Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Genesis 20:1-18

20  Ita immakar ni Abraham iti pakarso manipud sadiay+ a nagturong iti daga ti Negeb ket nagnanaed iti nagbaetan ti Cades+ ken Sur+ ken nagtataeng kas ganggannaet idiay Gerar.+  Ket maipapan ken Sara nga asawana inulit ni Abraham: “Isu kabsatko.”+ Iti kasta ni Abimelec nga ari ti Gerar nagbaon ket innalana ni Sara.+  Kalpasanna ti Dios immay ken Abimelec iti maysa a tagtagainep iti rabii ket kinunana kenkuana: “Adtoy arigmo ti natayen gapu iti babai nga innalam,+ yantangay isu kukuan ti sabali a makinkukua kas asawana.”+  Nupay kasta, saan nga immasideg kenkuana ni Abimelec.+ Gapuna kinunana: “Jehova, papatayemto kadi ti maysa a nasion a pudpudno a nalinteg?+  Saan kadi a kinunana kaniak, ‘Isu kabsatko’? ket isu—saan kadi a kinunana met, ‘Isu kabsatko a lalaki’? Iti kinapudno ti pusok ken buyogen ti kinaawan basol dagiti imak inaramidko daytoy.”+  Iti kasta ti pudno a Dios kinunana kenkuana iti tagtagainep: “Siak met naammuak nga iti kinapudno ti pusom inaramidmo daytoy,+ ket inggawidka met nga agbasol a maikaniwas kaniak.+ Dayta ti makagapu a saanka a pinalubosan a mangsagid kenkuana.+  Ngem ita isublim ti asawa ti lalaki, ta isu maysa a mammadto,+ ket umararawto maipaay kenka.+ Gapuna agtultuloyka nga agbiag. Ngem no isu saanmo nga isubli, ammuem a mataykanto a di bumurong, sika ken ti isuamin a kukuam.”+  Gapuna bimmangon a nasapa ni Abimelec iti bigat ket inayabanna amin nga adipenna ket sinaona amin dagitoy a banag kadagiti lapayagda. Ket dagiti lallaki nagbutengda iti kasta unay.  Kalpasanna ni Abimelec inayabanna ni Abraham ket kinunana kenkuana: “Ania ti inaramidmo kadakami, ket ania a basol ti naaramidko a maikaniwas kenka, iti kasta nangyegka kaniak ken iti pagariak iti dakkel a basol?+ Nagaramidka mainaig kaniak iti ar-aramid a saan a rumbeng a naaramid.”+ 10  Ket intultuloy ni Abimelec a kunaen ken Abraham: “Ania ti makagapu nga inaramidmo daytoy a banag?”+ 11  Iti daytoy kinuna ni Abraham: “Agsipud ta kinunak idi iti bagik, ‘Di pagduaduaan nga awan ti panagbuteng iti Dios iti daytoy a disso,+ ket sigurado a papatayendakto gapu iti asawak.’+ 12  Ken, malaksid iti dayta, isu pudpudno a kabsatko, ti anak ni amak, isuna laeng ta saan nga anak ni inak; ket isu nagbalin nga asawak.+ 13  Ket naaramid nga, idi a ti Dios pinagallaallanak manipud balay ni amak,+ idin kinunak kenkuana, ‘Daytoy ti naayat a kinamanangngaasim+ a mabalinmo a watwaten maipaay kaniak: Iti tunggal disso a pakagtengantanto kunaem maipapan kaniak: “Isu kabsatko.”’”+ 14  Kalpasan dayta nangala ni Abimelec iti karkarnero ken bakbaka ken ad-adipen a lallaki ken ad-adipen a babbai ket intedna ida ken Abraham ket insublina kenkuana ni Sara nga asawana.+ 15  Kanayonanna kinuna ni Abimelec: “Adtoy ti dagak madadaan nga agpaay kenka. Agnaedka no sadino ti nasayaat kadagita matam.”+ 16  Ket kinunana ken Sara: “Adtoy mangtedak iti sangaribu a kapisi ti kuarta a pirak ken kabsatmo.+ Adtoy agpaay dayta kenka nga abbong+ dagiti mata iti isuamin a maikuyog kenka, ken iti sanguanan ti isuamin, ket mawaknitanka iti umsi.” 17  Ket ni Abraham nangrugi nga umararaw iti pudno a Dios;+ ket ti Dios pinaimbagna ni Abimelec ken ti asawana ken dagiti adipenna a babbai, ket nangrugida a nagipasngay iti annak. 18  Ta ni Jehova rinikpanna a siiirut ti tunggal aanakan iti balay ni Abimelec gapu ken Sara, nga asawa ni Abraham.+

Footnotes