Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Isaias 34:1-17

34  Umasidegkayo, dakayo a nasnasion, tapno dumngegkayo;+ ket dakayo a nasional a bungbunggoy,+ mangipangagkayo. Ti daga ken ti mangpunno iti dayta umimdeng koma,+ ti nabunga a daga+ ken isuamin a bungana.+  Ta ni Jehova addaan rurod kadagiti amin a nasion,+ ken pungtot iti isuamin a buyotda.+ Masapul nga ikeddengna ida iti pannakadadael; masapul nga iyawatna ida iti pannakagudas.+  Ket dagidiay napapatay kadakuada maipalladawdanto; ket no maipapan kadagiti bangkayda, ti bangsitda agpangatonto;+ ket ti bambantay marunawto gapu iti darada.+  Ket amin dagiti kameng ti buyot ti langlangit agrunotdanto.+ Ket ti langlangit malukotto,+ kas iti maysa a libro a lukot; ket ti buyotda agkuretretto amin, no kasano a ti bulbulong magango a matnag manipud iti puon ti ubas ken kas iti higos a nagango a natnag manipud iti kayo a higos.+  “Ta iti langlangit sigurado a maslepto ti kampilanko.+ Adtoy! Bumabanto dayta iti Edom,+ ken kadagiti umili nga inkeddengko iti pannakadadael+ maitunos iti hustisia.  Ni Jehova addaan iti kampilan; mapnonto dayta iti dara;+ mapalanitto iti taba, iti dara dagiti urbon a kalakian a karnero ken dagiti kalakian a kalding, iti taba+ dagiti bekkel dagiti kalakian a karnero. Ta ni Jehova addaan sakripisio idiay Bozra, ken dakkel a panagparti iti daga ti Edom.+  Ket dagiti atap a toro+ sumalogdanto a maikuyog kadakuada, ken dagiti urbon a toro a maikuyog kadagidiay mannakabalin;+ ket ti dagada maslepto iti dara, ket ti mismo a tapokda mapagbalinto a nalanit iti taba.”+  Ta ni Jehova addaan aldaw ti pammales,+ maysa a tawen dagiti pannusa maipaay iti legal a kaso iti Sion.+  Ket dagiti karayanna mapagbalinto a galagala, ken ti tapokna mapagbalin nga asupre; ket ti dagana agbalinto a kas sumsumged a galagala.+ 10  Iti rabii wenno iti aldaw saanto a maiddep dayta; agingga iti tiempo a di nakedngan agpangpangatonto ti asukna.+ Manipud iti kaputotan agingga iti kaputotan isu mamagmaganto;+ iti agnanayon ken awan inggana awanto ti lumasat a bumallasiw kenkuana.+ 11  Ket isu tagikuaento ti mangngaput ken ti anaping, ket agtaengto a mismo kenkuana dagiti atiddog-lapayagna a kullaaw ken dagiti wak;+ ket iyunnatnanto iti rabawna ti pagrukod a parteng+ ti kinaongaong ken dagiti bato ti kinalangalang. 12  Dagiti natan-okna—awanda sadiay isuda nga awagandanto iti mismo a kinaari, ket dagiti mismo a prinsipena maawandanto aminen.+ 13  Kadagiti pagnanaedan a torrena tumpuarto ti sisiit, sisiitan ken nasiit a dakes a ruruot kadagiti nasarikedkedan a lugarna;+ ket isu agbalinto a disso a pagyanan dagiti chacal,+ ti paraangan a maipaay kadagiti abestrus.+ 14  Ket dagiti agay-ayuyang kadagiti awanan danum a rehion makisinnabetdanto kadagiti agtagtaguob nga animal, ket uray ti sukog-kalding a sairo+ umawagto iti kaduana. Wen, sadiay ti kotakabra sigurado nga aginananto ket makasarak a mismo iti lugar a paginanaan.+ 15  Sadiay ti nasiglat nga uleg nangaramid iti umokna ket agitlog, ket pessaannanto ida ken urnongenna ida a sangsangkamaysa iti sirok ti salinongna. Wen, sadiay dagiti sawi+ aguummongdanto a sangsangkamaysa, tunggal maysa agraman ti kaasmangna. 16  Sukimatenyo a mismo iti libro+ ni Jehova ket basaenyo iti napigsa: awan maysa a napukaw kadakuada;+ pudno a saanda a masaaw a maaddaan tunggal maysa iti kaasmangna, ta ti ngiwat ni Jehova ti nangibilin,+ ket ti espirituna ti nangummong kadakuada a sangsangkamaysa.+ 17  Ket Isu ti nangaramid ti panagbibinnunot maipaay kadakuada, ket ti bukodna nga ima biningaybingayna kadakuada ti lugar babaen ti pagrukod a parteng.+ Agingga iti tiempo a di nakedngan tagikuaendanto dayta; iti kinapkaputotan agtaengdanto iti dayta.

Footnotes