Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Isaias 7:1-25

7  Ita naaramid idi kaaldawan ni Acaz+ nga anak ni Jotam nga anak ni Ozias, ti ari ti Juda, a ni Rezin+ nga ari ti Siria ken ni Peca+ nga anak ni Remalias, ti ari ti Israel, simmang-atda idiay Jerusalem a maipaay iti gubat maibusor iti dayta, ket saanna idi a kabaelan ti makigubat iti dayta.+  Ket ti maysa a damag naidanon iti balay ni David, a kunkunana: “Ti Siria nagkammatalek iti Efraim.”+ Ket ti pusona ken ti puso ti ilina nangrugi nga agtayegteg, kas iti panagtayegteg dagiti kayo iti bakir gapu iti angin.+  Ket ni Jehova kinunana ken Isaias: “Rummuarka a sumabet ken Acaz, pangngaasim, sika ken ni Sear-jasub+ nga anakmo, iti ungto ti kalasugan+ ti makinngato a ban-aw iti sibay ti kangrunaan a kalsada ti tay-ak ti managlaba.+  Ket masapul a kunaem kenkuana, ‘Aluadam ta bagim ken agtalinaedka a di masinga.+ Dika agbuteng, ket dika bay-an nga agalikaka ti mismo a pusom+ gapu iti dua a murdong dagitoy umas-asuk a tarikayo, gapu iti nabara nga unget ni Rezin ken ti Siria ken ti anak ni Remalias,+  gapu ta ti Siria agraman ti Efraim ken ti anak ni Remalias nangigakat iti dakes maibusor kenka, a kunkunana:  “Sumang-attayo koma a maibusor iti Juda ket pagsisinaentayo ket babaen kadagiti iraraut alaentayo maipaay kadatayo; ket pagturayentayo koma iti unegna ti sabali nga ari, ti anak ni Tabeel.”+  “‘Daytoy ti kinuna ti Soberano nga Apo Jehova: “Saanto nga agtalinaed dayta, saanto met a mapasamak.+  Ta ti ulo ti Siria isu ti Damasco, ket ti ulo ti Damasco isu ni Rezin; ket iti las-ud laeng ti innem a pulo ket lima a tawen maburakburakto ti Efraim tapno saanen nga ili.+  Ket ti ulo ti Efraim isu ti Samaria,+ ket ti ulo ti Samaria isu ti anak ni Remalias.+ Malaksid no maaddaankayo iti pammati, iti dayta a kasasaad saankayto nga agpaut.”’”+ 10  Ket ni Jehova nagsao pay ken Acaz, a kunkunana: 11  “Agkiddawka maipaay kenka iti pagilasinan manipud ken Jehova a Diosmo,+ nga aramidem dayta a kas iti kauneg ti Sheol wenno aramidem a nangato a kas kadagiti makinngato a rehion.” 12  Ngem kinuna ni Acaz: “Saanakto nga agkiddaw, saankonto met a suboken ni Jehova.” 13  Ket kinunana: “Imdenganyo, pangngaasiyo, O balay ni David. Bassit laeng aya a banag a mangbannogkayo iti tattao, a bannogenyo met ti Diosko?+ 14  Gapuna ni met laeng Jehova mangtedto kadakayo iti pagilasinan: Adtoy! Ti met laeng balasang+ pudno nga agsikogto,+ ket mangipasngay iti anak a lalaki,+ ket pudno unay a panaganannanto iti Emmanuel. 15  Mantekilia ken diro ti kanennanto inton tiempo nga ammona no kasano a laksiden ti dakes ken pilien ti naimbag.+ 16  Ta sakbay a maammuanto ti ubing no kasano a laksiden ti dakes ken pilien ti naimbag,+ mabaybay-anto a naan-anay ti daga a ti dua nga arina ti pakarikriknaam iti mamagsakit nga alinggaget.+ 17  Ni Jehova iyegnanto a maibusor kenka+ ken maibusor iti ilim ken maibusor iti balay ni amam ti al-aldaw a kas iti saan pay a dimteng nanipud iti aldaw nga iyaadayo ti Efraim iti sibay ti Juda,+ awan sabali, ti ari ti Asiria.+ 18  “Ket mapasamakto iti dayta nga aldaw a ni Jehova sultipannanto dagiti ngilaw nga adda iti ungto dagiti kanal ti Nilo ti Egipto ken dagiti uyokan+ nga adda iti daga ti Asiria,+ 19  ket sigurado nga umaydanto ket agyanda, isuda amin, kadagiti naapres a ginget a naderraas ken kadagiti lengngan dagiti napasdok a bato ken kadagiti amin a kasamekan ti sisiit ken kadagiti amin a disso ti dandanum.+ 20  “Iti dayta nga aldaw, babaen iti inabangan a labaha iti rehion ti Karayan,+ babaen a mismo iti ari ti Asiria,+ ni Jehova kiskisannanto ti ulo ken ti muldot dagiti saka, ket punasennanto uray ti mismo a barbas.+ 21  “Ket mapasamakto iti dayta nga aldaw a ti maysa a tao taginayonennanto a sibibiag ti maysa a bumalasang a baka ti pangen ken dua a karnero.+ 22  Ket mapasamakto a, gapu iti kinaruay ti panagpataud iti gatas, isu manganto iti mantekilia; agsipud ta mantekilia ken diro+ ti kanento ti tunggal maysa a nabati iti tengnga ti daga. 23  “Ket mapasamakto iti dayta nga aldaw a tunggal disso a sadiay adda idi sangaribu nga ubas, nga aggatad iti sangaribu a kapisi a pirak,+ agpaayto—agpaayto dayta iti siitan a babassit a kayo ken iti dakes a ruruot.+ 24  Buyogen dagiti pana ken ti bai isu umayto sadiay,+ agsipud ta ti intero a daga agbalinto laeng a siitan a babassit a kayo ken dakes a ruruot. 25  Ket amin dagiti bantay a magagaikan idi iti makapariribuk a mulmula babaen ti gabion—saankanto nga umay sadiay gapu iti panagbuteng kadagiti siitan a babassit a kayo ken dakes a ruruot; ket pudno unay nga agbalinto dayta a lugar a pagibulosan kadagiti toro ken daga a pagpayatpayatan dagiti karnero.”+

Footnotes