Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Isaias 30:1-33

30  “Asi pay ti annak a nasungit,”+ kuna ni Jehova, “dagidiay agannayas a mangitungpal iti pammatigmaan, ngem saan a daydiay naggapu kaniak;+ ken mangibukbok iti sakripisio nga inumen, ngem saan a babaen ti espirituk, tapno inayon ti basol iti basol;+  dagidiay nga agrubrubbuat a sumalog idiay Egipto+ ken saan a nagimtuod iti bukodko a ngiwat,+ tapno sumalinong iti salindeg ni Faraon ken tapno agkamang iti salinong ti Egipto!+  Ket ti salindeg ni Faraon agbalinto a rason a pakaibabainanyo a mismo,+ ken ti panagkamang iti salinong ti Egipto agbalin a pakaigapuan ti pannakaipababa.+  Ta dagiti prinsipena naaddada a mismo idiay Zoan,+ ket dagiti bukodna a babaonen makagtengda uray idiay Hanes.  Tunggal maysa sigurado a mabainanto iti ili nga awan maiyegna a pagimbagan iti maysa, nga awan maitulongna ken awan maiyegna a pagimbagan, no di ket rason a pakaibabainan ken kasta met a pakaigapuan ti pannakaumsi.”+  Ti pammakdaar maibusor kadagiti animal iti abagatan:+ Iti daga ti riribuk+ ken dagiti narigat a kasasaad, ti leon ken ti leopardo nga agug-uga, ti karasaen ken ti umap-apuy nga uleg a sumsumiag,+ kadagiti abaga dagiti nataenganen nga asno awitenda dagiti sanikuada, ket kadagiti bungkatol ti kamkamelio+ awitenda dagiti abastoda. Maipagapu kadagiti umili saandanto a makagunggona.  Ket dagiti Egipcio kinaubbawda laeng, ket tumulongdanto laeng nga awan kapapay-anna.+ Gapuna inawagak daytoy: “Rahab+—kaykayatda lattan ti agtugtugaw.”  “Ita umayka, isuratmo dayta iti maysa a tapi a kaduam ida, ket ilanadmo uray iti maysa a libro,+ tapno agserbi koma iti masanguanan nga aldaw, a pangsaksi agingga iti tiempo a di nakedngan.+  Ta dayta ket rebelioso nga ili,+ di napudno nga annak,+ annak a di situtulok a dumngeg iti linteg ni Jehova;+ 10  isuda a nagkuna kadagidiay makakita, ‘Dikay kumita,’ ket kadagidiay addaan kadagiti sirmata, ‘Dikay agsirmata maipaay kadakami iti aniaman nga umiso a bambanag.+ Agsaokayo kadakami iti nalamuyot a bambanag; agsirmatakayo iti makaallilaw a bambanag.+ 11  Suminakayo iti dalan; sumiasikayo iti dana.+ Pagpatinggaenyo Daydiay Santo ti Israel maigapu laeng kadakami.’”+ 12  Gapuna daytoy ti kinuna Daydiay Santo ti Israel: “Gapu iti panangilaksidyo iti daytoy a sao,+ ket yantangay agtalekkayo iti panangsaur ken iti nasikap ket agsammakedkayo iti dayta,+ 13  gapuna daytoy a biddut agbalinto kadakayo a kas iti nagbirri a paset a ngannganin marba, maysa nga itatambukor iti nangato ti pannakabangonna a pader,+ a ti pannakarbana mabalin a dumteng a giddato, iti apagdarikmat.+ 14  Ket ti maysa sigurado a burakennanto dayta kas iti panangburak iti dakkel a karamba dagiti agdamdamili,+ narumekrumek nga awan asinoman a mangiliklik iti dayta, tapno iti rumrumekna awan masarakan a ribak ti damili a pangkaraykay iti apuy manipud iti pugon wenno pagagsaw iti danum manipud iti naaluguog a disso.”+ 15  Ta daytoy ti kinuna ti Soberano nga Apo Jehova, Daydiay Santo ti Israel:+ “Babaen ti isusubli ken panaginana maisalakankayto. Ti kinamannakabalinyo addanto laeng iti panagtalinaed a di masinga ken iti kinamanagtalek.”+ Ngem saankayo a timmulok.+ 16  Ket kinunayo: “Saan, no di ket agtalawkamto a sikakabalio!”+ Dayta ti makagapu nga agtalawkayto. “Ket kadagiti nasiglat a kabalio agsakaykamto!”+ Dayta ti makagapu a dagidiay mangkamkamat kadakayo ipakitadanto a nasiglatda.+ 17  Ti sangaribu agpigergerto maigapu iti pammabalaw ti maysa;+ maigapu iti pammabalaw ti lima agtalawkayto agingga a mabatikayto a kas maysa a palo iti tapaw ti bantay ken kas maysa a pagilasinan iti rabaw ti turod.