Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Genesis 41:1-57

41  Ket naaramid iti ngudo ti intero a dua a tawen a ni Faraon nagtagtagainep+ ket adtoy isu agtaktakder idi iti igid ti karayan Nilo.  Ket adtoy sumangsang-at idi manipud karayan Nilo ti pito a baka a napintas ti langada ken nalukmeg ti panaglaslasagda, ket nagar-arabda iti tengnga ti karuotan ti Nilo.+  Ket adtoy adda idi pito a sabsabali pay a baka a sumangsang-at a simmaruno kadakuada manipud karayan Nilo, naalas ti langada ken nakuttong ti panaglaslasagda,+ ket nagtakderda iti sibay dagiti baka iti igid ti karayan Nilo.  Kalpasanna dagiti baka a naalas ti langada ken nakuttong ti panaglaslasagda rinugianda a lamuten ti pito a baka a napintas ti langada ken nalulukmeg.+ Iti daytoy nariing ni Faraon.+  Nupay kasta, nagsubli a maturog ket nagtagtagainep iti maikadua a daras. Ket adtoy adda idi pito a dawa ti bukel a tumtumpuar iti maymaysa nga ungkay, nalulukmeg ken nasasayaat.+  Ket adtoy adda idi pito a dawa ti bukel, nakukuttong ken ginango ti wayaway nga angin,+ a dumakdakkel a simmaruno kadakuada.+  Ket dagiti nakukuttong a dawa ti bukel rinugianda nga alun-onen ti pito a nalulukmeg ken namsek a dawa ti bukel.+ Iti daytoy nariing ni Faraon ket adtoy maysa idi a tagtagainep.  Ket naaramid iti bigat a ti espirituna nariribukan.+ Gapuna nagbaon ket pinaayabanna amin dagiti managsalamangka a papadi ti Egipto+ ken amin dagiti masirib a tattaona,+ ket insalaysay kadakuada ni Faraon dagiti tagtagainepna.+ Ngem awan kadakuada ti manangibuksil maipaay ken Faraon.  Idin ti panguluen dagiti agaw-awit iti kopa nakisao ken Faraon,+ a kunkunana: “Dagiti basolko dakamatek ita nga aldaw.+ 10  Nagrurod ni Faraon kadagiti adipenna.+ Gapuna inyawatnak iti pagbaludan iti balay ti panguluen dagiti para-guardia,+ dakami nga agpadpada iti panguluen dagiti panadero. 11  Kalpasan dayta agpadpadakami a nagtagtagainep iti tagtagainep iti maymaysa a rabii, dakami nga agpadpada. Nagtagtagainepkami tunggal maysa iti tagtagainepna nga addaan iti bukodna a kayulogan.+ 12  Ket adda idi kaduami sadiay a maysa nga agtutubo a lalaki, maysa a Hebreo,+ maysa nga adipen ti panguluen dagiti para-guardia.+ Idi insalaysaymi ida kenkuana,+ imbuksilanna kadakami dagiti tagtagainepmi. Imbuksilanna iti tunggal maysa sigun iti tagtagainepna. 13  Ket napasamak a kas ti panangibuksilna kadakami kasta ti naaramid. Siak insublinak iti akemko,+ ngem isu imbitayna.”+ 14  Ket ni Faraon nagbaon ket pinaayabanna ni Jose,+ tapno iyegda a sidadaras manipud iti abut a pagbaludan.+ Ngarud nagkiskis+ ken sinukatanna dagiti kagayna+ ket simrek a napan ken Faraon. 15  Idin ni Faraon kinunana ken Jose: “Nagtagtagainepak iti maysa a tagtagainep, ngem awan ti manangibuksil iti dayta. Ita siak nangngegko a naikuna maipapan kenka a kabalinam a denggen ti maysa a tagtagainep ken ibuksilan dayta.”+ 16  Gapu itoy ni Jose simmungbat ken Faraon, a kunkunana: “Saan a kasapulan a maibilangak! Ti Dios iwaragawagnanto ti pagimbagan ken Faraon.”+ 17  Ket ni Faraon sinaona ken Jose: “Iti tagtagainepko adtoy agtaktakderak idi iti igid ti karayan Nilo. 18  Ket adtoy pito a baka a nalukmeg ti panaglaslasagda ken napintas ti pormada ti sumangsang-at idi manipud karayan Nilo, ket rinugianda ti agarab kadagiti karuotan ti Nilo.