Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Genesis 24:1-67

24  Ita ni Abraham lakayen, aduanen iti tawen; ket ni Jehova binendisionannan ni Abraham iti isuamin.+  Ngarud kinuna ni Abraham iti adipenna, daydiay kalakayan iti sangakabbalayanna, nga agay-aywan idi iti isuamin nga adda kenkuana:+ “Ikabilmo ta imam, pangngaasim, iti baba ti luppok,+  ta masapul a pagsapataenka babaen ken Jehova,+ ti Dios ti langlangit ken ti Dios ti daga, a saanmonto nga iyalaan ti anakko iti asawa manipud iti annak a babbai dagiti Canaanita nga iti tengngada agnanaedak,+  no di ket mapankanto iti pagiliak ken kadagiti kabagiak,+ ket pudno unay a mangalakanto iti asawa a maipaay iti anakko, maipaay ken Isaac.”  Nupay kasta, kinuna kenkuana ti adipen: “Ania ngay no ti babai saanna a kayat ti kumuyog kaniak nga agturong itoy a daga? Masapul kadi a siguraduek nga isubli ti anakmo iti daga a pimmanawam?”+  Gapu itoy kinuna kenkuana ni Abraham: “Agaluadka a dika isubli sadiay ti anakko.+  Ni Jehova a Dios ti langlangit, a nangala kaniak iti balay ni amak ken iti daga dagiti kabagiak+ ken nagsao kaniak ken nagsapata kaniak,+ a kunkunana, ‘Iti bin-im+ itedko daytoy a daga,’+ ibaonnanto ti anghelna nga umun-una ngem sika,+ ket pudno unay nga iyalaamto ti anakko iti asawa manipud sadiay.+  Ngem no ti babai saanna a kayat ti kumuyog kenka, sika met nawayawayaankanton itoy a sapata nga impaaymo kaniak.+ Isuna laeng ta dika isubli sadiay ti anakko.”  Iti kasta ti adipen inkabilna ti imana iti baba ti luppo ni Abraham nga apona ket nagsapata kenkuana maipapan itoy a banag.+ 10  Gapuna ti adipen nangala iti sangapulo a kamelio manipud kadagiti kamelio ni apona ket napan nga addaan iti tunggal kita ti naimbag a banag a kukua ni apona nga adda iti aywanna.+ Kalpasanna timmakder ket nagturong idiay Mesopotamia iti siudad ni Nacor. 11  Iti kamaudiananna pinagparintumengna dagiti kamelio idiay ruar ti siudad iti maysa a bubon ti danum idi agarup rumabii,+ agarup iti tiempo a dagiti babbai nga agsakdo iti danum kaugalianda ti rummuar.+ 12  Ket kinunana: “Jehova a Dios ni apok nga Abraham,+ ipagtengmo, pangngaasim, iti sanguanak itoy nga aldaw ket aramidem ti naayat a kinamanangngaasi+ ken apok nga Abraham.+ 13  Adtoy sisasaadak iti maysa nga ubbog ti danum, ket ti annak a babbai dagiti tattao ti siudad rumrummuarda tapno sumakdoda iti danum.+ 14  Ti masapul a mapasamak ket ti balasang a pagkunaakto, ‘Ibabam koma ti karambam a pagkargaan ti danum, pangngaasim, tapno makainumak,’ ken pudno nga agkunanto, ‘Uminumka, ken painumekto met dagiti kameliom,’ daytoy ti masapul nga itudingmo iti adipenmo,+ ken Isaac; ket babaen itoy maammuak koma a nangaramidkan iti nasungdo nga ayat ken apok.”+ 15  Ala ket, naaramid a sakbay a nalpas a nagsao,+ ay ket, adtoy um-umay ni Rebecca, a nayanak ken Betuel+ nga anak ni Milca+ nga asawa ni Nacor,+ kabsat ni Abraham, ket ti karambana a pagkargaan ti danum adda iti rabaw ti abagana.