Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Genesis 30:1-43

30  Idi nakita ni Raquel nga awan ti impasngayna ken Jacob, nagimon ni Raquel iti kabsatna ket rinugianna a kunaen ken Jacob:+ “Ipaayannak iti annak ta no saan maysaakto a natay a babai.”+  Gapu itoy simged ti unget ni Jacob maibusor ken Raquel ket kinunana:+ “Addaak aya iti saad ti Dios, a nangikedked kenka iti bunga ti tian?”+  Gapuna kinunana: “Adtoy ti adipenko a babai a ni Bilha.+ Makidennaka kenkuana, tapno agpasngay iti rabaw dagiti tumengko ket iti kasta siak, siak a mismo, makagun-odak iti annak manipud kenkuana.”+  Iti kasta intedna kenkuana ni Bilha nga adipenna a babai kas asawa, ket ni Jacob nakidenna kenkuana.+  Ket nagsikog ni Bilha ket idi agangay impasngayanna ni Jacob iti anak a lalaki.+  Idin kinuna ni Raquel: “Ti Dios nagtignay kas ukomko+ ket inimdenganna met ti timekko, iti kasta impaayannak iti maysa nga anak a lalaki.” Dayta ti makagapu a pinanagananna iti Dan.+  Ket ni Bilha, adipen a babai ni Raquel, nagsikog iti naminsan pay ket idi agangay impasngayna ti maikadua nga anak a lalaki ken Jacob.  Idin kinuna ni Raquel: “Buyogen dagiti napinget a pannakigubal nakigubalak iti kabsatko a babai. Nangabakak met!” Gapuna pinanagananna iti Neftali.+  Idi nakita ni Lea nga isu naminggan nga agpasngay, innalana ni Zilpa nga adipenna a babai ket intedna ken Jacob kas asawa.+ 10  Idi agangay ni Zilpa, adipen a babai ni Lea, nangipasngay iti anak a lalaki ken Jacob. 11  Idin kinuna ni Lea: “Buyogen ti naimbag a kalak-aman!” Gapuna pinanagananna iti Gad.+ 12  Kalpasan dayta ni Zilpa, adipen a babai ni Lea, impasngayna ti maikadua nga anak a lalaki ken Jacob. 13  Idin kinuna ni Lea: “Anian a ragsakko! Ta ti annak a babbai sigurado a kunaendanto a naragsakak.”+ Gapuna pinanagananna iti Aser.+ 14  Ita nagpagnapagna ni Ruben+ iti al-aldaw ti panagani iti trigo+ ket nakasarak kadagiti mandragora idiay tay-ak. Gapuna inyegna ida ken Lea nga inana. Idin ni Raquel kinunana ken Lea: “Ikkannak, pangngaasim, iti sumagmamano kadagiti mandragora ti anakmo.”+ 15  Gapu itoy kinunana kenkuana: “Bassit kadi a banag daytoy, ti panangalam iti asawak,+ agraman ti panangalam met ita kadagiti mandragora ti anakko?” Gapuna kinuna ni Raquel: “Iti dayta a rason isu makikaiddanto kenka inton rabii a kasukat dagiti mandragora ti anakmo.” 16  Idi um-umay ni Jacob manipud iti talon iti rabii,+ rimmuar ni Lea a sumabet kenkuana ket kalpasanna kinunana: “Siak ti pakidennaam, agsipud ta nalawag nga inabanganka babaen kadagiti mandragora ti anakko.” Ngarud nakikaidda kenkuana iti dayta a rabii.+ 17  Ket ti Dios nangngegna ken sinungbatanna ni Lea ket isu nagsikog ket idi agangay impasngayna ken Jacob ti maikalima nga anak a lalaki.+ 18  Idin kinuna ni Lea: “Ti Dios nangted kaniak kadagiti tangdan ti patangtangdanan, agsipud ta intedko ti adipenko a babai iti asawak.” Gapuna pinanagananna iti Isacar.+ 19  Ket ni Lea nagsikog iti naminsan pay ket idi agangay impasngayna ti maikanem nga anak a lalaki ken Jacob.+ 20  Idin kinuna ni Lea: “Ti Dios pinaraburannak, wen, siak, iti nasayaat a parabur. Iti kamaudiananna anusannakto ti asawak,+ agsipud ta impasngayak iti innem nga annak a lallaki.”+ Gapuna pinanagananna iti Zabulon.+ 21  Ket kalpasanna impasngayna ti maysa nga anak a babai ket iti kasta pinanagananna iti Dina.+ 22  Kamaudiananna ti Dios linagipna ni Raquel, ket isu nangngeg ken sinungbatan ti Dios iti kasta linuktanna ti aanakanna.+ 23  Ket nagsikog ket inyanakna ti maysa nga anak a lalaki. Idin kinunana: “Ti Dios inikkatna ti pannakaumsik!”+ 24  Gapuna pinanagananna iti Jose,+ a kunkunana: “Ni Jehova manginaynayon kaniak iti sabali pay nga anak a lalaki.” 25  Ket naaramid nga idi a ni Raquel naipasngaynan ni Jose, ni Jacob dagus a kinunana ken Laban: “Palubosannak tapno mapanak idiay dissok ken idiay pagiliak.