Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Isaias 49:1-26

49  Imdengandak, O dakayo nga isla,+ ket mangipangagkayo, dakayo a nasional a bunggoy iti adayo.+ Ni Jehova met laeng inayabannak+ manipud a mismo iti tian.+ Manipud iti makin-uneg a paspaset ni inak dinakamatna ti naganko.+  Ket pinagbalinna ti ngiwatko a kas iti natadem a kampilan.+ Iti salinong+ ti imana inlemmengnak.+ Ket nagin-inut a pinagbalinnak a napasileng a pana. Intalimengnak iti bukodna a taguban.  Ket kinunana kaniak: “Sika ti adipenko, O Israel,+ sika daydiay pangipakitaakto iti pintasko.”+  Ngem no maipapan kaniak, kinunak: “Iti awan kapapay-anna a nagbannogak.+ Iti di kinapudno ken kinaubbaw naan-anay nga inibusko ti bukodko a bileg.+ Pudno a ti pannakaukomko adda ken Jehova,+ ket dagiti supapakko adda iti Diosko.”+  Ket ita ni Jehova, Daydiay nangbukel kaniak manipud iti tian kas maysa nga adipen a kukuana,+ kinunana nga isublik kenkuana ni Jacob,+ tapno ti met laeng Israel maurnong kenkuana.+ Ket maidaydayawakto kadagiti mata ni Jehova, ket ti mismo a Diosko nagbalinton a pigsak.  Ket kinunana: “Ad-adda ngem iti nanumo a banag nga agbalinka nga adipenko tapno ibangonmo dagiti tribu ni Jacob ken tapno isublim uray dagidiay nasaluadan iti Israel;+ intedka met a maipaay a silaw dagiti nasion,+ tapno ti panangisalakanko adda koma agingga iti ungto ti daga.”+  Daytoy ti kinuna ni Jehova, ti Manangsaka ti Israel,+ Daydiay Santona, kenkuana a naumsi iti kararua,+ kenkuana a karimon ti nasion,+ iti adipen dagiti agtuturay:+ “Ti met laeng ar-ari makitadanto ket sigurado a tumakderda,+ ken dagiti prinsipe, ket agruknoydanto, gapu ken Jehova, a matalek,+ Daydiay Santo ti Israel, a mangpilpili kenka.”+  Daytoy ti kinuna ni Jehova: “Iti tiempo ti naimbag a nakem sinungbatanka,+ ket iti aldaw ti pannakaisalakan tinulonganka;+ ket sinalsaluadanka tapno maitedka a kas maysa a tulag maipaay kadagiti tattao,+ tapno maipulang ti daga iti sigud a kasasaadna,+ tapno iyeg ti panangtagikua manen iti nalangalang a pagtatawidan a sansanikua,+  tapno kunaen kadagiti balud,+ ‘Rummuarkayo!’+ kadagidiay adda iti kinasipnget,+ ‘Iparangyo ti bagbagiyo!’+ Iti igid dagiti dalan agipaarabdanto, ket iti amin a naasak-asak a dandana isunto ti pagipaarabanda.+ 10  Saandanto nga agbisin,+ saandanto met a mawaw,+ saanto met a kabilen ida ti mangparkag a pudot wenno init.+ Ta iturongto ida Daydiay maas-asian kadakuada,+ ket idalannanto ida iti igid dagiti ubbog ti danum.+ 11  Ket dagiti amin a bantayko aramidekto a dalan, ket dagiti met laeng kangrunaan a kalsadak addadanto iti nangato.+ 12  Adtoy! Umayto dagitoy manipud a mismo iti adayo,+ ket, adtoy! dagitoy aggapuda iti amianan+ ken iti laud,+ ket dagitoy aggapuda iti daga ti Sinim.” 13  Mangyesngawkayo iti naragsak a pukkaw, dakayo a langlangit,+ ket agrag-oka, sika a daga.+ Maay-ayatan koma unay dagiti bantay buyogen ti naragsak nga ikkis.