Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Genesis 3:1-24

3  Ita ti serpiente+ isu idi ti kaannadan+ kadagiti amin nga atap nga animal iti tay-ak nga inaramid ni Jehova a Dios.+ Gapuna rinugianna a kunaen iti babai:+ “Pudno kadi a kinuna ti Dios a dikay mangan manipud iti tunggal kayo iti minuyongan?”+  Gapu itoy kinuna ti babai iti serpiente: “Iti bunga dagiti kayo iti minuyongan mabalinmi ti mangan.+  Ngem no maipapan ti pannangan iti bunga ti kayo nga adda iti tengnga ti minuyongan,+ kinuna ti Dios, ‘Dikay mangan manipud iti dayta, saan, dikay sagiden dayta tapno saankayo a matay.’”+  Gapu itoy kinuna ti serpiente iti babai: “Sigurado a saankayto a matay.+  Ta ammo ti Dios nga iti mismo nga aldaw a pannanganyo manipud iti dayta sigurado a maluktan dagiti matayo ket sigurado nga agbalinkayo a kas iti Dios, a makaammo iti naimbag ken dakes.”+  Iti kasta nakita ti babai a ti kayo nasayaat a pagtaraon ken maysa a banag a pakailiwan dagiti mata, wen, ti kayo makaay-ayo a matmatan.+ Gapuna rinugianna ti nangala iti bungana ket kinnanna dayta. Kalpasanna nangted met iti asawana idi kaduanan ket rinugianna a kinnan dayta.+  Idin naluktan dagiti matada a dua ket nangrugi a mabigbigda a lamolamoda.+ Gapuna nagdaitda a namagsasaip iti bulbulong ti higos ket inyaramidanda ti bagbagida kadagiti abbong ti lomo.+  Idi agangay nangngegda ti timek ni Jehova a Dios a magmagna iti minuyongan iti agarup napalayupoy a paset ti aldaw,+ ket naglemmeng ti tao ken ti asawana manipud iti sanguanan ni Jehova a Dios iti nagbabaetan dagiti kayo iti minuyongan.+  Ket ni Jehova a Dios inaw-awaganna ti lalaki ket kinunana kenkuana: “Sadino ti ayanmo?”+ 10  Kamaudiananna kinunana: “Ti timekmo nangngegko iti minuyongan, ngem nagbutengak agsipud ta lamolamoak ket ngarud naglemmengak.”+ 11  Iti kasta kinunana: “Siasino ti nangibaga kenka a lamolamoka?+ Nanganka kadi manipud iti kayo nga imbilinko a saanmo a panganan?”+ 12  Ket kinuna ti lalaki: “Ti babai nga intedmo a kaduak, inikkannak iti bunga manipud iti kayo ket ngarud nanganak.”+ 13  Gapuna kinuna ni Jehova a Dios iti babai: “Ania daytoy inaramidmo?” Iti daytoy insungbat ti babai: “Ti serpiente—inallilawnak ket ngarud nanganak.”+ 14  Ket ni Jehova a Dios kinunana iti serpiente:+ “Agsipud ta inaramidmo daytoy a banag, sika ti nailunod manipud kadagiti amin a naamo nga animal ken manipud kadagiti amin nga atap nga animal iti tay-ak. Babaen ti tianmo aguyaskanto ket tapok ti kanemto iti amin nga al-aldaw ti panagbiagmo.+ 15  Ket mangikabilakto+ ti panagginnura+ iti nagbaetanyo+ iti babai+ ken iti nagbaetan ti bin-im+ ken ti bin-ina.+ Dunorennakanto+ iti ulo+ ket dunoremto+ iti mukod.”+ 16  Iti babai kinunana: “Paaduekto unay ti rigat ti panagsikogmo;+ kadagiti ut-ot iti panaganak agipasngaykanto iti annak,+ ket ti panaggartemmo agpaayto iti asawam, ket dominarannakanto.”+ 17  Ket kinunana ken Adan: “Agsipud ta immimdengka iti timek ni asawam ket nanganka manipud iti kayo a maipapan iti dayta intedko kenka daytoy a bilin,+ ‘Dika mangan manipud iti dayta,’ nailunod ti daga maigapu kenka.+ Iti rigat mangankanto iti apitna iti amin nga al-aldaw ti panagbiagmo.+ 18  Ket mamagtubonto maipaay kenka iti sisiitan ken kalkalunay,+ ket masapul a kanem ti mulmula iti tay-ak. 19  Iti ling-et ta rupam mangankanto iti tinapay agingga nga agsublika iti daga, ta dayta ti nakaalaam.+ Ta tapokka ket iti tapok agsublikanto.”+ 20  Kalpasan daytoy pinanaganan ni Adan ti asawana iti Eva,+ agsipud ta isu ti agbalin nga ina ti isuamin a sibibiag.+ 21  Ket ni Jehova a Dios nangaramid kadagiti nagayad a kawes a lalat a maipaay ken Adan ken maipaay iti asawana ket kinawesanna ida.+ 22  Ket kinuna ni Jehova a Dios: “Adtoy ti tao nagbalin a kas maysa kadata a makaammo iti naimbag ken dakes,+ ket ita tapno saanna a mayunnat ti imana ket pudno a mangala met iti bunga manipud iti kayo ti biag+ ket mangan ket agbiag agingga iti tiempo a di nakedngan,—” 23  Gapu iti dayta isu pinaruar ni Jehova a Dios manipud iti minuyongan ti Eden+ tapno talonenna ti daga a nakaalaanna.+ 24  Ket ngarud pinagtalawna ti tao ket insaadna iti daya ti minuyongan ti Eden+ dagiti kerubin+ ken ti dumardarang a tadem ti maysa a kampilan nga agtultuloy nga agpuspusipos tapno bantayanda ti dalan nga agturong iti kayo ti biag.

Footnotes