+ 18  Ket gapuna ni Jehova mangin-inanamanto a maipaayannakayo iti parabur,+ ket ngarud isu tumakderto tapno ipakitaannakayo iti asi.+ Ta ni Jehova maysa a Dios ti panangukom.+ Naragsak+ amin dagidiay mangin-inanama kenkuana.+ 19  Inton dagiti mismo nga umili iti Sion+ agnaeddanto idiay Jerusalem,+ saankanto a pulos agsangit.+ Di bumurong nga ipaayannakanto iti parabur gapu iti uni ti ikkismo; apaman a mangngegna pudno a sungbatannakanto.+ 20  Ket ni Jehova sigurado a mangtedto kadakayo iti tinapay a ti langana ket riribuk ken danum a ti langana ket panangirurumen;+ kaskasdi a ti Naindaklan a Manangisurom saanton nga aglemmeng, ket dagiti matam agbalindanto a matmata a makakita iti Naindaklan a Manangisurom.+ 21  Ket dagiti bukodmo a lapayag makangngegto iti sao iti likudam a kunkunana: “Daytoy ti dalan.+ Magnakayo iti dayta,” no kas pagarigan agpakannawankayto wenno no kas pagarigan agpakannigidkayto.+ 22  Ket masapul a tulawanyo ti kalupkop dagiti kinitikitan a ladawanmo a pirak+ ken ti kimmebkeb nga abbong dagiti sinukog+ nga estatuam a balitok.+ Iwarawaramto ida.+ Kas iti agkadawyan a babai, kunaemto iti dayta: “Rugit laeng!”+ 23  Ket sigurado nga itednanto ti tudo maipaay iti bin-im a dayta ti pangmulam iti daga,+ ken tinapay kas bunga ti daga, nga agbalinto a nataba ken nalanit.+ Dagiti dinguenmo agarabdanto iti dayta nga aldaw iti maysa a nalawa a pagaraban.+ 24  Ket ti bakbaka ken dagiti nataenganen nga asno a mangtaltalon iti daga mangandanto iti taraon a natemplaan iti sorel, a naitaep babaen iti suplad+ ken iti tinidor. 25  Ket iti rabaw ti tunggal natayag a bantay ken iti rabaw ti tunggal nangato a turod maaddanto dagiti baresbes,+ dagiti banawang ti danum, iti aldaw ti dakkel a pananggudas inton dagiti torre marbada.+ 26  Ket ti lawag ti kabus agbalinto a kas iti lawag ti naraniag nga init; ket ti mismo a lawag ti naraniag nga init agbalinto a pito a daras ti kinaraniagna,+ kas iti lawag ti pito nga aldaw, iti aldaw a patapatan ni Jehova ti dunor+ ti ilina ken paimbagenna+ uray ti nakaro a sugat nga imbunga ti saplit nga impaayna. 27  Adtoy! Ti nagan ni Jehova um-umay manipud iti adayo, sumsumged ti ungetna+ ken buyogen dagiti napuskol nga ulep. No maipapan kadagiti bibigna, napnoda iti panangkondenar, ket ti dilana kas iti mangalun-on nga apuy.+ 28  Ket ti espirituna kas iti manglayus a naapres nga ayus a dumanon agingga iti tengnged,+ tapno ilugayogna nga agsublisubli dagiti nasion babaen ti yakayakan+ ti kinaawan pateg; ket ti pangngednged+ a mamagallaalla iti maysa addanto kadagiti panga ti il-ili.+ 29  Maaddaankayto iti kanta+ a kas iti kanta iti rabii a panangsantipikar ti maysa iti bagina maipaay iti piesta,+ ken panagrag-o ti puso a kas iti panagrag-o ti maysa a magmagna nga addaan plauta+ tapno sumrek iti bantay ni Jehova,+ iti Bato ti Israel.+ 30  Ket ni Jehova sigurado nga ipangngegnanto ti kinatan-ok ti timekna+ ket ipakitananto ti panagpababa ti takiagna,+ iti panagrungsot ti unget+ ken iti gil-ayab ti mangalun-on nga apuy+ ken bumayakabak a tudo ken natutudo a bagyo+ ken dagiti uraro.+ 31  Ta gapu iti timek ni Jehova agaligagetto ti Asiria;+ kabilennanto babaen a mismo iti sarukod.+ 32  Ket tunggal panagwasawas ti sarukod ti pannusana a pagdissuento ni Jehova iti Asiria sigurado a buyogento dagiti pandereta ken dagiti arpa;+ ket buyogen dagiti bakal ti panagiwasawas isu pudno a makirupakto kadakuada.+ 33  Ta ti Tofetna+ nayurnos manipud kadagiti nabiit pay a tiempo; naisagana met dayta maipaay iti mismo nga ari.+ Pinaunegna ti gabsuon dayta. Ti apuy ken kayo naruayda. Ti anges ni Jehova, kas iti naapres nga ayus ti asupre, sumsumged a maibusor iti dayta.+

Footnotes