+ 16  Ita ti balasang makaatrakar unay ti langana,+ maysa a birhen, ket awan pay lalaki a nakidenna kenkuana;+ ket isu simmalog iti ubbog ket rinugianna a punnuen ti karambana a pagkargaan ti danum ket kalpasanna simmang-at. 17  Madagdagus a ti adipen nagtaray a sumabet kenkuana ket kinunana: “Ikkannak, pangngaasim, iti sangkasimsim a danum manipud iti karambam.”+ 18  Kalpasanna kinunana: “Uminumka, apok.” Gapuna sidadaras nga imbabana ti karambana iti imana ket pinainumna.+ 19  Idi nalpasna a pinainum, idin kinunana: “Maipaay met kadagiti kameliom sumakdoakto iti danum agingga a malpasda nga uminum.”+ 20  Gapuna sidadaras nga imbukbokna ti karambana iti pagpainuman ket nagtaray pay a maulit-ulit iti bubon tapno sumakdo iti danum,+ ket nagtultuloy a simmakdo maipaay kadagiti amin a kameliona. 21  Bayat dayta isu minatmatmatan ti lalaki buyogen ti panagsiddaaw, a nagtalinaed a siuulimek tapno maammuanna no pinagballigi ni Jehova ti panagdaliasatna wenno saan.+ 22  Iti kasta naaramid nga, idi a nalpasen nga imminum dagiti kamelio, idin nangala ti lalaki iti maysa a balitok nga aritos ti agong+ a kagudua a siklo ti dagsenna ken dua a pulseras+ a maipaay iti im-imana, sangapulo a siklo a balitok ti dagsenda, 23  ket kinunana: “Makin-anak kenka? Ibagam kaniak, pangngaasim. Adda kadi aniaman a lugar iti balay ni amam a pangbusbosanmi iti rabii?”+ 24  Iti kasta kinunana kenkuana: “Siak ti anak ni Betuel+ nga anak ni Milca, nga impasngayna ken Nacor.”+ 25  Ket kinunana pay kenkuana: “Agpadpada nga adda garami ken adu a taraon kadakami, kasta met ti maysa a lugar a pangbusbosan iti rabii.”+ 26  Ket ti lalaki nagrukob ket inruknoyna ti bagina iti sanguanan ni Jehova+ 27  ket kinunana: “Bendito koma ni Jehova+ a Dios ni apok nga Abraham, a saan a nangbaybay-a iti naayat a kinamanangngaasina ken iti kinamapagpiaranna iti apok. Siak bayat ti kaaddak iti dalan, inturongnak ni Jehova iti balay dagiti kakabsat ni apok.”+ 28  Ket ti balasang napan a nagtaray ken nangibaga iti sangakabbalayan ni inana ti maipapan kadagitoy a banag. 29  Ita addaan ni Rebecca iti kabsat a lalaki ket ti naganna Laban.+ Gapuna ni Laban napan a nagtaray iti lalaki nga adda iti ruar idiay ubbog. 30  Ket naaramid nga idi makitana ti aritos ti agong ken dagiti pulseras+ iti im-ima ti kabsatna ken idi mangngegna ti sasao ni Rebecca a kabsatna, a kunkunana: “Kastoy ti panagsao kaniak ti lalaki,” idin napan iti lalaki ket isu adda sadiay, sitatakder iti sibay dagiti kamelio idiay ubbog. 31  Madagdagus a kinunana: “Umayka, sika a bendito ni Jehova.+ Apay nga agtalinaedka a nakatakder ditoy ruar, idinto ta siak insaganak ti balay ken lugar a maipaay kadagiti kamelio?” 32  Gapu iti dayta ti lalaki simrek iti balay, ket inalsaanna dagiti kamelio ken nangted iti garami ken taraon kadagiti kamelio ken danum tapno bugguanna ti saksakana ken ti saksaka dagiti lallaki a naikuyog kenkuana.