Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Genesis 18:1-33

18  Kalpasanna nagparang kenkuana ni Jehova+ kadagiti dadakkel a kayo ti Mamre,+ bayat a situtugaw idi iti pagserkan ti tolda iti agarup kapudot ti aldaw.+  Idi intangadna dagiti matana,+ idin kimmita ket sadiay tallo a lallaki ti sitatakder iti saan unay nga adayo kenkuana. Idi naimatanganna ida rinugianna ti nagtaray tapno sumabet kadakuada manipud iti pagserkan ti tolda ket nagruknoy agingga iti daga.+  Kalpasanna kinunana: “Jehova, no, ita, nakasarakak iti pabor kadagiti matam, pangngaasim dika labsan ti adipenmo.+  Maala koma ti bassit a danum, pangngaasiyo, ket pabugguanyonto dagiti sakayo.+ Kalpasanna agdalupisakkayo iti sirok ti kayo.+  Ket bay-andak a mangala iti sangkapisi a tinapay, ket pasarantaenyo dagiti pusoyo.+ Kalpasan dayta, mabalinyon ti lumabas, agsipud ta dayta ti makagapu a limmabaskayo itoy a dalan nga agturong iti adipenyo.” Gapu itoy kinunada: “Ala wen. Mabalinmo nga aramiden kas iti sinaom.”  Gapuna nagdardaras ni Abraham a napan iti tolda agingga ken Sara ket kinunana: “Darasem! Mangalaka iti tallo a sea a sukat ti nasayaat nga arina, gamayem ti bellaay ket mangaramidka kadagiti nagbukel a tinapay.”+  Sumaganad timmaray ni Abraham nga agturong iti pangen ket nangala iti naganus ken nasayaat nga urbon a toro ket intedna dayta iti katulongan, ket nagdardaras a mangisagana iti dayta.+  Kalpasanna nangala iti mantekilia ken gatas ken ti urbon a toro nga insaganana ket indasarna iti sanguananda.+ Kalpasanna isu nagtalinaed a sitatakder iti sibayda iti sirok ti kayo bayat a mangmanganda.+  Kinunada ita kenkuana: “Sadino ti ayan ni Sara nga asawam?”+ Iti daytoy kinunana: “Adda ditoy tolda!”+ 10  Gapuna intuloyna: “Sigurado nga agsubliak kenka inton sumaganad a tawen iti kastoy a tiempo, ket, adtoy! ni Sara nga asawam maaddaanto iti anak a lalaki.”+ Ita agim-imdeng idi ni Sara iti pagserkan ti tolda, ket adda dayta iti likudan ti lalaki. 11  Ket da Abraham ken Sara lakay ken baketdan, yantangay aduandan iti tawen.+ Simmardengen nga agkadawyan ni Sara.+ 12  Gapuna nangrugi nga agkatawa ni Sara iti unegna,+ a kunkunana: “Kalpasan a kimmapsutakon, agpayso ngata a maaddaanakto iti ragsak, malaksid pay a lakayen ni apok?”+ 13  Idin ni Jehova kinunana ken Abraham: “Apay a nagkatawa ni Sara, a kunkunana, ‘Agpayso ngata ken pudpudno nga agpasngayakto nupay bimmaketakon?’+ 14  Adda aya aniaman a karkarna unay ken Jehova?+ Iti naituding a tiempo agsubliakto kenka, inton sumaganad a tawen iti kastoy a tiempo, ket ni Sara maaddaanto iti anak a lalaki.” 15  Ngem rinugian nga ilibak ni Sara, a kunkunana: “Saanak a nagkatawa!” Ta isu mabuteng idi. Gapu itoy kinunana: “Saan! no di ket nagkatawaka.”+ 16  Idi agangay timmakder dagiti lallaki manipud sadiay ket timmannawagda iti turong ti Sodoma,+ ket ni Abraham nagna a kaduada tapno kuyogenna ida.+ 17  Ket kinuna ni Jehova: “Taginayonek kadi a sililimed ken Abraham ti aramidek?