Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Genesis 19:1-38

19  Ita dimteng ti dua nga anghel idiay Sodoma iti rabii, ket situtugaw idi ni Lot iti ruangan ti Sodoma.+ Idi a naimatangan ida ni Lot, iti kasta timmakder tapno sumabet kadakuada ket nagruknoy a ti rupana dumanon iti daga.+  Ket kinunana: “Pangngaasiyo, ita, appok, umaykayo, pangngaasiyo, iti balay ti adipenyo ket agyankayo iti agpatnag ket mabugguan dagiti sakayo.+ Kalpasanna bumangonkayto a masapa ket agdaliasatkayo iti dalanyo.”+ Iti daytoy kinunada: “Saan, no di ket iti publiko a plasa ti pagyananminto iti agpatnag.”+  Ngem napalalo ti panangpilitna kadakuada,+ iti kasta immayda kenkuana ket simrekda iti balayna. Kalpasanna nangaramid iti padaya maipaay kadakuada,+ ket nagluto kadagiti di pinaalsa a tinapay,+ ket nanganda.  Sakbay a makapagiddada, dagiti lallaki ti siudad, dagiti lallaki ti Sodoma, pinalikmutanda ti balay,+ manipud ubing agingga iti lakay, amin dagiti tattao kas maymaysa a bunggoy dagiti managderraaw.+  Ket nagpukpukkawda ken Lot ket kinunkunada kenkuana: “Sadino ti ayan dagiti lallaki a simmangbay kenka ita a rabii? Iruarmo ida kadakami tapno makidennakami kadakuada.”+  Kamaudiananna ni Lot rimmuar a napan kadakuada iti pagserkan, ngem inrikepna ti ridaw iti likudanna.  Kalpasanna kinunana: “Pangngaasiyo, kakabsatko, dikay agtignay iti dakes.+  Pangngaasiyo, adtoy addaanak iti dua nga annak a babbai a saan pay a pulos nakidenna iti lalaki.+ Pangngaasiyo, bay-andak nga iruarko ida kadakayo. Kalpasanna aramidenyo kadakuada kas iti naimbag kadagiti matayo.+ Isuna laeng ta dikay aramiden ti aniaman a banag kadagitoy a lallaki,+ agsipud ta dayta ti makagapu nga immayda iti salinong ti atepko.”+  Gapu itoy kinunada: “Aglisika!” Ket innayonda: “Daytoy agmaymaysa a tao immay ditoy tapno agtaeng kas ganggannaet+ ket agakem ketdin a kas ukom.+ Ita dakdakes ti aramidenmi kenka ngem kadakuada.” Ket dinupdupudopda iti nakaro ti lalaki,+ ni Lot, ket umas-asidegda idi tapno serrekenda ti ruangan.+ 10  Gapuna inyunnat dagiti lallaki ti im-imada ket inserrekda ni Lot kadakuada, iti balay, ket inrikepda ti ridaw. 11  Ngem binulsekda dagiti lallaki nga adda iti pagserkan ti balay,+ manipud iti kababassitan agingga iti kadadakkelan,+ iti kasta napakilda iti panangpadasda a mangsapul iti pagserkan.+ 12  Kalpasanna dagiti lallaki kinunada ken Lot: “Adda kadi pay asinoman a kaduam ditoy? Manugang-a-lalaki ken annakmo a lallaki ken annakmo a babbai ken isuamin a kukuam iti siudad, iruarmo manipud itoy a disso!+ 13  Ta dadaelenmi daytoy a disso, agsipud ta ti ikkis maibusor kadakuada pimmigsa iti sanguanan ni Jehova,+ iti kasta imbaonnakami ni Jehova tapno dadaelenmi ti siudad.”+ 14  Gapuna rimmuar ni Lot ket rinugianna ti agsao kadagiti manugangna-a-lallaki isuda a mangala idi iti annakna a babbai, ket kinunkunana: “Tumakderkayo! Agtalawkayo iti daytoy a disso, agsipud ta ni Jehova dadaelenna ti siudad!”+ Ngem kadagiti mata dagiti manugangna-a-lallaki isu ket kasla maysa a tao nga agang-angaw.+ 15  Nupay kasta, idi nagbannawagen, idin dagiti anghel pinagganatda ni Lot, a kunkunada: “Tumakderka! Alaem ti asawam ken ti dua nga annakmo a babbai a masarakan ditoy,+ ta amangan no mapunaskayo iti biddut ti siudad!”+ 16  Idi nga isu nagtultuloy a nagtaktak,+ ngarud gapu iti asi kenkuana ni Jehova,+ iniggaman dagiti lallaki ti imana ken ti ima ti asawana ken ti im-ima ti dua nga annakna a babbai ket isu inruarda ken insaadda iti ruar ti siudad.+ 17  Ket naaramid nga, apaman a naiyegda ida iti wayaway, rinugianna a kunaen: “Agtalawka maipaay iti kararuam!+ Dika tumaliaw iti likudam+ ket dika agintek iti intero a Distrito!