Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Hebreo 13:1-25

13  Agtultuloy koma ti nainkabsatan nga ayatyo.+  Dikay lipatan ti kinamanagpadagus,+ ta babaen iti dayta ti dadduma, saanda a pagaammo, nangsangailida kadagiti anghel.+  Sipapanunotkayo koma kadagidiay sipaparaut iti pagbaludan+ a kasla naparautankayo a nairaman kadakuada,+ ken dagidiay dakes ti pannakatratoda,+ yantangay dakayo met addakay pay laeng iti bagi.  Ti panagasawa nadayaw koma iti tengnga dagiti isuamin, ket ti pagiddaan ti agassawa awan koma ti tulawna,+ ta ti Dios ukomennanto dagiti mannakiabig ken dagiti mannakikamalala.+  Ti wagas ti panagbiagyo siwayawaya koma iti panagayat iti kuarta,+ bayat a mapnekkayo+ iti agdama a bambanag.+ Ta kinunana: “Saankanto a pulos panawan ket saankanto a pulos baybay-an.”+  Iti kasta mabalintayo ti agtalged+ ket sawentayo: “Ni Jehova ti katulongak; saanakto nga agbuteng. Ania ti maaramidan kaniak ti tao?”+  Laglagipenyo dagidiay mangidadaulo kadakayo,+ isuda a nangisao kadakayo ti sao ti Dios, ket bayat nga ut-utobenyo ti pagbanagan ti kababalinda tuladenyo+ ti pammatida.+  Ni Jesu-Kristo isu met laeng idi kalman ken ita, ken iti agnanayon.+  Dikay paallukoy iti nadumaduma ken karkarna a sursuro;+ ta nasayaat a ti puso maipaayan iti kinatibker babaen ti di kaikarian a kinamanangngaasi,+ saan a babaen kadagiti makan,+ a saan a nakagunggonaan dagidiay nakumikom kadagita. 10  Addaantayo iti altar nga iti dayta dagidiay mangaramid iti sagrado a panagserbi idiay tolda awan autoridadda a mangan.+ 11  Ta dagiti bagi dagidiay animal a ti darada iserrek ti nangato a padi idiay nasantuan a disso maipaay iti basol ket mapuoran idiay ruar ti pakarso.+ 12  Gapuna ni Jesus met, tapno masantipikarna+ ti ili babaen iti bukodna a dara,+ nagsagaba idiay ruar ti ruangan.+ 13  Ngarud, mapantayo koma kenkuana idiay ruar ti pakarso, nga awitentayo ti pannakaumsi nga inawitna,+ 14  ta awanantayo ditoy iti siudad a mataginayon,+ no di ket sipapasnek a sapsapulentayo daydiay umay.+ 15  Baeten kenkuana kankanayon koma nga idatontayo iti Dios ti sakripisio ti panagdaydayaw,+ kayatna a sawen, ti bunga dagiti bibig+ a mangaramid iti publiko a panangideklara iti naganna.+ 16  Mainayon pay, dikay lipatan ti panagaramid iti naimbag+ ken ti panangiranud iti bambanag iti sabsabali, ta babaen iti kakasta a sakripisio maay-ayo a naan-anay ti Dios.+ 17  Agtulnogkayo kadagidiay mangidadaulo kadakayo+ ket agpasakupkayo,+ ta agtultuloy a bambantayanda dagiti kararuayo a kasla isudanto dagidiay manungsungbat;+ tapno aramidenda daytoy a buyogen ti panagrag-o ket saan a buyogen ti panagsennaay, ta daytoy ket makadangran kadakayo.+ 18  Itultuloydakami nga ikararagan,+ ta agtalekkami nga addaankami iti napudno a konsiensia, yantangay kayatmi ti agbiag a mapagtalkan iti amin a bambanag.+ 19  Ngem bagbagaankayo a nangnangruna pay nga aramidenyo daytoy, tapno maisubliak kadakayo iti kabiitan a panawen.+ 20  Ita ti Dios ti talna,+ a nangaon manipud kadagiti natay+ iti naindaklan a pastor+ dagiti karnero+ nga addaan iti dara ti maysa nga agnanayon a tulag,+ ni Apotayo a Jesus, 21  kabalannakayo koma iti tunggal naimbag a banag tapno aramidenyo ti pagayatanna, nga aramidenna kadatayo babaen ken Jesu-Kristo daydiay makaay-ayo unay iti imatangna;+ kenkuana maadda koma ti dayag iti agnanayon ken awan inggana.+ Amen. 22  Ita bagbagaankayo, kakabsat, nga anusanyo daytoy a sao a pammaregta, ta, pudno unay, nangputarak iti surat kadakayo iti sumagmamano a sasao.+ 23  Ammuenyo a ni kabsattayo a Timoteo+ naluk-atanen, a, no isu umay iti mabiit, kaduakto a kumita kadakayo. 24  Idanonyo dagiti kablaawko kadagidiay amin a mangidadaulo+ kadakayo ken kadagiti amin a sasanto. Dagidiay adda iti Italia+ ipaw-itda dagiti kablaawda kadakayo. 25  Ti di kaikarian a kinamanangngaasi+ maadda koma kadakayo amin.

Footnotes