Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Ezequiel 43:1-27

43  Kalpasanna pinapannak iti ruangan, ti ruangan a sumango iti daya.+  Ket, adtoy! ti dayag+ ti Dios ti Israel um-umay manipud iti turong ti daya,+ ket ti timekna kas iti timek ti nakalawlawa a dandanum;+ ket ti met laeng daga nagsilnag gapu iti dayagna.+  Ket kasla dayta iti langa ti sirmata a nakitak,+ kas iti sirmata a nakitak idi immayak a mangdadael iti siudad;+ ket adda langlanga a kas iti langa a nakitak iti igid ti karayan Kebar,+ ket insubusobko ti rupak.  Ket ti met laeng dayag+ ni Jehova simrek iti Balay a dimmalan iti ruangan a ti sangona tumurong iti daya.+  Ket impangatonak ti maysa nga espiritu+ ket impannak iti makin-uneg a paraangan, ket, adtoy! ti Balay napno iti dayag ni Jehova.+  Ket nangrugi a mangngegko ti maysa nga agsasao kaniak manipud iti Balay,+ ket ti met laeng lalaki sitatakder iti abayko.+  Ket Isu kinunana kaniak: “Anak ti tao, daytoy ti disso ti tronok+ ken ti disso dagiti dapan ti saksakak,+ a pagtaengakto iti tengnga ti annak ti Israel agingga iti tiempo a di nakedngan;+ ket isuda, ti balay ti Israel, saandanton a tulawan ti nasantuan a naganko,+ isuda ken ti ar-arida,+ babaen iti pannakiabigda ken babaen kadagiti bangkay+ ti ar-arida iti ipapatayda,  babaen ti panangikabilda iti arsadananda a maidenna iti arsadananko ken ti bautekda iti abay ti bautekko, a ti diding adda iti nagbaetanmi.+ Ket tinulawanda ti nasantuan a naganko babaen iti nakarimrimon a bambanagda nga inaramidda,+ iti kasta tinalipuposko ida iti ungetko.+  Ita ipanawda koma nga iyadayo kaniak ti pannakiabigda+ ken dagiti bangkay ti ar-arida,+ ket sigurado nga agtaengakto iti tengngada agingga iti tiempo a di nakedngan.+ 10  “No maipapan kenka, O anak ti tao, pakaammuam ti balay ti Israel maipapan iti Balay,+ tapno mariknada ti pannakaipababa gapu kadagiti biddutda,+ ket masapul a rukodenda ti pagtuladan. 11  Ket no pudno a mariknada ti pannakaipababa gapu iti isuamin nga inaramidda, ti pamunganayan a plano ti Balay,+ ken ti urnosna ken dagiti pagruaranna ken dagiti seserrekanna, ken amin dagiti pamunganayan a planona ken amin dagiti pannakaibinsabinsana, ken amin dagiti pamunganayan a planona ken amin dagiti lintegna ipakaammom kadakuada ken isuratmo iti imatangda, tapno iti kasta masalimetmetanda ti isuamin a pamunganayan a planona ken amin a pannakaibinsabinsana ket pudno a maitungpalda ida.+ 12  Daytoy ti linteg iti Balay. Iti tuktok ti bantay, ti intero a teritoriana iti intero nga aglikmut ket kasasantuan a banag.+ Adtoy! Daytoy ti linteg iti Balay. 13  “Ket dagitoy dagiti rukod ti altar iti kasiko,+ a ti maysa a kasiko ket maysa a kasiko ken sangadakulapan.+ Ket ti lansadna maysa a kasiko. Ket maysa a kasiko ti kaakabana. Ket ti bilidna adda iti bibigna iti aglikmut, sangadangan. Ket daytoy ti puon ti altar. 