+ Agtalawka nga agturong iti nakabambantay a rehion ta amangan no mapunaska!”+ 18  Kalpasanna kinuna kadakuada ni Lot: “Saan a kasta, pangngaasim, Jehova! 19  Pangngaasim, ita, ti adipenmo nakasarak iti pabor kadagita matam+ iti kasta itantan-okmo ti naayat a kinamanangngaasim,+ nga impakitam kaniak tapno taginayonem a sibibiag ti kararuak,+ ngem siak—saanko a kabaelan ti agtalaw nga agturong iti nakabambantay a rehion ta amangan no ti didigra makaasideg kaniak ket sigurado a matayak.+ 20  Pangngaasim, ita, daytoy a siudad asideg a pagkamangan ket bassit a banag dayta.+ Mabalin kadi, pangngaasim, nga agtalawak nga agturong sadiay—saan kadi a bassit a banag dayta?—ket ti kararuak agtultuloyto nga agbiag.”+ 21  Gapuna kinunana kenkuana: “Adtoy ipakitaanka iti konsiderasion agingga pay iti daytoy,+ babaen ti saanko a panangduprak iti siudad a nasaom.+ 22  Darasem! Agtalawka nga agturong sadiay, agsipud ta awan ti banag a mabalinko nga aramiden agingga a makagtengka sadiay!”+ Dayta ti makagapu a pinanagananna ti siudad iti Zoar.+ 23  Ti init simmirayen iti rabaw ti daga idi dimteng ni Lot idiay Zoar.+ 24  Idin pinagtudo ni Jehova iti asupre ken apuy manipud ken Jehova, manipud iti langlangit, iti Sodoma ken iti Gomorra.+ 25  Gapuna nagtultuloy a dinuprakna dagitoy a siudad, uray ti intero a Distrito ken amin dagiti agnanaed kadagiti siudad ken dagiti mula iti daga.+ 26  Ket ti asawana nangrugi a tumaliaw manipud likudanna, ket nagbalin nga adigi nga asin.+ 27  Ita ni Abraham napan a nasapa iti bigat iti lugar a nagtakderanna idi iti sanguanan ni Jehova.+ 28  Kalpasanna timmannawag iti turong ti Sodoma ken Gomorra ken iti turong ti intero a daga ti Distrito ket adda nakitana a buya. Ay ket, adtoy ti napuskol nga asuk nagpangato manipud iti daga a kas iti napuskol nga asuk ti maysa a pugon!+ 29  Ket naaramid nga idi a ti Dios dinadaelna dagiti siudad ti Distrito sipapanunot ti Dios ken ni Abraham iti kasta nangaramid kadagiti addang tapno papanawenna ni Lot iti tengnga ti pannakaduprak idi duprakenna dagiti siudad a kadagita a nagnanaed ni Lot.+ 30  Idi agangay simmang-at ni Lot manipud Zoar ket nangrugi a nagnaed iti nakabambantay a rehion, ket naikuyog kenkuana ti dua nga annakna a babbai,+ agsipud ta isu nagbuteng nga agnaed idiay Zoar.+ Gapuna nangrugi nga agnaed iti maysa a rukib, isu ken ti dua nga annakna a babbai. 31  Ket ti inauna kinunana iti ub-ubing a babai: “Lakayen ni amata ket awan ti lalaki iti daga a makidenna kadata maitunos iti pamay-an ti intero a daga.+ 32  Umayka, ikkanta ni amata iti arak nga inumenna+ ket makikaiddata kenkuana ket taginayonenta ti kaputotan manipud ken amata.”+ 33  Gapuna inik-ikkanda ni amada iti arak nga inumenna bayat dayta a rabii;+ idin simrek ti inauna ket nakikaidda ken amana, ngem saanna nga ammo idi nakikaidda ken idi bimmangon. 34  Ket naaramid iti sumaganad nga aldaw a ti inauna kinunana iti ub-ubing kalpasanna: “Adtoy nakikaiddaak ken amak idi rabii. Ikkanta iti arak nga inumenna ita a rabii met. Kalpasanna sumrekka, makikaiddaka kenkuana, ket taginayonenta ti kaputotan manipud ken amata.” 35  Gapuna maulit-ulit nga inikkanda ni amada iti arak nga inumenna bayat dayta a rabii met; kalpasanna timmakder ti ub-ubing ket nakikaidda kenkuana, ngem saanna nga ammo idi nakikaidda ken idi bimmangon. 36  Ket agpadpada a ti annak a babbai ni Lot nagsikogda manipud ken amada.+ 37  Idi agangay ti inauna nagbalin nga ina ti maysa nga anak a lalaki ket pinanagananna iti Moab.+ Isu ti ama ti Moab, agingga itoy nga aldaw.+ 38  No maipapan iti ub-ubing, nangipasngay met iti anak a lalaki ket kalpasanna pinanagananna iti Ben-ammi. Isu ti ama ti annak ni Ammon,+ agingga itoy nga aldaw.

Footnotes