+ 33  Kalpasanna adda makan a naidasar iti sanguananna, ngem kinunana: “Saanakto a mangan agingga a naisaokon ti maipapan kadagiti rantak.” Ngarud kinunana: “Agsaoka!”+ 34  Kalpasanna kinunana: “Adipennak ni Abraham.+ 35  Ket ni Jehova binendisionanna ni apok iti kasta unay ta itultuloyna a pagbalinen a dakdakkel ken ipaayan iti karkarnero ken bakbaka ken pirak ken balitok ken ad-adipen a lallaki ken ad-adipen a babbai ken kamkamelio ken as-asno.+ 36  Kanayonanna, ni Sara nga asawa ni apok nangipasngay iti anak a lalaki ken apok idi a bimmaketen;+ ket itednanto kenkuana ti isuamin nga adda kenkuana.+ 37  Gapuna pinagsapatanak ni apok, a kunkunana, ‘Dikanto iyalaan ti anakko iti asawa manipud iti annak a babbai dagiti Canaanita nga iti dagada agnanaedak.+ 38  Saan, no di ket mapankanto iti balay ni amak ken iti pamiliak+ ket masapul nga iyalaam ti anakko iti asawa.’+ 39  Ngem kinunak ken apok, ‘Anian no ti babai saanto a kumuyog kaniak?’+ 40  Idin kinunana kaniak, ‘Ni Jehova, nga iti sanguananna nagnaak,+ ibaonnanto ti anghelna+ a makikuyog kenka ket sigurado a pagballigiennanto ti dalanmo;+ ket masapul nga iyalaam ti anakko iti maysa nga asawa manipud pamiliak ken manipud balay ni amak.+ 41  Iti dayta a tiempo mawayawayaankanto iti pagrebbengan kaniak babaen ti sapata inton makagtengka iti pamiliak, ket no isu saandanto nga ited kenka, ngarud siwayawayakanton iti pagrebbengan kaniak babaen ti sapata.’+ 42  “Idi nakagtengak idiay ubbog ita nga aldaw, idin kinunak, ‘Jehova a Dios ni apok nga Abraham, no pudno a pagballigiem ti dalanko a papanak,+ 43  adtoy sisasaadak iti maysa nga ubbog ti danum. Ti masapul a mapasamak ket ti balasang+ a rumrummuar tapno sumakdo iti danum a pudno a pagkunaakto: “Pangngaasim, bay-annak nga uminum iti bassit a danum manipud iti karambam,” 44  ken pudno nga agkunanto kaniak: “Agpadpada nga uminumka, ken sumakdoakto met iti danum maipaay kadagiti kameliom,” isu ti babai nga intuding ni Jehova maipaay iti anak ni apok.’+ 45  “Sakbay a nalpasak a nagsao+ iti pusok,+ ay ket, rumrummuaren ni Rebecca, agraman ti karambana iti rabaw ti abagana; ket isu simmalog iti ubbog ket rinugianna ti sumakdo iti danum.+ Idin kinunak kenkuana, ‘Painumennak, pangngaasim.’+ 46  Gapuna sidadaras nga imbabana ti karambana manipud kenkuana ket kinunana, ‘Uminumka,+ ken painumekto met dagiti kameliom.’ Idin imminumak, ket pinainumna met dagiti kamelio. 47  Kalpasan dayta nagimtuodak kenkuana ket kinunak, ‘Makin-anak kenka?’+ nga iti dayta kinunana, ‘Ti anak ni Betuel nga anak ni Nacor, nga impasngay kenkuana ni Milca.’ Iti kasta inkabilko ti aritos ti agong iti abut ti agongna ken dagiti pulseras iti im-imana.+ 48  Ket nagrukobak ket inruknoyko ti bagik iti sanguanan ni Jehova ket binenditok ni Jehova a Dios ni apok nga Abraham,+ isu a nangiturong kaniak iti pudno a dalan+ tapno alaek ti anak a babai ti kabsat ni apok a maipaay iti anakna. 