+ 26  Itedmo dagiti assawak ken ti annakko, a maipaay kadakuada nagserbiak kenka, tapno mapanak; ta sika ammom ti panagserbik nga impaayko kenka.”+ 27  Idin kinuna kenkuana ni Laban: “No, ita, nakasarakak iti pabor kadagita matam,—naawatko dagiti partaan a kasla bembendisionannak ni Jehova gapu kenka.”+ 28  Ket innayonna: “Ikeddengmo dagiti tangdanmo kaniak ket itedkonto ida.”+ 29  Gapuna kinunana kenkuana: “Sika ammom no kasano a nagserbiak kenka ken no kasano a nataraken kaniak ti pangenmo;+ 30  a bassit idi ti kinaagpaysuanna nga adda kenka sakbay ti iyaayko, ket dimmakkel dayta a nagbalin nga umariwekwek, ta ni Jehova binendisionannaka nanipud idi dimmap-awak.+ Gapuna ita kaano a mangaramidak met iti banag nga agpaay iti bukodko a balay?”+ 31  Kalpasanna kinunana: “Ania ti itedkonto kenka?” Ket kinuna ni Jacob: “Awanto a pulos ti itedmo kaniak!+ No aramidemto daytoy a banag maipaay kaniak, agsubliakto a mangipastor iti arbanmo.+ Itultuloykonto a saluadan dayta.+ 32  Lumasatakto iti tengnga ti intero nga arbanmo ita nga aldaw. Ilasinmo manipud sadiay ti tunggal karnero a tudiktudikan ken addaan kadagiti turikturik a maris, ken ti tunggal kayumanggi a karnero kadagiti urbon a kalakian a karnero ken aniaman a turikturikan ti marisna ken daydiay tudiktudikan kadagiti kabaian a kalding. Kalpasanna dagitanto ti tangdanko.+ 33  Ket ti kinaumiso ti tignayko agsungbatto maipaay kaniak iti iyaaymo iti aniaman a masanguanan nga aldaw tapno sukimatem dagiti tangdanko;+ tunggal maysa a saan a tudiktudikan ken turikturikan ti marisna kadagiti kabaian a kalding ken kayumanggi kadagiti urbon a kalakian a karnero ket banag a tinakaw no adda dayta kaniak.”+ 34  Iti daytoy kinuna ni Laban: “Ay ket, nasayaat dayta! Maaramid koma maitunos iti saom.”+ 35  Kalpasanna iti dayta nga aldaw inlasinna dagiti kalakian a kalding a garitgaritan ken turikturikan ti marisna ken amin dagiti kabaian a kalding a tudiktudikan ken turikturikan ti marisna, tunggal maysa nga addaan idi iti aniaman a puraw ken tunggal maysa a kayumanggi kadagiti urbon a kalakian a karnero, ngem inyawatna ida kadagiti ima ti annakna. 36  Kalpasan dayta isu nangituding iti kaadayo a tallo nga aldaw a panagbaniaga iti nagbaetanda ken ni Jacob, ket ni Jacob ipaspastoranna idi dagiti natedda nga arban ni Laban. 37  Kalpasanna nangala ni Jacob iti usarenna a naata pay laeng a rawrawis ti kayo nga estorake+ ken ti kayo nga almendro+ ken ti kayo a platano+ ket nangukis kadakuada iti puraw a naukisan a paspaset babaen ti panangiduyayyatna iti puraw a paspaset nga adda kadagiti rawis.+ 38  Kamaudiananna dagiti rawis nga inukisanna inkabilna iti sanguanan ti arban, kadagiti kalasugan, kadagiti pagipainuman,+ a sadiay umay uminum dagiti arban, tapno agmayada iti sanguananda no immaydan uminum. 39  Iti kasta agmaya dagiti arban iti sanguanan dagiti rawis, ket dagiti arban mangpataudda kadagiti garitgaritan, tudiktudikan ken turikturikan ti marisda.+ 40  Ket insina ni Jacob dagiti urbon a kalakian a karnero ket kalpasanna inturongna ti ruprupa dagiti arban kadagidiay garitgaritan ken amin dagidiay kayumanggi kadagiti arban ni Laban. Kalpasanna inlasinna dagiti bukodna a pangen nga is-isuda ket saanna nga inyabay ida kadagiti arban ni Laban. 41  Ket kanayon a napasamak a no dagiti nabun-as+ nga arban agmayada, isaad ni Jacob dagiti rawis kadagiti kalasugan+ iti imatang dagiti arban, tapno agmayada iti abay dagiti rawis. 42  Ngem no dagiti arban nangiparangarang iti kinakapsut saanna nga isaad ida sadiay. Gapuna dagidiay nakapsut kanayon a nagbalin a kukua ni Laban, ngem dagidiay nabun-as kukua ni Jacob.+ 43  Ket ti lalaki nagtultuloy a rimmang-ay a rimmang-ay, ket dakkel nga ar-arban ken ad-adipen a babbai ken ad-adipen a lallaki ken kamkamelio ken as-asno ti nagbalin a kukuana.+

Footnotes