Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Genesis 32:1-32

32  Ket no maipapan ken Jacob, napan iti dalanna, ket dagiti anghel ti Dios simmabetda ita kenkuana.+  Dagus a kinuna ni Jacob, idi nakitana ida: “Daytoy ti pakarso ti Dios!”+ Ngarud pinanagananna dayta a disso iti Mahanaim.+  Kalpasanna nangibaon ni Jacob kadagiti mensahero+ nga umun-una ngem isu nga agturong ken Esau a kabsatna idiay daga ti Seir,+ ti tay-ak ti Edom,+  ket binilinna ida, a kunkunana: “Daytoy ti sawenyonto ken apok,+ ken Esau, ‘Daytoy ti kinuna ni adipenmo a Jacob: “Nakipagtaengak ken Laban kas ganggannaet ket nagtalinaedak iti atiddog a tiempo agingga ita.+  Ket naaddaanak iti tortoro ken as-asno, karkarnero, ken ad-adipen a lallaki ken ad-adipen a babbai,+ ket kayatko ti agbaon tapno pakaammuak ti apok, tapno makasarakak koma iti pabor kadagita matam.”’”+  Idi agangay dagiti mensahero nagsublida ken Jacob, a kunkunada: “Nakagtengkami ken kabsatmo nga Esau, ket isu adda met iti dalanna a sumabet kenka, ket uppat a gasut a lallaki ti naikuyog kenkuana.”+  Ket ni Jacob nagbuteng iti kasta unay ket naringgoran.+ Gapuna biningayna dagiti tattao nga adda idi kenkuana, ken dagiti arban ken ti bakbaka ken dagiti kamelio iti dua a pakarso,+  ket kinunana: “No umay ni Esau iti maysa a pakarso ket darupenna dayta, iti kasta masigurado nga adda maysa a pakarso a mabati nga agtalaw.”+  Kalpasan dayta kinuna ni Jacob: “O Dios ni amak nga Abraham ken Dios ni amak nga Isaac,+ O Jehova, sika nga agkunkuna kaniak, ‘Agsublika iti dagam ken kadagiti kabagiam ket pakilangenankanto iti nasayaat,’+ 10  saanak a maikari kadagiti amin a naayat a kinamanangngaasi ken iti isuamin a kinamatalek a winatwatmo maipaay iti adipenmo,+ ta binallasiwko daytoy a Jordan a ti sarukodko laeng ti kaduak ket ita nagbalinak a dua a pakarso.+ 11  Ispalennak, ikararagko kenka,+ manipud iti ima ti kabsatko, manipud iti ima ni Esau, agsipud ta mabutengak kenkuana di la ket ta umay ket pudno unay a darupennak,+ ina agraman annak. 12  Ket sika, sika kinunam, ‘Di pagduaduaan a pakilangenankanto iti nasayaat ket aramidekto ti bin-im kas kadagiti binukel ti darat iti baybay, a di mabilang gapu iti kinaaduna.’”+ 13  Ket isu nagtultuloy a nagdagus sadiay iti dayta a rabii. Ket manipud iti naadda iti imana nangala iti sagut maipaay ken Esau a kabsatna:+ 14  dua gasut a kabaian a kalding ken duapulo a kalakian a kalding, dua gasut a kabaian a karnero ken duapulo a kalakian a karnero, 15  tallopulo a kamelio nga agpaspasuso ken dagiti urbonda, uppat a pulo a baka ken sangapulo a toro, duapulo nga asna ken sangapulo a nataenganen nga asno.+ 16  Kalpasanna inyawatna kadagiti adipenna ti tinunggal pangen ket maulit-ulit a kinunana kadagiti adipenna: “Bumallasiwkayo nga umun-una ngem siak, ket mangitudingkayo iti pagbaetan ti pangen ken pangen.”+ 17  Kanayonanna binilinna daydiay umuna, a kunkunana: “No kas pagarigan masabetnaka ni Esau a kabsatko ket agimtuod kenka, a kunkunana, ‘Makinkukua kenka, ket sadino ti papanam ken makinkukua kadagitoy immun-una kenka?’ 18  iti kasta masapul a kunaem, ‘Ni adipenmo, ni Jacob. Maysa a sagut dayta,+ naipatulod maipaay ken apok,+ ken Esau, ket adtoy! isu adda met iti likudanmi.’” 19  Ket binilinna met ti maikadua, kasta met ti maikatlo, kasta met amin dagidiay sumarsaruno kadagiti pangen, a kunkunana: “Maitunos itoy a sao agsaokayo ken Esau inton masabatyo.+ 20  Ket masapul a kunaenyo met, ‘Adtoy ni adipenmo a Jacob iti likudanmi.’”+ Ta kinunana iti bagina: “Mabalin nga isu maay-ayok babaen ti sagut a mapan nga umun-una ngem siak,+ ket kalpasanna makitakto ti rupana. Nalabit mangabrasanto a siaayat.”+ 21  Gapuna ti sagut bimmallasiw nga immun-una kenkuana, ngem isu nagdagus iti dayta a rabii iti pakarso.+ 22  Idi agangay bayat dayta a rabii isu bimmangon ket innalana ti dua nga assawana+ ken ti dua nga adipenna a babbai+ ken ti sangapulo ket maysa nga agtutubo nga annakna+ ket bimmallasiw iti pagballasiwan ti Jaboc.+ 23  Gapuna innalana ida ket imballasiwna ida iti naapres a ginget,+ ket imballasiwna ti adda kenkuana. 24  Kamaudiananna nabati ni Jacob nga is-isuna. Idin nangrugi a makigabbo kenkuana ti maysa a lalaki agingga a nagbannawag.+ 25  Idi nakitana nga isu saan a nangabak kenkuana,+ iti kasta sinagidna ti lungog ti nagsuopan ti luppona; ket ti lungog ti nagsuopan ti luppo ni Jacob nasulnot bayat ti pannakigabbona kenkuana.+ 26  Kalpasan dayta kinunana: “Palubosannak a pumanaw, ta nagbannawagen.” Iti daytoy kinunana: “Saanka a palubosan a pumanaw agingga nga umuna pay a bendisionannak.”+ 27  Gapuna kinunana kenkuana: “Ania ti naganmo?” nga iti dayta kinunana: “Jacob.” 28  Kalpasanna kinunana: “Saankanton a mapanaganan iti Jacob no di ket Israel,+ agsipud ta nakirangetka+ iti Dios ken kadagiti lallaki iti kasta nangabakka iti kamaudiananna.” 29  Kalpasanna nagimtuod ni Jacob ket kinunana: “Pangngaasim, ibagam kaniak ti naganmo.” Nupay kasta, kinunana: “Apay nga imtuodem ti naganko?”+ Iti kasta binendisionanna sadiay. 30  Ngarud ni Jacob pinanagananna ti lugar iti Peniel,+ agsipud ta, kas panangadaw kenkuana, “Nakitak ti Dios a rupanrupa ket kaskasdi naispal ti kararuak.”+ 31  Ket ti init nangrugi nga agsilnag kenkuana apaman nga isu limmabas iti Penuel, ngem agsagkisagking idi iti luppona.+ 32  Dayta ti makagapu a ti annak ti Israel saanda a nayugali a kanen ti binggas ti nerbio ti luppo, nga adda iti lungog ti nagsuopan ti luppo, agingga itoy nga aldaw, agsipud ta sinagidna ti lungog ti nagsuopan ti luppo ni Jacob iti binggas ti nerbio ti luppo.+

Footnotes