Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Genesis 34:1-31

34  Ita ni Dina nga anak a babai ni Lea,+ nga impasngayna ken Jacob, kadawyanna idi ti rummuar tapno kitaenna+ ti annak a babbai ti daga.+  Ket nakita ni Siquem nga anak ni Hamor a Heveo,+ maysa a panguluen ti daga, ket kalpasanna innalana ket nakikaidda kenkuana ket pinilitna.+  Ket ti kararuana nangrugi a dimmekket ken Dina nga anak a babai ni Jacob, ket isu nagayat iti balasang ket nagsasao iti makaguyugoy iti balasang.  Kamaudiananna ni Siquem kinunana ken Hamor nga amana:+ “Alaem maipaay kaniak daytoy a balasang kas asawa.”+  Ket nangngeg ni Jacob a tinulawanna ni Dina nga anakna. Ket ti annakna a lallaki addada idi iti pangenna idiay tay-ak;+ ket ni Jacob nagtalinaed a siuulimek agingga iti isasangpetda.+  Idi agangay ni Hamor, ama ni Siquem, rimmuar a napan ken Jacob tapno makisao kenkuana.+  Ket ti annak a lallaki ni Jacob dimtengda manipud iti tay-ak apaman a nangngegda maipapan iti dayta; ket dagiti lallaki nasaktan ti rikriknada ket nakaungetda unay,+ agsipud ta nagaramid iti nakababain a kinamaag maibusor iti Israel iti pannakikaiddana iti anak a babai ni Jacob,+ idinto ta awan koma ti rebbeng a maaramid a kas iti dayta.+  Ket nakisao kadakuada ni Hamor, a kunkunana: “No maipapan ken Siquem nga anakko, ti kararuana agrayo iti anakyo a babai.+ Pangngaasiyo, itedyo kenkuana kas asawa,+  ket mangbukelkayo kadagiti pannakiasawa nga aliansa kadakami.+ Ti annakyo a babbai itedyo kadakami, ket ti annakmi a babbai alaenyo maipaay kadakayo.+ 10  Ket mabalinyo ti makipagnaed kadakami, ket ti daga madadaanto nga agpaay kadakayo. Agnaedkayo ken agnegosiokayo iti dayta ket agyankayo iti dayta.”+ 11  Idin kinuna ni Siquem iti amana ken iti kakabsatna: “Makasarakak koma iti pabor kadagiti matayo, ket aniaman nga ibagayonto kaniak itedkonto. 12  Ingatoyo unay ti sab-ong a kuarta ken sagut a naipatay kaniak,+ ket situtulokak a mangited maitunos iti ibagayo kaniak; isuna laeng ta itedyo kaniak ti balasang kas asawa.” 13  Ket ti annak a lallaki ni Jacob rinugianda ti sumungbat ken ni Siquem ken ni Hamor nga amana buyogen ti allilaw ken agsao iti kasta agsipud ta tinulawanna ni Dina a kabsatda.+ 14  Ket kinunada kadakuada: “Saanmi a mabalin nga aramiden ti kasta a banag, nga ited ti kabsatmi a babai iti maysa a lalaki nga addaan iti makinsango a kudil,+ agsipud ta umsi dayta kadakami. 15  Iti daytoy laeng a kondision a mabalinmi ti umannugot kadakayo, nga agbalinkayo a kas kadakami, babaen ti pannakakugit ti tunggal lalaki kadakayo.+ 16  Kalpasanna pudno unay nga itedminto kadakayo ti annakmi a babbai, ket ti annakyo a babbai alaenminto maipaay iti bagbagimi, ket pudno unay a makipagnaedkamto kadakayo ket agbalintayo a maymaysa nga ili.+ 17  Ngem no dikay umimdeng kadakami a makugitkayo, ngarud alaenminto ti anakmi a babai ket mapankamin.” 18  Ket ti sasaoda kasla naimbag kadagiti mata ni Hamor ken kadagiti mata ni Siquem, anak ni Hamor,+ 19  ket ti agtutubo a lalaki saan a nagtaktak a mangaramid iti kondision,+ agsipud ta naragsakan iti anak a babai ni Jacob ken isu idi ti kadadayawan+ iti intero a balay ni amana.+ 20  Gapuna ni Hamor ken ni Siquem nga anakna napanda iti ruangan ti siudadda ket rinugianda ti agsao kadagiti lallaki iti siudadda,+ a kunkunada: 21  “Dagitoy a lallaki managayatda iti talna kadatayo.+ Ngarud bay-anyo nga agnaedda iti daga ket agnegosioda iti dayta, yantangay ti daga nakalawlawa iti sanguananda.+ Ti annakda a babbai mabalintayo nga alaen kas assawa maipaay iti bagbagitayo ket ti bukodtayo nga annak a babbai mabalintayo nga ited kadakuada.+ 22  Iti daytoy laeng a kondision a dagiti lallaki umannugotdanto kadatayo a makipagnaedda kadatayo tapno agbalintayo a maymaysa nga ili, a tunggal lalaki kadatayo makugit kas iti wagas ti pannakakugitda.+ 23  Kalpasanna dagiti sanikuada ken ti kinabaknangda ken amin a dinguenda, saandanto aya nga agbalin a kukuatayo?+ Umannugottayo laeng kadakuada tapno makipagnaedda koma kadatayo.”+ 24  Idin amin dagidiay rumrummuar iti ruangan ti siudadna immimdengda ken ni Hamor ken ni Siquem nga anakna, ket amin dagiti lallaki nakugitda, amin dagidiay rumrummuar iti ruangan ti siudadna. 25  Nupay kasta, naaramid nga iti maikatlo nga aldaw, idi nga agpapaut-otda,+ ti dua nga annak ni Jacob, da Simeon ken Levi,+ kakabsat ni Dina,+ innala tunggal maysa ti kampilanna ket napanda a di nadnadlaw iti siudad ket pinapatayda ti tunggal lalaki.+ 26  Ket ni Hamor ken ni Siquem nga anakna pinapatayda babaen ti tadem ti kampilan.+ Kalpasanna innalada ni Dina manipud balay ni Siquem ket rimmuarda.+ 27  Ti dadduma nga annak ni Jacob dinarupda dagiti lallaki a nasugatan iti makapapatay ket napanda sinamsam ti siudad, agsipud ta tinulawanda ti kabsatda a babai.+ 28  Dagiti arbanda ken dagiti pangenda ken dagiti asnoda ken ti adda idi iti siudad ken no ania ti adda idi iti tay-ak innalada.+ 29  Ket amin dagiti sanikuada a pagbiag ken amin dagiti babassit nga annakda ken dagiti assawada impanawda a kautibo, iti kasta sinamsamda ti isuamin nga adda idi kadagiti balay.+ 30  Gapu itoy ni Jacob kinunana ken Simeon ken ni Levi:+ “Nangyegkayo iti pannakailaksid kaniak iti panamagbalinyo kaniak a buyok kadagiti agnanaed iti daga,+ kadagiti Canaanita ken kadagiti Perizeo; idinto ta bassit ti bilangko,+ ket sigurado nga aguummongdanto a sangsangkamaysa maibusor kaniak ket rautendak ket matalipuposakto, siak ken ti balayko.” 31  Kinunada kalpasanna: “Rumbeng aya a ti asinoman tratuenna ti kabsatmi a babai a kasla maysa a balangkantis?”+

Footnotes