+ 19  Ket adtoy adda idi pito a sabsabali pay a baka a sumangsang-at a simmaruno kadakuada, nakigteng ken dakes unay ti pormada ken nakuttong ti panaglaslasagda.+ Iti kinadakes saanak pay a nakakita iti kaaspingda iti intero a daga ti Egipto. 20  Ket dagiti pairpair ken dakes a baka rinugianda a lamuten ti immuna a pito a nalukmeg a baka.+ 21  Gapuna dagitoy dimmanonda kadagiti tianda, ket kaskasdi saan nga ammo a dimmanonda kadagiti tianda, ta ti langada dakes idi a kas iti rugi.+ Iti dayta nariingak. 22  “Kalpasan dayta nakitak iti tagtagainepko ket adtoy adda idi pito a dawa ti bukel a tumtumpuar iti maymaysa nga ungkay, namsek ken nasasayaat.+ 23  Ket adtoy adda idi pito a dawa ti bukel a kimbet, nakuttong, ginango ti wayaway nga angin,+ a dumakdakkel a simmaruno kadakuada. 24  Ket dagiti nakukuttong a dawa ti bukel rinugianda nga alun-onen ti pito a nasasayaat a dawa ti bukel.+ Gapuna insaok dayta kadagiti managsalamangka a papadi,+ ngem awan ti makaibaga kaniak.”+ 25  Idin ni Jose kinunana ken Faraon: “Ti tagtagainep ni Faraon maymaysa. No ania ti aramiden ti pudno a Dios imbagana ken Faraon.+ 26  Ti pito a nasasayaat a baka ket pito a tawen. Kasta met ti pito a nasasayaat a dawa ti bukel ket pito a tawen. Ti tagtagainep maymaysa. 27  Ket ti pito a pairpair ken dakes a baka a simmang-at a simmaruno kadakuada ket pito a tawen; ket ti pito nga eppes a dawdawa ti bukel, ginango ti wayaway nga angin,+ isunto ti pito a tawen ti nakaro a bisin.+ 28  Daytoy ti banag a sinaok ken Faraon: No ania ti aramiden ti pudno a Dios impakitana ken Faraon.+ 29  “Adtoy adda pito a tawen nga um-umay buyogen ti dakkel a kinaruay iti intero a daga ti Egipto. 30  Ngem pito a tawen ti nakaro a bisin sigurado a tumaudto a sumaruno kadakuada, ket ti isuamin a kinaruay iti daga ti Egipto sigurado a malipatanto ket ti nakaro a bisin ibusennanto laeng ti daga.+ 31  Ket ti kinaruay nga iti naminsan adda iti daga saanto a maammuan kas bunga dayta a nakaro a bisin kalpasanna, agsipud ta sigurado a nakaronto unay dayta. 32  Ket ti kinapudno a ti tagtagainep naulit ken Faraon iti namindua kaipapananna a ti banag naipasdek a sititibker iti biang ti pudno a Dios,+ ket sipapardas nga aramiden dayta ti pudno a Dios.+ 33  “Gapuna ita sumapul koma ni Faraon iti lalaki a masirib ken nasaririt ket isaadna nga agaywan iti daga ti Egipto.+ 34  Agtignay koma ni Faraon ket mangdutok kadagiti manangaywan iti daga,+ ket masapul nga alaenna ti apagkalima ti daga ti Egipto bayat ti pito a tawen ti kinaruay.+ 35  Ket ummongenda koma dagiti amin a pagtaraon kadagitoy umay a nasasayaat a tawen, ket mangipempenda koma iti bukbukel iti sidong ti ima ni Faraon kas dagiti pagtaraon kadagiti siudad,+ ket masapul a saluadanda dayta. 36  Ket dagiti pagtaraon masapul nga agserbida nga abasto maipaay iti daga iti pito a tawen ti nakaro a bisin, a tumaudto iti daga ti Egipto,+ tapno ti daga saan koma a magessat babaen ti nakaro a bisin.”+ 37  Ala ket, ti banag naimbag idi kadagiti mata ni Faraon ken dagiti amin nga adipenna.+ 38  Gapuna kinuna ni Faraon kadagiti adipenna: “Adda aya masarakan a sabali pay a lalaki a kas iti daytoy a tao nga adda kenkuana ti espiritu ti Dios?”+ 39  Kalpasan dayta ni Faraon kinunana ken Jose: “Yantangay ti Dios impakaammona kenka amin daytoy,+ awan ti asinoman a masirib ken nasaririt a kas kenka.