+ 18  Ay ket, sigurado nga agbalin ni Abraham a maysa a nasion a dakkel ken nabileg, ket dagiti amin a nasion ti daga bendisionandanto ti bagbagida babaen kenkuana.+ 19  Ta isu naam-ammok tapno mabilinna ti annakna ken ti sangakabbalayanna a sumaruno kenkuana iti kasta salimetmetanda ti dana ni Jehova tapno aramidenda ti kinalinteg ken panangukom;+ tapno ni Jehova sigurado a maiyegna ken Abraham ti sinaona maipapan kenkuana.”+ 20  Gapuna kinuna ni Jehova: “Ti ikkis ti panagreklamo maipapan ti Sodoma ken Gomorra,+ wen, natbag dayta, ket ti basolda, wen, nadagsen unay.+ 21  Determinadoak unay nga umulog tapno makitak no naan-anay nga agtigtignayda sigun iti ikkis gapu iti dayta a dimteng kaniak, ket, no saan, maammuak.”+ 22  Iti daytoy a gundaway nagbaw-ing dagiti lallaki manipud sadiay ket nagturongda idiay Sodoma; ngem no maipapan ken Jehova,+ sitatakder pay laeng idi iti sanguanan ni Abraham.+ 23  Idin immasideg ni Abraham ket rinugianna a kunaen: “Pudno kadi a punasemto ti nalinteg a mairaman iti nadangkes?+ 24  Kas pagarigan ta adda limapulo a nalinteg a tattao iti tengnga ti siudad. Punasemto kadi, ngarud, ida ket saanmo a pakawanen ti disso maipagapu iti limapulo a nalinteg nga adda iti unegna?+ 25  Narigat a pagarupen kenka nga agtigtignayka iti kastoy a pamay-an tapno papatayem ti nalinteg a tao a mairaman iti nadangkes iti kasta kasapulan a mapasamak iti nalinteg a tao ti kas iti maaramid iti nadangkes!+ Narigat a pagarupen kenka.+ Ti aya Ukom ti intero a daga saanna nga aramiden no ania ti umiso?”+ 26  Kalpasanna kinuna ni Jehova: “No makasarakakto idiay Sodoma iti limapulo a nalinteg a tattao iti tengnga ti siudad pakawanekto ti intero a disso maigapu kadakuada.”+ 27  Ngem simmungbat ni Abraham ket kinunana: “Pangngaasim, adtoy siakon a mismo ti nagtignay nga agsao ken Jehova, idinto ta tapokak ken dapdapoak.+ 28  Kas pagarigan ta ti limapulo a nalinteg agkurang iti lima. Dadaelemto kadi ti intero a siudad maipuon iti lima?” Iti daytoy kinunana: “Saankonto a dadaelen no makasarakak sadiay iti uppat a pulo ket lima.”+ 29  Ngem kaskasdi latta a nagsao manen kenkuana ket kinunana: “Kas pagarigan ta uppat a pulo ti masarakan sadiay.” Kalpasanna kinunana: “Saankonto nga aramiden dayta maigapu iti uppat a pulo.” 30  Ngem intuloyna: “Sapay koma, pangngaasim, ta saan nga agpudot ni Jehova buyogen ti unget,+ no di ket bay-annak nga agsao:+ Kas pagarigan ta tallopulo ti masarakan sadiay.” Kalpasanna kinunana: “Saankonto nga aramiden dayta no makasarakak iti tallopulo sadiay.” 31  Ngem intultuloyna: “Pangngaasim, adtoy siakon a mismo ti nagtignay nga agsao ken Jehova:+ Kas pagarigan ta duapulo ti masarakan sadiay.” Kalpasanna kinunana: “Saankonto a dadaelen maigapu iti duapulo.”+ 32  Kamaudiananna kinunana: “Sapay koma, pangngaasim, ta saan nga agpudot ni Jehova buyogen ti unget,+ no di ket bay-annak nga agsao itoy maminsan laengen:+ Kas pagarigan ta sangapulo ti masarakan sadiay.” Kalpasanna kinunana: “Saankonto a dadaelen maigapu iti sangapulo.”+ 33  Idin pimmanaw ni Jehova+ idi nalpasnan ti agsao ken Abraham, ket ni Abraham nagsubli iti dissona.

Footnotes