Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Isaias 19:1-25

19  Ti pammakdaar maibusor iti Egipto:+ Adtoy! Ni Jehova sisasakay iti nasiglat nga ulep+ ket um-umay iti Egipto. Ket dagiti awanan pateg a didios ti Egipto sigurado nga agtayegtegdanto gapu kenkuana,+ ket ti mismo a puso ti Egipto marunawto iti tengngana.+  “Ket sugsogakto dagiti Egipcio maibusor kadagiti Egipcio, ket sigurado a makigubatdanto tunggal maysa maibusor iti kabsatna, ken tunggal maysa maibusor iti kaduana, siudad maibusor iti siudad, pagarian maibusor iti pagarian.+  Ket ti espiritu ti Egipto mariribukto iti tengngana,+ ket riribukek ti bukodna a panagem.+ Ket siguradonto nga umamangda kadagiti awanan pateg a didios+ ken kadagiti manangkayaw ken kadagiti mannakiuman iti espiritu ken kadagiti propesional a managipadles iti paspasamak.+  Ket iyawatkonto ti Egipto iti ima ti maysa a naulpit nga apo, ket nabilegto ti ari nga agturay kadakuada,”+ kuna ti pudno nga Apo, ni Jehova ti buybuyot.  Ket ti danum sigurado nga agmaganto iti baybay, ket ti met laeng karayan mamagmaganto ket pudno a maatianan.+  Ket dagiti karayan bumangsitto; dagiti kanal ti Nilo ti Egipto umababawto ken mamagmagan.+ Ti met laeng runo+ ken ti tanutubo agrunotto.  Dagiti pangalbuen a lugar iti igid ti Karayan Nilo, iti wangawangan ti Karayan Nilo, ken tunggal daga a pagbin-ian iti Karayan Nilo agmaganto.+ Sigurado a maipayugpogto, ket awanton.  Ket dagiti mangngalap agleddaangdanto, ket amin dagidiay mangipurpuruak kadagiti banniit iti Karayan Nilo iyebkasdanto ti ladingit, ken uray dagidiay mangiwaywayat kadagiti iket iti rabaw ti danum pudno nga aglumendanto.+  Ket dagiti trabahador iti sinagaysay a lino+ mabainandanto; kasta met dagiti trabahador iti pagabelan kadagiti puraw a lupot. 10  Ket dagiti managabelna+ mailupitlupitdanto, amin dagiti makitegtegged maldaanganto ti kararuada. 11  Dagiti prinsipe ti Zoan+ pudno a maagda. No maipapan kadagidiay masirib kadagiti manangbalakad ni Faraon, ti pammatigmaanda ket banag a di nainkalintegan.+ Kasano a sawenyonto ken Faraon: “Siak ti anak dagidiay masirib, ti anak ti ar-ari iti kadaanan a tiempo”? 12  Sadino, ngarud, ti ayanda—dagiti masirib a tattaom+—tapno ibagada koma ita kenka ken tapno maammuanda no ania ti impatigmaan ni Jehova ti buybuyot maipapan iti Egipto?+ 13  Dagiti prinsipe ti Zoan nagtignayda a simamaag,+ dagiti prinsipe ti Nof+ naallilawda, dagiti kangrunaan a lallaki+ dagiti tribuna pinagallaallada ti Egipto. 14  Ni met laeng Jehova inlaokna iti tengngana ti espiritu ti kinamanaglagaw;+ ket pinagallaallada ti Egipto iti isuamin nga aramidna, no kasano a ti maysa a nabartek mapagallaalla iti sarwana.+ 15  Ket ti Egipto saanto a maaddaan iti aniaman nga aramid a mabalin nga aramiden ti ulo wenno ti ipus, ti saringit wenno ti tanutubo.+ 16  Iti dayta nga aldaw agbalinto ti Egipto a kas iti babbai, ket sigurado nga agpigergerto+ ken agalinggaget gapu iti panagwadawad ti ima ni Jehova ti buybuyot nga isu ti iwadwadawadna a maibusor iti dayta.+ 17  Ket ti daga ti Juda agbalinto a pakaigapuan ti panagibar-ibar ti Egipto.+ Agalinggaget ti isuamin a pangdakamatan ti maysa gapu iti pammatigmaan ni Jehova ti buybuyot nga ipatpatigmaanna a maibusor kenkuana.+ 18  Iti dayta nga aldaw addanto lima a siudad iti daga ti Egipto+ nga agsasao iti pagsasao ti Canaan+ ken agsapsapata+ ken Jehova ti buybuyot. Ti Siudad ti Pannakarakrak ti mayawagto iti maysa a siudad. 19  Iti dayta nga aldaw addanto maysa nga altar ken Jehova iti tengnga ti daga ti Egipto,+ ken maysa nga adigi ken Jehova iti abay ti beddengna. 20  Ket agpaayto dayta a pagilasinan ken pangsaksi ken Jehova ti buybuyot iti daga ti Egipto;+ ta umkisdanto ken Jehova gapu kadagiti manangirurumen,+ ket mangibaonto kadakuada iti manangisalakan, daydiay naindaklan a mismo, a pudno a mangispalto kadakuada.+ 21  Ket ni Jehova sigurado a maipakaammonto kadagiti Egipcio;+ ket dagiti Egipcio masapul a maammuanda ni Jehova iti dayta nga aldaw, ket masapul a mangidatagda iti sakripisio ken sagut+ ket agkarida ken Jehova ket tungpalenda dayta.+ 22  Ket ni Jehova pudno unay a kabilennanto ti Egipto.+ Addanto panangkabil ken panangpaimbag;+ ket agsublidanto ken Jehova,+ ket ipalubosnanto nga isu mapagpakaasianda ket paimbagennanto ida.+ 23  Iti dayta nga aldaw addanto maysa a kangrunaan a kalsada+ manipud iti Egipto nga agturong iti Asiria, ket ti Asiria pudno a sumrekto iti Egipto, ket ti Egipto iti Asiria; ket sigurado a mangipaaydanto iti panagserbi, ti Egipto agraman ti Asiria. 24  Iti dayta nga aldaw agbalinto ti Israel a maikatlo iti Egipto ken iti Asiria,+ awan sabali, maysa a bendision iti tengnga ti daga,+ 25  agsipud ta binendisionanton+ ni Jehova ti buybuyot, a kunkunana: “Bendito koma ti ilik, ti Egipto, ken ti aramid dagiti imak, ti Asiria,+ ken ti tawidko, ti Israel.”+

Footnotes