Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Genesis 35:1-29

35  Kalpasan dayta ti Dios kinunana ken Jacob: “Tumakderka, sumang-atka idiay Bethel ket agnaedka sadiay,+ ket mangaramidka sadiay iti altar maipaay iti pudno a Dios a nagparang kenka idi itartarayam ni Esau a kabsatmo.”+  Idin kinuna ni Jacob iti sangakabbalayanna ken kadagiti amin a naikuyog kenkuana: “Iwaksiyo dagiti ganggannaet a didios nga adda iti nagtetengngaanyo+ ket dalusanyo ti bagbagiyo ken sukatanyo dagiti kagayyo,+  ket tumakdertayo ket sumang-attayo idiay Bethel. Ket sadiay mangaramidakto iti maysa nga altar maipaay iti pudno a Dios a simmungbat kaniak iti aldaw ti rigatko+ ta isu adda idi kaniak iti dana a napanak.”+  Gapuna intedda ken Jacob ti amin a ganggannaet a didios+ nga adda idi kadagiti imada ken dagiti aritos nga adda idi kadagiti lapayagda, ket inlemmeng+ ida ni Jacob iti sirok ti dakkel a kayo nga adda iti asideg ti Siquem.  Kalpasan dayta nagluasda, ket ti panagaligaget iti Dios naadda kadagiti siudad nga adda iti aglikmutda,+ iti kasta saanda a kinamat ti annak ni Jacob.  Iti kamaudiananna dimteng ni Jacob idiay Luz,+ nga adda iti daga ti Canaan, kayatna a sawen, Bethel, isu ken amin dagiti tattao a naikuyog kenkuana.  Kalpasanna nangibangon sadiay iti altar ket rinugianna a naganen ti disso iti El-bethel, agsipud ta sadiay ti pudno a Dios impanayagna kenkuana ti bagina idi tiempo nga itartarayanna ni kabsatna.+  Idi agangay ni Debora+ a manangtaripato ni Rebecca natay ket naitabon iti sakaanan ti Bethel iti sirok ti maysa a nakarangrangpaya a kayo. Gapuna pinanagananna iti Allon-bakuth.  Ti Dios nagparang ita ken Jacob iti maminsan manen bayat ti iyaayna manipud Padan-aram+ ket binendisionanna.+ 10  Ket kinuna kenkuana ti Dios: “Ti naganmo ket Jacob.+ Saankan a mapanaganan iti Jacob, no di ket Israel ti agbalinto a naganmo.”+ Ket rinugianna a panaganan iti Israel. 11  Ket kinuna pay kenkuana ti Dios: “Siak ti Dios a Mannakabalin-amin.+ Agbungaka ket agaduka. Dagiti nasion ken ti maysa a kongregasion dagiti nasion agtauddanto kenka, ket ti ar-ari aggapudanto kadagiti lomom.+ 12  No maipapan iti daga nga intedko ken Abraham ken ni Isaac, itedkonto kenka, ket iti bin-im+ a sumaruno kenka itedkonto ti daga.”+ 13  Kalpasan dayta immuli ti Dios manipud iti ngatuenna iti disso a nakisawanna kenkuana.+ 14  Gapu itoy nangisaad ni Jacob iti maysa nga adigi iti disso a nakisawanna kenkuana,+ maysa nga adigi a bato, ket nangiparukpok iti daton nga inumen iti rabaw dayta ken nangiparukpok iti lana iti rabaw dayta.+ 15  Ket ni Jacob intultuloyna a panaganan iti Bethel ti disso a nakisawan kenkuana ti Dios.+ 16  Kalpasanna nagluasda manipud Bethel. Ket bayat nga adda pay nawatiwat a daga sakbay a makagtengda iti Efrat,+ nangrugi nga agpasngay ni Raquel, ket nagparparigat nga agpasngay.+ 17  Ngem kasta idi a bayat nga agparparigat nga agpasngay kinuna kenkuana ti mammaltot: “Dika agbuteng, ta maaddanto met kenka daytoy nga anak a lalaki.”+ 18  Ket kastoy idi ti imbungana a bayat a pumampanaw ti kararuana+ (agsipud ta isu natay)+ pinanagananna iti Ben-oni; ngem inawagan ni amana iti Benjamin.+ 19  Gapuna natay ni Raquel ket naitabon iti dalan nga agturong idiay Efrat, kayatna a sawen, Betlehem.+ 20  Ngarud nangisaad ni Jacob iti adigi iti rabaw ti tanemna. Daytoy ti adigi ti tanem ni Raquel agingga itoy nga aldaw.+ 21  Kalpasan dayta nagluas ni Israel ket imbangonna ti toldana iti pangadaywen iti labes ti torre ti Eder.+ 22  Ket naaramid bayat nga agtabtabernakulo+ ni Israel iti dayta a daga nga iti naminsan napan ni Ruben ket nakikaidda ken Bilha a kamalala ni amana, ket nangngeg ni Israel ti maipapan iti dayta.+ Gapuna naaddaan ni Jacob iti sangapulo ket dua nga annak a lallaki. 23  Ti annak babaen ken Lea isu da Ruben+ nga inauna ni Jacob ken Simeon ken Levi ken Juda ken Isacar ken Zabulon. 24  Ti annak babaen ken Raquel isu da Jose ken Benjamin. 25  Ket ti annak babaen ken Bilha, adipen a babai ni Raquel, isu da Dan ken Neftali. 26  Ket ti annak babaen ken Zilpa, adipen a babai ni Lea, isu da Gad ken Aser. Dagitoy ti annak a lallaki ni Jacob a nayanak kenkuana idiay Padan-aram. 27  Iti kamaudiananna ni Jacob dimteng ken Isaac nga amana idiay Mamre,+ idiay Kiriat-arba,+ kayatna a sawen, Hebron, a nagnaedan ni Abraham ken kasta met ni Isaac kas ganggannaet.+ 28  Ket ti al-aldaw ni Isaac nagdagup iti sangagasut ket walopulo a tawen.+ 29  Kalpasan dayta nauyos ti biag ni Isaac ket natay ket naitipon kadagiti kailianna, lakay ken napneken iti al-aldaw,+ ket intabon da Esau ken Jacob nga annakna.+

Footnotes