+ Ta liniwliwa ni Jehova ti ilina,+ ket dagiti tattaona a naparigatan ipakitaanna iti asi.+ 14  Ngem kinunkuna ti Sion: “Ni Jehova binaybay-annak,+ ket ni met laeng Jehova nalipatannak.”+ 15  Mabalinan aya ti asawa a babai a lipatan ti agsussusona iti kasta saanna a kaasian ti anak ti tianna?+ Uray dagitoy a babbai makalipatda,+ ngem siak saankanto a malipatan.+ 16  Adtoy! Inkitikitka kadagiti dakulapko.+ Dagiti padermo patinayon nga addada iti sanguanak.+ 17  Nagdardaras ti annakmo. Dagidiay mismo a mangrebrebba kenka ken mamagwalangwalang kenka rummuardanto manipud a mismo kenka. 18  Itangwam dagita matam iti intero nga aglikmut ket kitaem. Isuda amin naummongda a sangsangkamaysa.+ Dimtengda kenka. “Kas sibibiagak,” kuna ni Jehova,+ “babaen kadakuada amin kawesamto ti bagim a kas babaen kadagiti arkos, ket ibedbedmonto ida iti bagim kas iti maysa a nobia.+ 19  Nupay adda dagiti walangwalang a dissom ken dagiti langalang a dissom ken ti daga dagiti rebbam,+ nupay ita nailetka a mapagnaedan, ket dagidiay mangal-alun-on kenka adayodan,+ 20  kaskasdi a kadagiti bukodmo a lapayag kunaento ti annak iti ulila a kasasaadmo,+ ‘Ti lugar immilet unayen maipaay kaniak.+ Iwayaannak, tapno makapagnaedak.’+ 21  Ket sigurado a kunaemto ita pusom, ‘Siasino ti nagbalin nga ama kadagitoy maipaay kaniak, idinto ta maysaak a babai a naulila iti annak ken baog, naidestiero ken naala a balud?+ No maipapan kadagitoy, siasino ti nangpadakkel kadakuada?+ Adtoy! Siak nabaybay-anak nga agmaymaysa.+ Dagitoy—sadino ti ayanda idi?’”+ 22  Daytoy ti kinuna ti Soberano nga Apo Jehova: “Adtoy! Itag-aykonto ti imak kadagiti nasion a mismo,+ ket kadagiti ili ibayogkonto ti pagilasinak.+ Ket ti annakmo a lallaki iyegdanto iti saklot, ket iti rabaw ti abaga awitendanto dagiti bukodmo nga annak a babbai.+ 23  Ket ti ar-ari agbalindanto nga agay-aywan maipaay kenka,+ ken dagiti prinsesada agtagtagibi a babbai maipaay kenka. Agruknoydanto kenka a dagiti rupada dumanon iti daga,+ ket ti tapok dagiti sakam dilpatandanto;+ ket kasapulan a maammuamto a siak ni Jehova, a dagidiay mangin-inanama kaniak saandanto a mabainan.”+ 24  Mabalin kadi a dagidiay naalan ket maala manipud iti mismo a nabileg a lalaki,+ wenno mabalin kadi nga agtalaw ti bagi dagiti kautibo ti manangikuspil?+ 25  Ngem daytoy ti kinuna ni Jehova: “Uray ti bagi dagiti kautibo ti nabileg a lalaki maipanawto,+ ket agtalawto dagidiay naalan ti mismo a manangikuspil.+ Ket iti asinoman a makisupsupiat kenka siak makisupiatakto,+ ket siak isalakankonto+ dagiti bukodmo nga annak. 26  Ket dagidiay mangirurrurumen kenka pakanekto iti bukodda a lasag; ket kas iti nasam-it nga arak mabartekdanto iti bukodda a dara. Ket ti isuamin a lasag kasapulan a maammuandanto a siak, ni Jehova,+ ti Manangisalakanmo+ ken Manangsakam,+ Daydiay Mannakabalin ni Jacob.”+

Footnotes