+ 40  Sika a mismo ti agaywanto iti balayko,+ ket amin dagiti tattaok pagtulnogandakanto a naan-anay.+ Iti laeng trono a dakdakkelakto ngem sika.”+ 41  Ket ni Faraon innayonna ken Jose: “Kitaem, isaadka nga agaywan iti intero a daga ti Egipto.”+ 42  Iti kasta inikkat ni Faraon ti pangtanda a singsingna+ iti bukodna nga ima ket inkabilna iti ima ni Jose ket kinawesanna kadagiti kawes a napino a lienso ket nangyukkor iti kuentas a balitok iti tengngedna.+ 43  Mainayon pay, isu pinagluganna iti maikadua a karuahe ti dayaw nga adda kenkuana,+ tapno ipukkawda koma iti masanguananna, “A·vrékh!” iti kasta insaadna nga agaywan iti intero a daga ti Egipto. 44  Ket ni Faraon kinunana pay ken Jose: “Siak ni Faraon, ngem no awan pammalubosmo awan ti tao a makaingato iti imana wenno sakana iti intero a daga ti Egipto.”+ 45  Kalpasan dayta ni Faraon pinanagananna ni Jose iti Zafenat-panea ket intedna kenkuana ni Asenat+ nga anak a babai ni Potifera a padi ti On+ kas asawa. Ket ni Jose rinugianna ti rummuar a mangpasiar iti daga ti Egipto.+ 46  Ket tallopulo ti tawen ni Jose+ idi nagtakder iti saklang ni Faraon nga ari ti Egipto. Kalpasanna rimmuar ni Jose manipud saklang ni Faraon ket nagsursor iti intero a daga ti Egipto. 47  Ket bayat ti pito a tawen ti kinaruay nagtultuloy ti daga a nangpataud iti rinakrakem.+ 48  Ket inum-ummongna dagiti amin a pagtaraon ti pito a tawen a dimteng iti daga ti Egipto ket dagiti pagtaraon ikabilna kadagiti siudad.+ Dagiti pagtaraon iti talon nga adda iti aglikmut ti maysa a siudad ikabilna iti tengnga dayta.+ 49  Ket nagtultuloy a nagipempen ni Jose iti bukbukel a nakaad-adu unay,+ kas iti darat ti baybay, agingga a kamaudiananna simmukoda a mangbilang iti dayta, agsipud ta awanan idin iti bilang.+ 50  Ket sakbay a dimteng ti tawen ti nakaro a bisin adda nayanak ken Jose a dua nga annak,+ nga impasngay kenkuana ni Asenat nga anak ni Potifera a padi ti On. 51  Gapuna ni Jose pinanagananna ti inauna iti Manases,+ agsipud ta, kas panangadaw kenkuana, “Ti Dios pinalipatna kaniak ti isuamin a riribukko ken ti intero a balay ni amak.”+ 52  Ket pinanagananna ti maikadua iti Efraim,+ agsipud ta, kas panangadaw kenkuana, “Ti Dios pinagbalinnak a nabunga iti daga ti kinapimpimanko.”+ 53  Ket ti pito a tawen ti kinaruay a naadda iti daga ti Egipto nagin-inut a naturpos,+ 54  ket, kalpasanna, ti pito a tawen ti nakaro a bisin nangrugi a dumteng, kas iti kinuna ni Jose.+ Ket ti nakaro a bisin timmanor iti amin a dagdaga, ngem iti intero a daga ti Egipto adda idi masarakan a tinapay.+ 55  Kamaudiananna ti intero a daga ti Egipto nagbisin iti nakaro ket dagiti tattao nangrugida nga umkis ken Faraon maipaay iti tinapay.+ Idin kinuna ni Faraon kadagiti amin nga Egipcio: “Mapankayo ken Jose. Aniaman a sawenna kadakayo, aramidenyo.”+ 56  Ket ti nakaro a bisin naadda iti isuamin a rabaw ti daga.+ Idin rinugian a luktan ni Jose dagiti amin a pagidulinan iti bukbukel nga adda idi iti tengngada ket naglako kadagiti Egipcio,+ ta ti nakaro a bisin immirut ti panangpetpetna iti daga ti Egipto. 57  Mainayon pay, dagiti tattao iti intero a daga immayda iti Egipto tapno gumatangda ken Jose, agsipud ta ti nakaro a bisin nairut ti panangpetpetna iti intero a daga.+

Footnotes