49  Ket ita no pudno a watwatwatenyo ti naayat a kinamanangngaasi ken kinamapagpiaran maipaay iti apok,+ ibagayo kaniak; ngem no saan, ibagayo kaniak, tapno makapagbaw-ingak iti makannawan wenno iti makannigid.”+ 50  Kalpasanna simmungbat da Laban ken Betuel ket kinunada: “Nagtaud ken Jehova daytoy a banag.+ Saanmi a mabalin ti agsao kenka iti dakes wenno naimbag.+ 51  Adtoy ni Rebecca iti sanguanam. Alaem ket mapanka, ket isu agbalin koma nga asawa ti anak ni apom, kas iti sinao ni Jehova.”+ 52  Ket naaramid nga idi nangngeg ti adipen ni Abraham ti sasaoda, madagdagus nga inruknoyna ti bagina iti daga iti sanguanan ni Jehova.+ 53  Ket ti adipen rinugianna nga iruar dagiti aruaten a pirak ken dagiti aruaten a balitok ken kawkawes ken ited ida ken Rebecca; ket nangted iti napili a bambanag iti kabsatna a lalaki ken iti inana.+ 54  Kalpasan dayta nangan ken imminumda, isu ken dagiti lallaki a naikuyog kenkuana, ket binusbosda ti rabii sadiay ket bimmangonda iti bigat. Kalpasanna kinunana: “Ibaondak ken apok.”+ 55  Iti daytoy ti kabsatna ken ti inana kinunada: “Bay-am a makipagyan kadakami ti balasang iti uray sangapulo nga aldaw laeng. Kalpasanna mabalinnan ti mapan.” 56  Ngem kinunana kadakuada: “Saandak nga igawid, yantangay ni Jehova pinagballigina ti dalanko.+ Ibaondak, tapno makapanak ken apok.”+ 57  Gapuna kinunada: “Ayabantayo ti balasang ket agimtuodtayo iti ngiwatna.”+ 58  Idin inayabanda ni Rebecca ket kinunada kenkuana: “Mapankanto kadi a kumuyog itoy a lalaki?” Kalpasanna kinunana: “Situtulokak a mapan.”+ 59  Iti dayta imbaonda ni Rebecca+ a kabsatda ken ti manangtaripatona+ ken ti adipen ni Abraham ken dagiti lallakina. 60  Ket rinugianda a bendisionan ni Rebecca ken kunaen kenkuana: “O sika, kabsatmi a babai, agbalinka koma a rinibu a maminsangapulo a ribu, ket ti bin-im tagikuaenna koma ti ruangan dagidiay manggura iti dayta.”+ 61  Kalpasan dayta timmakder ni Rebecca ken dagiti katulonganna a babbai+ ket napanda a sisasakay kadagiti kamelio+ ken sumarsarunoda iti lalaki; ket ti adipen innalana ni Rebecca ket napan. 62  Ita ni Isaac dimteng manipud iti dalan nga agturong idiay Beer-lahai-roi,+ ta isu agnanaed idi iti daga ti Negeb.+ 63  Ket ni Isaac rimmuar a nagpagnapagna tapno agmennamenna+ idiay tay-ak iti agarup sarsardam. Idi intangwana dagiti matana ken kimmita, ay ket, sadiay um-umay idi dagiti kamelio! 64  Idi intangwa ni Rebecca dagiti matana, naimatanganna ni Isaac ket dimsaag iti kamelio. 65  Kalpasanna kinunana iti adipen: “Siasino daydiay a lalaki a magmagna iti tay-ak a sumabet kadatayo?” ket kinuna ti adipen: “Isu ti apok.” Ket nangala iti maysa nga alidungdong ket nagdalungdong.+ 66  Ket ti adipen insalaysayna ken Isaac ti amin a bambanag nga inaramidna. 67  Kalpasan dayta isu inserrek ni Isaac iti tolda ni Sara nga inana.+ Iti kasta innalana ni Rebecca ket nagbalin nga asawana;+ ket nagayat kenkuana,+ ket ni Isaac nakasarak iti liwliwa kalpasan ti ipupusay ni inana.+

Footnotes