Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Isaias 59:1-21

59  Adtoy! Ti ima ni Jehova saan a nagbalin a nakaab-ababa tapno saan a makaisalakan,+ wenno ti lapayagna nagbalin a nakadagdagsen tapno saan a makangngeg.+  Saan, no di ket dagiti mismo a biddutyo nagbalinda a bambanag a mangibunga iti pannakabingbingay iti nagbaetanyo iti Diosyo,+ ket ti bukodyo a basbasol nangibunga iti pannakailinged ti rupana manipud kadakayo tapno saan a makangngeg.+  Ta dagiti bukodyo a dakulap narugitanda iti dara,+ ken dagiti ramayyo iti biddut. Dagiti bukodyo a bibig nagsaoda iti kinaulbod.+ Ti bukodyo a dila nangidaydayamudom iti bin-ig a kinakillo.+  Awan ti umaw-awag buyogen ti kinalinteg,+ ket awan a pulos ti napan iti pangukoman buyogen ti kinamatalek. Adda idi panagtalek iti saan a kinapudno,+ ken panagsao iti kinaawan pateg.+ Adda idi panangyinaw iti riribuk, ken panangyanak iti makapasakit.+  Dagiti itlog ti nagita nga uleg isu ti pinessaanda, ket inab-abelda ti saput laeng ti maysa a lawwalawwa.+ Ti asinoman a mangan kadagiti itlogda matay, ket ti itlog a nalusit mapessaan nga agbalin a maysa a karasaen.+  Ti saputda laeng saanto nga agserbi kas maysa a kawes, saandanto met nga abbungotan ti bagbagida kadagiti aramidda.+ Dagiti aramidda makapasakit nga ar-aramid, ket ti aramid ti kinaranggas adda kadagiti dakulapda.+  Ti bukodda a saksaka agtartaray nga agturong iti bin-ig a kinadakes,+ ket agdardarasda nga agibukbok iti awanan basol a dara.+ Dagiti panunotda makapasakit a pampanunot;+ ti pannakaagaw ken pannakarba adda kadagiti kangrunaan a kalsadada.+  Ti dalan ti talna+ saanda nga inkankano, ket awan kinahustisia iti desdesda.+ Dagiti dalanda kinilloda maipaay iti bagbagida.+ Awan a pulos siasinoman a bumadbaddek kadakuada ti pudno a makaammonto iti talna.+  Dayta ti makagapu a ti kinahustisia nagbalin nga adayo kadakami, ket ti kinalinteg saan a makakamakam kadakami. Mangin-inanamakami iti lawag, ngem, adtoy! kinasipnget; iti raniag, ngem iti agtultuloy a daguyemyem nagnagnakami.+ 10  Agar-arikapkami iti diding kas kadagiti bulsek a tattao, ket kas kadagidiay awanan iti matmata agar-arikapkami.+ Naitibkolkami iti matuon a kas iti kinasipnget ti rabii; iti tengnga dagidiay nalungpo kaslakami kadagiti natay a tattao.+ 11  Umas-asugkami, dakami amin, kas kadagiti oso; ket kas kadagiti kalapati agkukkukokkami a sileleddaang.+ Nangin-inanamakami iti kinahustisia,+ ngem awan; iti pannakaisalakan, ngem nagtalinaed nga adayo kadakami.+ 12  Ta dagiti iyaalsami immaduda iti sanguanam;+ ket no maipapan iti basbasolmi, tunggal maysa nangpaneknek a maibusor kadakami.+ Ta dagiti iyaalsami addada kadakami; ket no maipapan kadagiti biddutmi, pagaammomi unay ida.+ 13  Adda idi panagsalungasing ken panangilibak ken Jehova;+ ket adda idi panagsanud manipud iti Diosmi, panagsao iti panangirurumen ken iyaalsa,+ panangyinaw ken panangidayamudom iti sasao ti kinaulbod manipud iti mismo a puso.+ 14  Ket ti kinahustisia napilit nga agsanud,+ ket ti met laeng kinalinteg nagtultuloy a sitatakder iti adayo laeng.+ Ta ti kinapudno naitibkol uray iti publiko a plasa, ket ti nalinteg saanna a kabalinan ti sumrek.+ 15  Ket ti kinapudno mapukpukaw,+ ket ti asinoman a tumallikud iti kinadakes maag-agawan.+ Ket nakita ni Jehova, ket dakes idi kadagiti matana nga awan ti kinahustisia.+ 16  Ket idi nakitana nga awan ti tao, nangrugi nga agmalmalanga ta awan idi ti bimmallaet.+ Ket ti takiagna nangisalakan maipaay kenkuana, ket ti bukodna a kinalinteg isu idi ti banag a nangsaranay kenkuana.+ 17  Idin inyaruatna ti kinalinteg kas maysa a nagsasaip a kabal,+ ken ti kabal ti ulo ti pannakaisalakan iti rabaw ti ulona.+ Kanayonanna pay, inkawesna dagiti kawes ti pammales kas pagan-anay+ ket binalkutna ti bagina iti regta a kasla lambon nga awan manggasna.+ 18  Maitunos kadagiti pannakilangen manggunggonanto iti mayanatup,+ pungtot kadagiti kalabanna, maiparbeng a panangtrato kadagiti kabusorna.+ Kadagiti isla mangsupapakto iti maiparbeng a panangtrato.+ 19  Ket manipud iti lelennekan ti init mangrugidanto nga agbuteng iti nagan ni Jehova,+ ken manipud iti leleggakan ti init iti dayagna,+ ta isu umayto a kas iti mangparigat a karayan, nga impugso ti mismo nga espiritu ni Jehova.+ 20  “Ket iti Sion+ sigurado nga umayto ti Manangsaka,+ ken kadagidiay adda ken Jacob a tumaltallikud iti panagsalungasing,”+ kuna ni Jehova. 21  “Ket no maipapan kaniak, daytoy ti tulagko kadakuada,”+ kinuna ni Jehova. “Ti espirituk nga adda kenka+ ken ti sasaok nga inkabilko iti ngiwatmo+—saanto a maikkat iti ngiwatmo wenno iti ngiwat ti putotmo wenno iti ngiwat ti putot ti putotmo,” kinuna ni Jehova, “manipuden ita uray agingga iti tiempo a di nakedngan.”+

Footnotes