Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Genesis 38:1-30

38  Ita kabayatanna naaramid nga idi simmalog ni Juda manipud iti kakabsatna impatakderna ti toldana iti asideg ti maysa a lalaki, maysa nga Adullamita,+ ket ti naganna Hira.  Ket sadiay nakakita ni Juda iti anak a babai ti maysa a Canaanita,+ ket ti naganna Sua. Gapuna isu innalana ket nakidenna kenkuana.  Ket isu nagsikog. Idi agangay impasngayna ti maysa nga anak a lalaki ket pinanagananna iti Er.+  Isu nagsikog manen. Idi agangay impasngayna ti maysa nga anak a lalaki ket pinanagananna iti Onan.  Kaskasdi iti sabali pay a tiempo isu nangipasngay iti anak a lalaki ket kalpasanna pinanagananna iti Sela. Ita isu adda idi idiay Aczib iti tiempo ti panangipasngayna kenkuana.+  Idi agangay nangala ni Juda iti asawa maipaay ken Er nga inaunana, ket ti naganna Tamar.+  Ngem ni Er, ti inauna ni Juda, dakes idi kadagiti mata ni Jehova;+ ngarud isu pinapatay ni Jehova.+  Gapu iti dayta ni Juda kinunana ken Onan: “Makidennaka iti asawa ti kabsatmo ket aramidem kenkuana ti agkayong a pannakiasawa ket mangpatanorka iti putot maipaay iti kabsatmo.”+  Ngem ammo ni Onan a ti putot saannanto a kukua;+ ket napasamak nga idi nakidenna iti asawa ti kabsatna sinayangna ti semiliana iti daga tapno saan a makaipaay iti putot ken kabsatna.+ 10  Ita ti inaramidna dakes kadagiti mata ni Jehova;+ ngarud isu pinapatayna met.+ 11  Gapuna ni Juda kinunana ken Tamar a manugangna-a-babai: “Agnaedka a kas balo iti balay ni amam agingga a dumakkel ni Sela nga anakko a lalaki.”+ Ta kinunana iti bagina: “Mabalin nga isu matay met a kas ti kakabsatna.”+ Iti kasta napan ni Tamar ket nagtultuloy nga agnaed iti balay ti bukodna nga ama.+ 12  Gapuna limmabas ti adu nga aldaw ket ti anak a babai ni Sua, ti asawa ni Juda,+ natay; ket ni Juda inalagadna ti kapaut ti panagleddaang.+ Kalpasan dayta isu simmang-at a napan kadagiti mamukpukis iti karkarnerona, isu ken ti kaduana a ni Hira nga Adullamita,+ idiay Timna.+ 13  Idin naibaga ken Tamar: “Adtoy ti katugangam-a-lalaki sumangsang-at idiay Timna tapno pukisanna dagiti karnerona.”+ 14  Gapu iti dayta inuksobna dagiti kawes ti kinabalona ket dinalungdonganna ti bagina iti palingay ken inabbungotanna ti bagina ket nagtugaw iti pagserkan ti Enaim, nga adda iti dalan nga agturong idiay Timna. Ta nakitana a dimmakkelen ni Sela ket kaskasdi nga isu saan pay a naited a kas asawa a babai kenkuana.+ 15  Idi isu naimatangan ni Juda, dagus nga impagarupna a maysa a balangkantis,+ gapu ta inabbonganna ti rupana.+ 16  Gapuna nagturong kenkuana iti igid ti dalan ket kinunana: “Palubosannak, pangngaasim, a makidenna kenka.”+ Ta saanna nga ammo nga isu ti manugangna-a-babai.+ Nupay kasta, kinunana: “Anianto ti itedmo kaniak tapno makidennaka kaniak?”+ 17  Iti daytoy kinunana: “Siak mangipatulodakto iti maysa nga urbon dagiti kalding manipud iti pangen.” Ngem kinunana: “Mangtedkanto kadi iti tani agingga nga ipatulodmo dayta?”+ 18  Ket intuloyna: “Ania ti tani nga itedkonto kenka?” nga iti dayta kinunana: “Ti pangselio a singsingmo+ ken ti singdanmo ken ti sarukodmo nga adda ita imam.” Idin intedna ida kenkuana ket nakidenna kenkuana, iti kasta nagsikog babaen kenkuana. 19  Kalpasan dayta isu timmakder ket napan ken inikkatna ti palingayna kenkuana ket kinawesanna ti bagina kadagiti kawes ti kinabalona.+ 20  Ket impatulod ni Juda ti urbon dagiti kalding babaen ti ima ti kaduana nga Adullamita+ tapno pasublienna ti tani manipud iti ima ti babai, ngem saanna a pulos nasarakan. 21  Ket nagim-imtuod kadagiti lallaki iti dissona, a kunkunana: “Sadino ti ayan dayta a balangkantis iti templo iti Enaim iti sibay ti dalan?” Ngem kinunkunada: “Awan pay a pulos immay iti daytoy a lugar a balangkantis iti templo.”+ 22  Kamaudiananna nagsubli ken Juda ket kinunana: “Isu saanko a pulos nasarakan ken, malaksid iti dayta, dagiti lallaki iti disso kinunada, ‘Awan pay a pulos immay iti daytoy a lugar a balangkantis iti templo.’” 23  Gapuna kinuna ni Juda: “Bay-am a tagikuaenna ida, tapno saantayo a maumsi.+ Uray no kasta, impatulodko daytoy nga urbon a kalding, ngem sika—saanmo a pulos nasarakan.” 24  Nupay kasta, agarup tallo a bulan kalpasanna napasamak a naibaga ken Juda: “Ni Tamar a manugangmo-a-babai nagakem a balangkantis,+ ket adtoy masikog+ met babaen ti kinabalangkantisna.” Iti kasta kinuna ni Juda: “Isu iruaryo ket mapuoran koma.”+ 25  Bayat a mairuruar isu nagbaon iti katuganganna-a-lalaki, a kunkunana: “Masikogak babaen ti lalaki a makinkukua kadagitoy.”+ Ket innayonna: “Sukimatem,+ pangngaasim, no makinkukua kadagitoy, ti pangselio a singsing ken ti singdan ken ti sarukod.”+ 26  Idin sinukimat ida ni Juda ket kinunana:+ “Isu nalinlinteg ngem siak,+ iti rason a diak inted ken Sela nga anakko a lalaki.”+ Ket saanen a nakidenna kenkuana kalpasan dayta.+ 27  Ita naaramid nga iti tiempo ti panagpasngayna, ay ket, adtoy adda singin iti tianna. 28  Kanayonanna, napasamak nga idi agpaspasngay inyunnat ti maysa ti imana, ket madagdagus nga innala ti mammaltot ken siningdananna iti eskarlata a sag-ut ti imana, a kunkunana: “Daytoy ti immuna a rimmuar.” 29  Kamaudiananna naaramid nga apaman nga insanudna ti imana, ay ket, adtoy rimmuar ti kabsatna, iti kasta inyebkasna: “Ania ti kayatmo a sawen iti daytoy, a namataudka ita bagim iti pannakapisang ti puerta?” Ngarud napanaganan iti Perez.+ 30  Ket kalpasanna rimmuar ti kabsatna nga iti imana ti ayan ti eskarlata a sag-ut ket napanaganan idi iti Zera.+

Footnotes