Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Genesis 33:1-20

33  Idi agangay intangwa ni Jacob dagiti matana ket kimmita, ket adtoy ni Esau um-umay ket naikuyog kenkuana ti uppat a gasut a lallaki.+ Iti kasta pinaglalasinna ti annak ken ni Lea ken ni Raquel ken iti dua nga adipen a babbai,+  ket inyunana dagiti adipen a babbai ken ti annakda+ ket ni Lea ken ti annakna sumarunoda kadakuada+ ket da Raquel ken Jose iti likudanda.+  Ket isu limmasat nga immun-una kadakuada ken nagruknoy agingga iti daga iti namimpito agingga a nakaasideg iti kabsatna.+  Ket ni Esau nagtartaray a sumabet kenkuana,+ ket inarakupna+ ket nagpasag iti tengngedna ken inagepanna, ket nagsangitda.  Kalpasanna intangwana dagiti matana ket nakitana dagiti babbai ken dagiti ubbing ket kinunana: “Siasino dagitoy naikuyog kenka?” nga iti dayta kinunana: “Ti annak nga imparabur ti Dios iti adipenmo.”+  Iti kasta immasideg dagiti adipen a babbai, isuda ken ti annakda, ket nagruknoyda;  ket immasideg met ni Lea, ken ti annakna, ket nagruknoyda, ket kalpasanna immasideg ni Jose, ken ni Raquel, ket nagruknoyda.+  Kinunana ita: “Ania ti kayatmo a sawen iti daytoy isuamin a pakarso dagiti agdaldaliasat a nasabetko?”+ Iti daytoy kinunana: “Tapno makasarakak iti pabor kadagiti mata ni apok.”+  Kalpasanna kinuna ni Esau: “Aduanak unay, kabsatko.+ Agtalinaed koma a kukuam ti kukuam.” 10  Nupay kasta, kinuna ni Jacob: “Saan, pangngaasim. No, ita, nakasarakak iti pabor kadagita matam,+ ngarud masapul nga alaem iti imak ti sagutko, agsipud ta maitunos iti panggepna nakitak ti rupam a kasla iti pannakakita iti rupa ti Dios ta inawatnak a siraragsak.+ 11  Alaem, pangngaasim, ti sagut a mangyebkas iti pamendisionko a naiyeg kenka,+ agsipud ta pinaraburannak ti Dios ken agsipud ta addaanak iti isuamin.”+ Ket intultuloyna a guyugoyen, iti kasta innalana dayta.+ 12  Idi agangay kinunana: “Pumanawta ket mapantan, ket bay-am a mapanak nga umun-una ngem sika.” 13  Ngem kinunana kenkuana: “Pagaammo ti apok a dagiti ubbing nalamida ket karkarnero ken bakbaka nga agpaspasuso ti adda iti aywanko,+ ket no abugenda ida a sidadaras unay iti maysa nga aldaw, iti kasta sigurado a matayto ti intero nga arban.+ 14  Ti apok, pangngaasim, lumasat koma nga umun-una iti adipenna, ngem siak itultuloyko koma ti panagbaniaga nga agin-inayadak maitunos iti panagaddang dagiti dinguen+ nga adda iti sanguanak ken maitunos iti panagaddang dagiti ubbing+ agingga a dumtengakto iti apok idiay Seir.”+ 15  Kalpasanna kinuna ni Esau: “Bay-annak, pangngaasim, nga ipabiangko kenka ti dadduma a tattao a naikuyog kaniak.” Iti daytoy kinunana: “Apay a kastoy? Makasarakak koma iti pabor kadagiti mata ni apok.”+ 16  Gapuna iti dayta nga aldaw nagsubli ni Esau nga agturong idiay Seir. 17  Ket ni Jacob pimmanaw a mapan idiay Succot,+ ket imbangonanna ti bagina iti balay ket maipaay iti pangenna isu nangaramid kadagiti abong-abong.+ Dayta idi ti makagapu a pinanagananna ti disso iti Succot. 18  Idi agangay dimteng ni Jacob a sitatalged ken sikakaradkad iti siudad ti Siquem,+ nga adda iti daga ti Canaan,+ bayat nga um-umay idi manipud Padan-aram;+ ket nangibangon iti pakarso iti sango ti siudad. 19  Kalpasanna gimmun-od iti maysa a benneg ti talon a nangibangonanna iti toldana iti ima ti annak ni Hamor nga ama ni Siquem, iti sangagasut a kapisi ti kuarta.+ 20  Kalpasan dayta nangipasdek sadiay iti maysa nga altar ket inawaganna dayta iti Dios a Dios ti Israel.+

Footnotes