Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Genesis 44:1-34

44  Idi agangay binilinna ti tao nga agay-aywan iti balayna,+ a kunkunana: “Punnuem iti taraon dagiti supot ti lallaki agingga a kabaelanda nga awiten dayta ket ikabilmo ti kuarta ti tunggal maysa iti ngarab ti supotna.+  Ngem masapul nga ikabilmo ti kopak, ti pirak a kopa, iti ngarab ti supot ti inaudian ken ti kuarta maipaay iti bukbukelna.” Gapuna inaramidna ti maitunos iti sao ni Jose a sinaona.+  Ti bigat naglawagen idi napalubosan dagiti lallaki,+ agpadpada nga isuda ken dagiti asnoda.  Rimmuarda manipud iti siudad. Saanda pay a nakaadayo idi a kinuna ni Jose iti tao nga agay-aywan iti balayna: “Tumakderka! Kamatem dagiti lallaki ket siguraduem a kamakamen ida ken kunaen kadakuada, ‘Apay a dakes ti insupapakyo iti naimbag?+  Saan aya a daytoy ti banag a paginuman ni apok ket babaen iti dayta isu agbasa a silalaing kadagiti partaan?+ Dakes nga aramid ti inaramidyo.’”  Iti kamaudiananna nakamakamna ida ket sinaona kadakuada dagitoy a sasao.  Ngem kinunada kenkuana: “Apay nga agsao ti apok iti sasao a kas kadagitoy? Narigat a pagarupen a dagiti adipenmo aramidenda koma ti aniaman a kas itoy.  Ay ket, ti kuarta a nasarakanmi iti ngarab dagiti supotmi insublimi kenka manipud iti daga ti Canaan.+ Kasano koma, ngarud, nga agtakawkami iti pirak wenno balitok iti balay ti apom?+  Ti maysa kadagiti adipenmo a pakasarakan iti dayta matay koma ket dakami agbalinkami met koma nga ad-adipen iti apok.”+ 10  Gapuna kinunana: “Maaramid koma ita nga apagpag-isu maitunos iti sasaoyo.+ Ngarud daydiay pakasarakan iti dayta agbalinto nga adipenko,+ ngem dakayo mapaneknekankayto nga awanan basol.” 11  Iti kasta sidadaras nga imbabada iti daga tunggal maysa ti supotna ket linuktanda tunggal maysa ti bukodna a supot. 12  Ket nagsuksukimat a siaannad. Inrugina iti inauna ket nalpas iti inaudian. Iti kamaudianan nasarakan ti kopa iti supot ni Benjamin.+ 13  Idin rinay-abda dagiti kagayda+ ket binagkatda tunggal maysa ti awitna nga insubli iti asnona ket nagsublida iti siudad. 14  Ket ni Juda+ ken ti kakabsatna napanda iti balay ni Jose, ket isu adda pay laeng idi sadiay; ket nagruknoyda iti sanguananna agingga iti daga.+ 15  Kinuna ita kadakuada ni Jose: “Ania a kita ti aramid daytoy inaramidyo? Saanyo kadi nga ammo a ti maysa a lalaki kas kaniak kabaelanna ti agbasa a silalaing kadagiti partaan?”+ 16  Gapu itoy inyebkas ni Juda: “Ania ti mabalinmi a kunaen iti apok? Ania ti mabalinmi a sawen? Ket kasano a mapaneknekanmi ti bagbagimi a nalinteg?+ Ti pudno a Dios nasarakanna ti biddut dagiti adipenmo.+ Adtoy ad-adipenkami iti apok,+ agpadpada a dakami ken daydiay nga iti imana nasarakan ti kopa!” 17  Nupay kasta, kinunana: “Narigat a pagarupen kaniak nga aramidek daytoy!+ Ti lalaki nga iti imana ti nakasarakan ti kopa isu ti agbalinto nga adipenko.+ No maipapan iti dadduma kadakayo, sumang-atkayo a sitatalna ken amayo.”+ 18  Immasideg ita kenkuana ni Juda ket kinunana: “Gumawawaak kenka, apok, pangngaasim bay-am nga agsao ti adipenmo iti maysa a sao iti pagdengngeg ti apok,+ ket saanmo a bay-an a bumara ti ungetmo+ maibusor iti adipenmo, agsipud ta kaslaka met laeng ken Faraon.+ 19  Ti apok nagimtuod kadagiti adipenna, a kunkunana: ‘Addaankayo kadi iti ama wenno iti kabsat a lalaki?’ 20  Gapuna kinunami iti apok, ‘Addaankami iti lakayen nga ama ken anak iti kinalakayna, ti inaudian.+ Ngem ti kabsatna natayen iti kasta isu laeng ti nabati ni inana,+ ket isu ay-ayaten ni amana.’ 21  Kalpasan dayta kinunam kadagiti adipenmo, ‘Isu isalogyo nga iyeg kaniak tapno maikitak ti matak kenkuana.’+ 22  Ngem kinunami iti apok, ‘Ti ubing saanna a mabalin a panawan ti amana. No panawanna ti amana, isu sigurado a matayto.’+ 23  Idin kinunam kadagiti adipenmo, ‘Malaksid no ti inaudian a kabsatyo sumalog a kaduayo, saanyo a makitan ti rupak uray kaanoman.’+ 24  “Ket naaramid a simmang-atkami a napan iti adipenmo nga amak ket kalpasanna imbagami kenkuana ti sasao ti apok. 25  Idi agangay kinuna ni amami, ‘Agsublikayo, gumatangkayo iti bassit a taraon maipaay kadatayo.’+ 26  Ngem kinunami, ‘Saanmi a mabalin ti sumalog. No kaduami ti inaudian a kabsatmi sumalogkaminto, agsipud ta saanmi a mabalin a kitaen ti rupa ti lalaki no kas pagarigan saanmi a kadua ti inaudian a kabsatmi.’+ 27  Idin ti adipenmo nga amak kinunana kadakami, ‘Dakayo pagaammoyo unay a ti asawak nangipasngay kaniak iti dua laeng nga annak.+ 28  Idi agangay simmina kaniak ti maysa ket inyebkasko: “Ah, sigurado nga isu marangrangkay!”+ ket saankon a nakita agingga ita. 29  No alaenyo met daytoy iti imatangko ket mapagteng kenkuana ti maysa a makapapatay nga aksidente, pudno unay nga ibabayonto dagiti ubanko idiay Sheol buyogen ti didigra.’+ 30  “Ket ita, apaman a dumtengakto iti adipenmo nga amak nga awan ti ubing a kakuyogmi, idinto ta ti kararua daydiay ket naisinggalut iti kararua daytoy,+ 31  ngarud sigurado a mapasamak nga apaman a makitana nga awan sadiay ti ubing isu matayto la ketdi, ket dagiti adipenmo pudno nga ibabadanto dagiti uban ti adipenmo nga amami a silaladingit idiay Sheol. 32  Ta ti adipenmo nagbalin a pammasiguro+ maipaay iti ubing bayat nga adayo iti amana, a kinunak, ‘No mapaayak a mangisubli kenka, iti kasta nagbasolakto iti amak iti agnanayon.’+ 33  Gapuna ita, pangngaasim, bay-am nga agbati ti adipenmo imbes a ti ubing kas adipen ti apok, tapno ti ubing sumang-at koma a kadua ti kakabsatna.+ 34  Ta kasano a sumang-atak a mapan ken amak nga awan ti ubing a kakuyogko, ta amangan no kalpasanna makitak ti didigra a dumtengto iti amak?”+

Footnotes