Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Genesis 17:1-27

17  Idi siam a pulo ket siam ti tawenen ni Abram, idin ni Jehova nagparang ken Abram ket kinunana kenkuana:+ “Siak ti Dios a Mannakabalin-amin.+ Magnaka iti sanguanak ket paneknekam ti bagim nga awan pagkuranganna.+  Ket itedkonto ti tulagko iti nagbaetanta,+ tapno siak mapagaduka iti kasta unay.”+  Gapu itoy inruknoy ni Abram ti rupana,+ ket nagtultuloy a makisao kenkuana ti Dios, a kunkunana:  “No maipapan kaniak, adtoy! ti tulagko adda kenka,+ ket sigurado nga agbalinkanto nga ama ti maysa a bunggoy dagiti nasion.+  Ket saankanton a pulos mapanaganan iti Abram, ket ti naganmo agbalinto nga Abraham, agsipud ta pagbalinenkanto nga ama ti maysa a bunggoy dagiti nasion.  Ket pagbalinenkanto a nabunga iti kasta unay ken pagbalinenkanto a nasnasion, ket tumpuarto kenka ti ar-ari.+  “Ket itungpalkonto ti tulagko iti nagbaetanta+ ken iti bin-im a sumaruno kenka sigun kadagiti kaputotanda maipaay iti maysa a tulag agingga iti tiempo a di nakedngan,+ tapno paneknekak ti bagik a Dios kenka ken iti bin-im a sumaruno kenka.+  Ket itedkonto kenka ken iti bin-im a sumaruno kenka ti daga a pagnanaedam kas ganggannaet,+ ti mismo nga intero a daga ti Canaan, maipaay a sanikua agingga iti tiempo a di nakedngan; ket paneknekakto ti bagik a Dios kadakuada.”+  Ket ti Dios kinunana pay ken Abraham: “No maipapan kenka, salimetmetam ti tulagko, sika ken ti bin-im a sumaruno kenka sigun kadagiti kaputotanda.+ 10  Daytoy ti tulagko a salimetmetanyonto, iti nagbaetak ken dakayo, uray ti bin-im a sumaruno kenka:+ Tunggal lalaki kadakayo masapul a makugit.+ 11  Ket masapul a makugitkayo iti lasag dagiti makinsango a kudilyo, ket masapul nga agserbi dayta kas pagilasinan ti tulag iti nagbaetantayo.+ 12  Ket tunggal lalaki kadakayo a walo nga aldawna masapul a makugit,+ sigun kadagiti kaputotanyo, asinoman a nayanak iti balay ken asinoman a nagatang iti kuarta manipud ti asinoman a ganggannaet a saan a nagtaud iti bin-im. 13  Tunggal lalaki a nayanak iti balaymo ken tunggal lalaki a nagatang iti kuartam masapul a makugit a di bumurong;+ ket ti tulagko iti lasagyo agserbinto kas maysa a tulag agingga iti tiempo a di nakedngan.+ 14  Ket ti di nakugit a lalaki a saanto a makugit ti lasag ti makinsango a kudilna, dayta a mismo a kararua masapul a magessat kadagiti kailianna.+ Rinakrakna ti tulagko.” 15  Ket intultuloy ti Dios a kunaen ken Abraham: “No maipapan ken Sarai nga asawam, dika naganen iti Sarai, agsipud ta Sara ti naganna.+ 16  Ket isu bendisionakto ken kasta met nga ipaayanka iti maysa nga anak a lalaki manipud kenkuana;+ ket isu bendisionakto ket agbalinto a nasnasion;+ ti ar-ari dagiti ili agtauddanto kenkuana.”+ 17  Gapu itoy inruknoy ni Abraham ti rupana ket nangrugi nga agkatawa ken agkuna iti pusona:+ “Ti aya lalaki a sangagasut ti tawenna maaddaanto iti maipasngay nga anak, ket ni aya Sara, wen, ti aya babai a siam a pulo ti tawenna agpasngayto?”+ 18  Kalpasan dayta kinuna ni Abraham iti pudno a Dios: “O sapay koma ta ni Ismael agbiag iti sanguanam!”+ 19  Iti daytoy kinuna ti Dios: “Ni Sara nga asawam pudno nga ipasngayannaka iti anak a lalaki, ket masapul a panaganam iti Isaac.+ Ket ipasdekkonto ti tulagko kenkuana maipaay iti maysa a tulag agingga iti tiempo a di nakedngan iti bin-ina a sumaruno kenkuana.+ 20  Ngem no maipapan ken ni Ismael nangngegka. Adtoy! Bendisionakto ket pagbalinekto a nabunga ket paaduekto iti kasta unay.+ Pudno unay a mangpataudto iti sangapulo ket dua a panguluen, ket isu pagbalinekto a dakkel a nasion.+ 21  Nupay kasta, ti tulagko ipasdekkonto ken Isaac,+ nga ipasngayto kenka ni Sara iti daytoy naituding a tiempo inton sumaganad a tawen.”+ 22  Iti kasta nalpasen a nakisao kenkuana ti Dios ket nagpangato manipud ken Abraham.+ 23  Kalpasanna ni Abraham innalana ni Ismael nga anakna ken amin dagiti lallaki a nayanak iti balayna ken tunggal maysa a nagatang iti kuartana, tunggal lalaki kadagiti tattao iti sangakabbalayan ni Abraham, ket kinugitna ti lasag dagiti makinsango a kudilda iti daytoy met laeng nga aldaw, kas iti sinao kenkuana ti Dios.+ 24  Ket ni Abraham siam a pulo ket siam ti tawenna idi impakugitna ti lasag ti makinsango a kudilna.+ 25  Ket ni Ismael nga anakna sangapulo ket tallo ti tawenna idi impakugitna ti lasag ti makinsango a kudilna.+ 26  Iti daytoy met laeng nga aldaw nakugit ni Abraham, ken kasta met ni Ismael nga anakna.+ 27  Ket amin dagiti lallaki iti sangakabbalayanna, asinoman a nayanak iti balay ken asinoman a nagatang iti kuarta manipud iti maysa a ganggannaet, nakugitda a kaduana.+

Footnotes