehion+ ken manipud iti Negeb,+ a mangyegda kadagiti sibubukel a daton a mapuoran+ ken sakripisio+ ken daton a bukbukel+ ken olibano+ ket mangyegda iti sakripisio ti panagyaman iti balay ni Jehova.+ 27  “‘“Ngem no saankayto nga agtulnog kaniak babaen ti panangsantipikaryo iti aldaw ti sabbath ken ti saanyo a panagawit iti maysa nga awit,+ no di ket adda iseserrek agraman iti dayta kadagiti ruangan ti Jerusalem iti aldaw ti sabbath, paggayebgebekto met ti apuy kadagiti ruanganna,+ ket sigurado nga alun-onennanto dagiti pagnanaedan a torre ti Jerusalem+ ket saanto a maiddep.”’”+

Footnotes