14  Ket manipud iti lansad iti suelo agingga iti makimbaba a manglikmut a parudipad adda dua a kasiko, ket ti kaakabana maysa a kasiko. Ket manipud iti bassit a manglikmut a parudipad agingga iti dakkel a manglikmut a parudipad adda uppat a kasiko, ket ti kaakabana maysa a kasiko. 15  Ket ti pagpuoran ti altar uppat a kasiko, ket manipud iti pagpuoran ti altar ken agpangato adda uppat a sara.+ 16  Ket ti pagpuoran ti altar sangapulo ket dua a kasiko ti kaatiddogna, a sangapulo ket dua a kasiko ti kaakabana,+ kuadrado iti uppat a sikiganna.+ 17  Ket ti manglikmut a parudipad sangapulo ket uppat a kasiko ti kaatiddogna, a sangapulo ket uppat a kasiko ti kaakabana, iti uppat a sikiganna; ket ti bilid nga aglikmut iti dayta kagudua a kasiko, ket ti lansadna maysa a kasiko iti aglikmut. “Ket dagiti tukadna sumangoda iti daya.” 18  Ket kinunana kaniak: “Anak ti tao, daytoy ti kinuna ti Soberano nga Apo Jehova, ‘Dagitoy dagiti paglintegan iti altar iti aldaw ti pannakaaramidna, tapno mangidaton iti rabawna kadagiti sibubukel a daton a mapuoran+ ken tapno mangiwarsi iti rabawna iti dara.’+ 19  “‘Ket masapul nga itedmo iti Levitico a papadi,+ a kameng ti kaputotan ni Sadok,+ dagidiay umad-adani kaniak,’+ kuna ti Soberano nga Apo Jehova, ‘tapno agserbida kaniak, ti maysa nga urbon a toro, ti kalakian nga anak ti pangen, kas maysa a daton gapu iti basol.+ 20  Ket masapul nga alaem ti dadduma iti darana ket ikabilmo iti uppat a sarana ken iti uppat a suli ti manglikmut a parudipad ken iti bilid iti aglikmut ket gugoram manipud basol+ ket mangaramidka iti panangabbong maipaay iti dayta.+ 21  Ket masapul nga alaem ti urbon a toro, ti daton gapu iti basol, ket masapul a puoran dayta ti maysa a tao sadiay naituding a disso iti Balay, iti ruar ti santuario.+ 22  Ket iti maikadua nga aldaw mangyasidegkanto iti maysa a bulog dagiti kalding, daydiay nasalun-at, kas daton gapu iti basol; ket masapul a gugoranda ti altar manipud basol kas met laeng iti pananggugorda iti dayta manipud basol babaen iti urbon a toro.’ 23  “‘Iti panamagngudom iti pananggugor manipud basol mangyasidegkanto iti maysa nga urbon a toro, ti kalakian nga anak ti pangen, daydiay nasalun-at, ken iti maysa a kalakian a karnero manipud iti arban, daydiay nasalun-at. 24  Ket masapul nga iyasidegmo ida iti sanguanan ni Jehova, ket ti papadi masapul a mangipuruakda kadakuada iti asin ket idatonda ida+ kas mapuoran a sibubukel a daton ken Jehova. 25  Iti pito nga aldaw mangidatagkanto iti kalakian a kalding kas daton gapu iti basol maipaay iti aldaw;+ ket ti maysa nga urbon a toro, ti kalakian nga anak ti pangen, ken ti maysa a kalakian a karnero manipud iti arban, dagidiay naan-anay, idatagdanto. 26  Iti pito nga aldaw mangaramiddanto iti panangabbong+ maipaay iti altar, ket masapul a dalusanda ken ipasdekda. 27  Ket leppasendanto dagiti aldaw. Ket mapasamakto iti maikawalo nga aldaw+ ken manipuden iti dayta a ti papadi idatagdanto iti altar dagiti sibubukel a datonyo a mapuoran ken dagiti sakripisioyo a pakikaykaysa; ket sigurado a makasarakakto iti ragsak kadakayo,’+ kuna ti Soberano nga Apo Jehova.”

Footnotes