Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Isaias 1:1-31

1  Ti sirmata+ ni Isaias+ nga anak ni Amoz a nasirmatana maipapan iti Juda ken Jerusalem iti al-aldaw da Ozias,+ Jotam,+ Acaz+ ken Ezekias,+ ar-ari ti Juda:+  Dumngegkayo,+ O langlangit, ket umimdengka, O daga, ta ni met laeng Jehova nagsao: “Nangpatanor ken nangpadakkelak iti annak,+ ngem isuda immalsada maibusor kaniak.+  Ti maysa a toro ammona unay ti nanggatang kenkuana, ket ti asno ammona unay ti pagikulluongan ti makinkukua kenkuana; ti met laeng Israel saanna a naammuan,+ ti bukodko nga ili saan a nagtignay a buyogen ti pannakaawat.”+  Ay-ay pay ti managbasol a nasion,+ ti ili a napadagsenan iti biddut, maysa a bin-i nga agar-aramid iti dakes,+ makadadael nga annak!+ Pinanawanda ni Jehova,+ saanda a rinaem Daydiay Santo ti Israel,+ timmallikudda.+  Sadino pay ti pakakabilanyonto iti ad-adda,+ ta mangnayonkayo pay ti iyaalsa?+ Ti intero nga ulo masaksakit ti kasasaadna, ket ti intero a puso nakapsut.+  Manipud iti dapan ti saka agingga a mismo iti ulo awan nasalun-at a paset iti dayta.+ Sugsugat ken dundunor ken sadiwa a sapsaplit—saan ida a napespes wenno nabedbedan, awan met panangpalamuyot babaen iti lana.+  Ti dagayo langalang,+ dagiti siudadyo napuoran iti apuy;+ ti dagayo—iti sanguananyo a mismo ib-ibusen+ dagiti ganggannaet,+ ket ti panaglangalang kas iti panangduprak dagiti ganggannaet.+  Ket ti anak a babai ti Sion+ napanawanen a kas iti abong-abong iti kaubasan, kas iti pagsiputan a kalapaw iti talon dagiti pipino, kas iti siudad a nabangenan.+  Malaksid no ni met laeng Jehova ti buybuyot nangibati kadatayo iti sumagmamano laeng a nakalasat,+ nagbalintayo koma a kas iti Sodoma, immarngitayo koma iti mismo a Gomorra.+ 10  Denggenyo ti sao ni Jehova,+ dakayo a diktador+ ti Sodoma.+ Imdenganyo ti linteg ti Diostayo, dakayo nga umili ti Gomorra. 11  “Ania ti pagimbagan kaniak ti kinaadu dagiti sakripisioyo?” kuna ni Jehova. “Huston kaniak dagiti sibubukel a daton a mapuoran+ a kalakian a karkarnero+ ken ti taba dagiti napalukmeg nga animal;+ ket iti dara+ dagiti urbon a toro ken dagiti kalakian a kordero ken dagiti kalakian a kalding+ saanak a naragsakan.+ 12  Inton agtultuloykayo nga umay a mangkita iti rupak,+ siasino ti nangalikagum iti daytoy manipud iti imayo, nga ipayatpayatyo dagiti paraangak?+ 13  Isardengyon ti mangyeg iti ad-adu pay nga awanan pateg a datdaton a bukbukel.+ Insienso—nakarimrimon dayta kaniak.+ Baro a bulan+ ken sabbath,+ ti panangayab iti kombension+—diak maanusan ti panangusar iti karkarna a pannakabalin+ a maibuyog iti nadaeg a gimong. 14  Dagiti baro a bulanyo ken dagiti panawen ti piestayo ginura ti kararuak.+ Nagbalinda kaniak a dadagsen;+ nabannogakon a mangan-anus kadakuada.+ 15  Ket inton iyukradyo dagiti dakulapyo,+ ilingedko dagiti matak manipud kadakayo.+ Uray no mamin-adu nga agkararagkayo,+ saanak nga umimdeng;+ dagiti mismo nga imayo napnoda iti panagibukbok iti dara.+ 16  Bugguanyo ti bagbagiyo;+ dalusanyo ti bagbagiyo;+ ikkatenyo ti kinadakes dagiti pannakilangenyo manipud sanguanan dagiti matak;+ sumardengkayo nga agaramid iti dakes.+ 17  Sursuruenyo ti agaramid iti naimbag;+ birokenyo ti kinahustisia;+ ilintegyo ti manangirurumen;+ mangukomkayo a maipaay iti awan amana nga ubing;+ irupiryo ti kalintegan ti balo a babai.”+ 18  “Umaykayo, ita, ket ilintegtayo koma ti bambanag iti nagbabaetantayo,” kuna ni Jehova.+ “Uray no ti basbasolyo kasla koma eskarlata, mapapudawdanto a kasla niebe;+ uray no nalabagada koma a kasla carmesi a lupot, agbalindanto pay ketdi a kasla delana. 19  No ipakitayo ti kinatulok ket umimdengkayo, kanenyonto ti imbag ti daga.+ 20  Ngem no agkedkedkayo+ ket pudno a rebeliosokayo, maibuskayto babaen iti kampilan; ta ti mismo a ngiwat ni Jehova sinaona dayta.”+ 21  O anian ta ti matalek nga ili+ nagbalin a balangkantis!+ Napno idi iti kinahustisia;+ ti met laeng kinalinteg agdagdagus idi kenkuana,+ ngem itan manangpapatay.+ 22  Ti met laeng pirakmo nagbalin a naggugoran a rugit.+ Ti serbesam a trigo natibnokan iti danum.+ 23  Dagiti prinsipem nasungitda ken kakadua dagiti mannanakaw.+ Tunggal maysa kadakuada ket managayat iti pasuksok+ ken manangkamakam kadagiti sagut.+ Maipaay iti awan amana nga ubing saanda a mangukom; ket uray ti legal a kaso ti balo a babai saan a maawat kadakuada.+ 24  Gapuna ti sao ti pudno nga Apo, ni Jehova ti buybuyot, Daydiay Mannakabalin ti Israel,+ ket: “Aha! Pabang-arakto ti bagik kadagiti kalabanko, ket ibalesakto+ ti bagik kadagiti kabusorko.+ 25  Ket ibaw-ingkonto ti imak kenka, ket tunawekto nga ikkaten dagiti naggugoran a rugitmo a kas iti turo, ket ikkatekto amin a rugitmo.+ 26  Ket mangisubliakto manen kadagiti ukom maipaay kenka kas idi damo, ken kadagiti manangbalakad maipaay kenka kas idi rugi.+ Kalpasan daytoy maawagankanto iti Siudad ti Kinalinteg, Matalek nga Ili.+ 27  Babaen ti kinahustisia masubbotto ti mismo a Sion,+ ket dagidiay agsubsubli a kamengna, babaen ti kinalinteg.+ 28  Ket ti pannakarpuog dagiti managalsa ken dagiti managbasol aggiddanto,+ ket dagidiay mangbaybay-a ken Jehova aggibusdanto.+ 29  Ta ibaindanto dagiti nabileg a kayo a tinarigagayanyo,+ ket maab-abikayto gapu kadagiti minuyongan a piniliyo.+ 30  Ta agbalinkayto a kas iti dakkel a kayo a malaylaylay ti bulbulongna,+ ken kas iti minuyongan nga awanan danum. 31  Ket ti nakired a tao pudno unay nga agbalinto a lapnit,+ ket ti bunga ti aramidna maysa a rissik; ket pudno unay nga agpadpadada a mapuoranto nga aggiddan, nga awan asinoman a mangiddep.”+

Footnotes