Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Jeremias 16:1-21

16  Ket ti sao ni Jehova nagtultuloy a dimteng kaniak, a kunkunana:  “Dika mangala maipaay kenka iti asawa, ket dika maaddaan iti annak a lallaki ken annak a babbai iti daytoy a lugar.+  Ta daytoy ti kinuna ni Jehova maipapan iti annak a lallaki ken maipapan iti annak a babbai a nayanak iti daytoy a lugar, ken maipapan kadagiti innada a mangipaspasngay kadakuada ken maipapan kadagiti ammada a mangputputot kadakuada iti daytoy a daga,+  ‘Mataydanto kadagiti ipapatay gapu kadagiti sakit.+ Saandanto a madung-awan,+ saandanto met a maitabon.+ Agbalindanto a kas ganagan iti rabaw ti daga;+ ket babaen ti kampilan ken babaen ti nakaro a bisin agngudodanto,+ ket dagiti natay a bagida pudno nga agserbidanto a kas taraon maipaay kadagiti agtaytayab a parsua iti langlangit ken maipaay kadagiti animal iti daga.’+  “Ta daytoy ti kinuna ni Jehova, ‘Dika sumrek iti balay ti maysa a padaya dagiti agledleddaang, ket dika mapan agdung-aw ken dika makipagrikna kadakuada.’+ “‘Ta inikkatko ti talnak iti daytoy nga ili,’ kuna ni Jehova, ‘uray ti naayat a kinamanangngaasi ken as-asi.+  Ket sigurado a mataydanto, dagidiay dadakkel ken dagidiay babassit, iti daytoy a daga. Saandanto a maitabon,+ saanto met a sapliten dagiti tattao ti bagbagida gapu kadakuada, wenno uray sugatsugaten ti asinoman ti bagina+ wenno kalbuenna ti bagina gapu kadakuada.+  Ket saandanto a mangipaay kadakuada iti aniaman a tinapay maigapu iti panagleddaang tapno liwliwaenda ti asinoman gapu kadagiti natay;+ saandanto met nga ited kadakuada ti kopa ti pangliwliwa tapno inumen maigapu iti ama ti maysa ken maigapu iti ina ti maysa.+  Ket dika pulos sumrek iti balay ti panagdadaya tapno makikatugawka kadakuada a mangan ken uminum.’+  “Ta daytoy ti kinuna ni Jehova ti buybuyot, ti Dios ti Israel, ‘Adtoy pasardengek iti daytoy a disso iti imatangyo ken iti al-aldawyo ti timek ti panagragsak ken ti timek ti panagrag-o, ti timek ti nobio ken ti timek ti nobia.’+ 10  “Ket mapasamakto nga, inton ibagam iti daytoy nga ili amin dagitoy a sasao ket pudno a kunaenda kenka, ‘Maigapu iti ania a ni Jehova sinaona maibusor kadakami ti isuamin daytoy a dakkel a didigra, ket ania ti biddutmi ken ania ti basolmi a nagbasolanmi a maikaniwas ken Jehova a Diostayo?’+ 11  kunaemto met kadakuada, ‘“Maigapu iti kinapudno a dagiti ammayo pinanawandak,”+ kuna ni Jehova, “ket simmursurotda kadagiti sabali a didios ken nagserserbida kadakuada ken nagrukruknoyda kadakuada.+ Ngem pinanawandak, ket ti lintegko saanda a sinalimetmetan.+ 12  Ket dakayo nagtignaykayo a dakdakes iti aramidyo ngem kadagiti ammayo,+ ket adtoy magmagnakayo a sumurot tunggal maysa iti kinasungit+ ti dakes a pusona iti saan a panagtulnog kaniak.+ 13  Ket ipalladawkayto manipud iti daytoy a daga+ nga agturong iti daga a dakayo saanyo a naammuan,+ wenno uray dagiti ammayo, ket sadiay kasapulan nga agserbikayto kadagiti sabali a didios+ iti aldaw ken rabii, agsipud ta saankayto nga ipaayan iti aniaman a parabur.”’ 14  “‘Gapuna, adtoy! um-umayen dagiti aldaw,’+ kuna ni Jehova, ‘inton saanen a makuna: “Kas sibibiag ni Jehova a nangaon iti annak ti Israel iti daga ti Egipto!”+ 15  no di ket: “Kas sibibiag ni Jehova a nangaon iti annak ti Israel manipud iti daga ti amianan ken manipud iti amin a dagdaga a nangiwarawaraanna kadakuada!” ket pudno unay nga isublikto ida iti dagada, nga intedko kadagidi ammada.’+ 16  “‘Adtoy agpaayabak iti adu a mangngalap,’ kuna ni Jehova, ‘ket pudno unay a kalapendanto ida; ket kalpasanna agpaayabak iti adu a mangnganup,+ ket pudno unay nga anupendanto ida manipud iti tunggal bantay ken manipud iti tunggal turod ken manipud kadagiti lengngan dagiti napasdok a bato.+ 17  Ta dagiti matak addada iti amin a daldalanda. Saanda a nailinged manipud iti sanguanak, saan met a nailemmeng ti biddutda manipud iti sanguanan dagiti matak.+ 18  Ket, umuna iti amin, supapakakto ti naan-anay a gatad ti biddutda ken ti basolda,+ maigapu iti panangtabbaawda iti dagak.+ Kadagiti bangkay ti makarimon a bambanagda ken ti nakarimrimon a bambanagda pinunnoda ti tawidko.’”+ 19  O Jehova a pigsak ken salindegko, ken disso a pagkamangak iti aldaw ti rigat,+ dagiti met laeng nasion umaydanto kenka manipud kadagiti ungto ti daga,+ ket kunaendanto: “Kinapudnona dagidi ammami inikutanda ti bin-ig a kinaulbod,+ kinaubbaw ken bambanag a kadagita awan ti pakagunggonaan.”+ 20  Ti naindagaan a tao makaaramid aya iti didios maipaay iti bagina idinto ta saanda a didios?+ 21  “Gapuna adtoy ipakaammok kadakuada; iti daytoy a tiempo ipakaammokto kadakuada ti imak ken ti kinamannakabalinko,+ ket kasapulanto a maammuanda a ti naganko ket Jehova.”+

Footnotes