Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Genesis 40:1-23

40  Ita kalpasan dagitoy a banag naaramid a ti agaw-awit iti kopa+ ti ari ti Egipto ken ti panadero nagbasolda a maikaniwas iti apoda nga ari ti Egipto.+  Ket nagrurod ni Faraon iti dua nga opisialna,+ iti panguluen dagiti agaw-awit iti kopa ken iti panguluen dagiti panadero.+  Gapuna inyawatna ida iti pagbaludan iti balay ti panguluen dagiti para-guardia,+ iti balay a pagbaludan,+ ti lugar a sadiay ni Jose maysa a balud.  Idin ti panguluen dagiti para-guardia tinudinganna ni Jose a makikadua kadakuada tapno makapagserbi kadakuada;+ ket nagtalinaedda iti pagbaludan iti sumagmamano nga aldaw.  Ket isuda a dua nagtagtagainepda iti tagtagainep,+ tunggal maysa ti bukodna a tagtagainep iti maymaysa a rabii,+ tunggal maysa ti tagtagainepna nga addaan bukodna a kayulogan,+ ti agaw-awit iti kopa ken ti panadero a kukua ti ari ti Egipto isuda a balud iti balay a pagbaludan.+  Idi napan kadakuada ni Jose iti bigat ket nakitana ida, ay ket, adtoy naliday ti langada.+  Ket rinugianna ti agimtuod kadagiti opisial ni Faraon a kakaduana iti pagbaludan iti balay ni apona, a kunkunana: “Iti ania a rason a naliday dagiti rupayo ita nga aldaw?”+  Gapu itoy kinunada kenkuana: “Nagtagtagainepkami iti tagtagainep, ket awan kadakami ti manangibuksil.” Gapuna kinuna kadakuada ni Jose: “Saan aya a dagiti kayulogan kukua ti Dios?+ Isalaysayyo kaniak, pangngaasiyo.”  Ket ti panguluen dagiti agaw-awit iti kopa insalaysayna ken Jose ti tagtagainepna ket kinunana kenkuana: “Iti tagtagainepko, ay ket, adtoy adda idi maysa a puon ti ubas iti sanguanak. 10  Ket iti puon ti ubas adda tallo a saringit, ket kasla mangpatpatubo kadagiti tarubo.+ Dagiti sabongna timpuarda. Dagiti raayna linuomda dagiti ubasda. 11  Ket ti kopa ni Faraon adda idi iti imak, ket innalak dagiti ubas ket pinespesko ida iti kopa ni Faraon.+ Kalpasan dayta inyawatko ti kopa iti ima ni Faraon.”+ 12  Idin kinuna kenkuana ni Jose: “Daytoy ti kayuloganna:+ Ti tallo a saringit ket tallo nga aldaw. 13  Iti tallo nga aldaw manipud ita ni Faraon ingatonanto ta ulom ket sigurado nga isublinakanto iti akemmo;+ ket sigurado nga iyawatmonto ti kopa ni Faraon iti imana, maitunos iti immun-una a kaugalian idi nagannongka kas agaw-awit iti kopana.+ 14  Nupay kasta, pagtalinaedennakto iti lagipmo apaman nga aglak-amka iti naimbag,+ ket, pangngaasim, aramidemto kaniak ti naayat a kinamanangngaasi ket dakamatennak ken Faraon,+ ket iruarnakto manipud iti daytoy a balay. 15  Ta iti kinapudnona nakumawak iti daga dagiti Hebreo;+ ket ditoy met awan a pulos inaramidko a rumbeng a pangikabilanda kaniak iti abut a pagbaludan.”+ 16  Idi nakita ti panguluen dagiti panadero nga isu nangibuksil iti banag a naimbag, isu, kalpasanna, kinunana ken Jose: “Siak met addaak idi iti tagtagainepko, ket adtoy adda idi tallo a labba ti napudaw a tinapay iti rabaw ti ulok, 17  ket iti makinngato-amin a labba adda idi ti amin a kita dagiti makan maipaay ken Faraon,+ ti aramid ti maysa a panadero, ket adda idi dagiti agtatayab+ a mangmangan kadagita iti labba iti rabaw ti ulok.” 18  Idin simmungbat ni Jose ket kinunana: “Daytoy ti kayuloganna:+ Ti tallo a labba ket tallo nga aldaw. 19  Iti tallo nga aldaw manipud ita ni Faraon ingatonanto ti ulom manipud kenka ket sigurado nga ibitaynakanto iti maysa a kayo;+ ket dagiti agtatayab sigurado a kanendanto ti lasagmo manipud kenka.”+ 20  Ita iti maikatlo nga aldaw nagbanag nga isu idi ti panagkasangay ni Faraon,+ ket nangaramid iti padaya a maipaay kadagiti amin nga adipenna ket inngatona ti ulo ti panguluen dagiti agaw-awit iti kopa ken ti ulo ti panguluen dagiti panadero iti tengnga dagiti adipenna.+ 21  Iti kasta insublina ti panguluen dagiti agaw-awit iti kopa iti saadna nga agaw-awit iti kopa,+ ket intultuloyna nga iyawat ti kopa iti ima ni Faraon. 22  Ngem ti panguluen dagiti panadero imbitayna,+ kas iti kayulogan nga inted kadakuada ni Jose.+ 23  Nupay kasta, ti panguluen dagiti agaw-awit iti kopa saanna a nalagip ni Jose ket nalipatannan.+

Footnotes