Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Genesis 48:1-22

48  Ket naaramid kalpasan dagitoy a banag a naikuna ken Jose: “Adtoy, ti amam kumapkapuyen.” Iti kasta inkuyogna ti dua nga annakna nga isu da Manases ken Efraim.+  Kalpasanna naipadamag dayta ken Jacob ket naikuna: “Adtoy ti anakmo a ni Jose immay kenka.” Gapuna inkarkarigatan ni Israel ket bimmangon a nagtugaw iti sopana.  Ket ni Jacob kinunana ken Jose: “Ti Dios a Mannakabalin-amin nagparang kaniak idiay Luz+ iti daga ti Canaan tapno isu mabendisionannak.+  Ket kinunana kaniak, ‘Adtoy pagbalinenka a nabunga,+ ket paaduenkanto ken pagbalinenkanto a kongregasion dagiti ili+ ket itedkonto daytoy a daga iti bin-im a sumaruno kenka a maipaay a sanikua agingga iti tiempo a di nakedngan.’+  Ket ita ti dua nga annakmo a nayanak kenka iti daga ti Egipto sakbay nga immayak kenka iti Egipto, kukuak ida.+ Da Efraim ken Manases agbalindanto a kukuak a kas kada Ruben ken Simeon.+  Ngem ti annakmo a pagbalinamto nga ama a sumaruno kadakuada agbalindanto a kukuam. Mairaman iti nagan ti kakabsatda maawagandanto iti tawidda.+  Ket no maipapan kaniak, idi um-umayak manipud Padan,+ natay ni Raquel+ iti sibayko idiay daga ti Canaan iti dalan bayat nga adda pay nawatiwat a daga sakbay a dumteng iti Efrat,+ iti kasta intabonko sadiay iti dalan nga agturong iti Efrat, kayatna a sawen, Betlehem.”+  Kalpasanna nakita ni Israel ti annak ni Jose ket kinunana: “Siasino dagitoy?”+  Gapuna ni Jose kinunana ken amana: “Isuda ti annakko nga inted kaniak ti Dios iti daytoy a lugar.”+ Gapu itoy kinunana: “Pangngaasim, iyegmo ida kaniak tapno mabendisionak ida.”+ 10  Ita dagiti mata ni Israel nalidemen gapu iti kinalakay.+ Isu saan idi a makakita. Iti kasta inyasidegna ida kenkuana, ket kalpasanna inagkanna ida ken inarakupna ida.+ 11  Ket ni Israel kinunana ken Jose: “Diak impagarup a makitak ti rupam,+ ngem adtoy pinalubosannak ti Dios a makitak met ti putotmo.” 12  Kalpasan dayta inyadayo ida ni Jose kadagiti tumengna, ket isu nagruknoy a ti rupana dumanon iti daga.+ 13  Ni Jose innalana ita ida a dua, ni Efraim iti makannawanna nga ipan iti makannigid ni Israel,+ ket ni Manases iti makannigidna nga ipan iti makannawan ni Israel,+ ket inyasidegna ida kenkuana. 14  Nupay kasta, inyunnat ni Israel ti makannawan nga imana ket insaadna iti ulo ni Efraim,+ nupay isu ti ub-ubing,+ ket ti makannigid nga imana iti rabaw ti ulo ni Manases.+ Inrantana nga impatay dagiti imana a kasta, yantangay ni Manases ti inauna.+ 15  Ket binendisionanna ni Jose ket kinunana:+ “Ti pudno a Dios nga iti sanguananna nagna da ammak nga Abraham ken Isaac,+ Ti pudno a Dios a nangipaspastor kaniak bayat ti intero a kaaddak agingga itoy nga aldaw,+ 16  Ti anghel a nangal-alangon kaniak iti isuamin a didigra,+ bendisionanna dagiti ubbing.+ Ket ti naganko mayawag koma kadakuada ken ti nagan dagiti ammak, da Abraham ken Isaac,+ Ket umaduda koma nga agbalin nga umariwekwek iti tengnga ti daga.”+ 17  Idi nakita ni Jose a pinagtalinaed ni amana a naisaad ti makannawan nga imana iti ulo ni Efraim, saan a nakaay-ayo dayta kenkuana,+ ket pinadasna nga iggaman ti ima ni amana tapno ikkatenna iti ulo ni Efraim nga ipan iti ulo ni Manases.+ 18  Ngarud ni Jose kinunana ken amana: “Saan a kasta, amak, agsipud ta daytoy ti inauna.+ Isaadmo ti makannawan nga imam iti ulona.” 19  Ngem nagtultuloy a nagkitakit ni amana ket kinunana: “Ammok dayta, anakko, ammok dayta. Isu agbalinto met a maysa nga ili ket isu agbalinto met a naindaklan.+ Ngem, uray pay kasta, ti ub-ubing a kabsatna agbalinto a dakdakkel ngem isu,+ ket ti putotna agbalinto a naan-anay a kaibatogan dagiti nasion.”+ 20  Ket intultuloyna a bendisionan ida iti dayta nga aldaw,+ a kunkunana: “Babaen kenka maulit-ulit koma nga iyebkas ti Israel ti pamendision, a kunkunana, ‘Ti Dios pagbalinennaka koma a kas ken Efraim ken kas ken Manases.’”+ Gapuna intultuloyna nga insaad ni Efraim iti sanguanan ni Manases.+ 21  Kalpasan dayta ni Israel kinunana ken Jose: “Adtoy, matayakon,+ ngem ti Dios sigurado nga agtultuloyto nga adda kadakayo ket isublinakayo iti daga dagidi ammayo.+ 22  No maipapan kaniak, itedko kenka ti maysa a deppaar ti daga a nangnangruna ngem iti kakabsatmo,+ nga innalak iti ima dagiti Amoreo babaen ti kampilanko ken babaen ti baik.”

Footnotes