Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Ezequiel 40:1-49

40  Iti maikaduapulo ket lima a tawen ti pannakaidestieromi,+ iti pangrugian ti tawen, iti maikasangapulo nga aldaw ti bulan, iti maikasangapulo ket uppat a tawen kalpasan a narebbek ti siudad,+ iti daytoy met laeng nga aldaw adda kaniak ti ima ni Jehova,+ iti kasta impannak iti dayta a disso.+  Kadagiti sirmata manipud iti Dios impannak iti daga ti Israel ket nagin-inut nga indissonak iti rabaw ti nangato unay a bantay,+ nga iti dayta adda maysa a banag a kas iti pakabuklan ti maysa a siudad iti abagatan.+  Ket impannak sadiay, ket, adtoy! adda maysa a lalaki. Ti langana ket kas iti langa ti gambang,+ ket adda singdan a lino iti imana, ken maysa a pagrukod a runo,+ ket isu sitatakder iti ruangan.  Ket ti lalaki nangrugi nga agsao kaniak: “Anak ti tao,+ kitaem kadagita matam, ket kadagita lapayagmo denggem, ket isaadmo ta pusom kadagiti amin nga ipakitak kenka, agsipud ta iti panggep nga agipakitaak kenka, naiyegka ditoy. Ti isuamin a makitam ibagam iti balay ti Israel.”+  Ket, adtoy! adda pader iti ruar ti balay iti intero nga aglikmut. Ket iti ima ti lalaki adda ti pagrukod a runo nga innem a kasiko, a maysa a kasiko ken sangadakulapan. Ket rinugianna a rukoden ti kaakaba ti banag a naibangon, maysa a runo; ket ti kangato, maysa a runo.  Idin immay iti ruangan, a ti sangona agpadaya,+ ket immuli kadagiti tukadna. Ket rinugianna a rukoden ti arsadanan ti ruangan,+ maysa a runo ti kaakabana, ket ti sabali nga arsadanan, maysa a runo ti kaakabana.  Ket ti siled-ti-guardia maysa a runo ti kaatiddogna ken maysa a runo ti kaakabana, ket iti baet dagiti siled-ti-guardia+ adda lima a kasiko; ket ti arsadanan ti ruangan iti abay ti beranda ti ruangan nga agpauneg maysa a runo.  Ket rinukodna ti beranda ti ruangan nga agpauneg, maysa a runo.+  Gapuna rinukodna ti beranda ti ruangan, walo a kasiko; ket dagiti makin-igid nga adigina, dua a kasiko; ket ti beranda ti ruangan agpauneg. 10  Ket dagiti siled-ti-guardia ti ruangan nga agpadaya tallo iti daytoy a sikigan ken tallo iti dayta a sikigan. Isuda a tallo agpapada ti rukodda, ket dagiti makin-igid nga adigi agpapada ti rukodda, iti daytoy a sikigan ken iti dayta a sikigan. 11  Idin rinukodna ti kaakaba ti pagserkan ti ruangan, sangapulo a kasiko; ti kaatiddog ti ruangan, sangapulo ket tallo a kasiko. 12  Ket ti naaladan a paset iti sango dagiti siled-ti-guardia maysa a kasiko, ket adda naaladan a paset a maysa a kasiko iti agsinnumbangir a sikigan. Ket ti siled-ti-guardia innem a kasiko iti daytoy a sikigan ken innem a kasiko iti dayta a sikigan. 13  Ket rinukodna ti ruangan manipud iti atep ti maysa a siled-ti-guardia agingga iti atep ti sabali pay, kaakaba a duapulo ket lima a kasiko;+ ti pagserkan ket kabinnatog ti pagserkan. 14  Kalpasanna nagrukod kadagiti makin-igid nga adigi nga innem a pulo a kasiko, uray kadagiti makin-igid nga adigi ti paraangan kadagiti ruangan iti intero nga aglikmut. 15  Ket iti sango ti ruangan a seserrekan agingga iti sango ti beranda ti makin-uneg a ruangan limapulo a kasiko. 16  Ket adda tawtawa nga umak-akikid dagiti baskagda+ maipaay kadagiti siled-ti-guardia ken maipaay kadagiti makin-igid nga adigida nga agpauneg iti ruangan iti intero nga aglikmut, ket kasta idi ti maipaay kadagiti beranda. Ket dagiti tawa addada iti intero nga aglikmut nga agpauneg, ket kadagiti makin-igid nga adigi adda ladladawan ti kayo a palma.+ 17  Ket nagin-inut nga impannak iti makinruar a paraangan, ket, adtoy! adda silsiled a panganan,+ ken maysa a dappat a naaramid maipaay iti paraangan iti intero nga aglikmut. Adda tallopulo a siled a panganan iti rabaw ti dappat.+ 18  Ket ti dappat iti sikigan dagiti ruangan apag-isu a kas iti kaatiddog dagiti ruangan—ti makimbaba a dappat. 19  Ket rinukodna ti kaakaba manipud sango ti makimbaba a ruangan agingga iti sango ti makin-uneg a paraangan. Iti ruar sangagasut a kasiko dayta, iti daya ken iti amianan. 20  Ket ti makinruar a paraangan addaan iti ruangan a ti sangona agpaamianan. Rinukodna ti kaatiddogna ken ti kaakabana. 21  Ket dagiti pasetna a silsiled-ti-guardia tallo iti daytoy a sikigan ken tallo iti dayta a sikigan. Ket dagiti bukodna a makin-igid nga adigi ken ti bukodna a beranda maitunosda idi iti rukod ti umuna a ruangan. Limapulo a kasiko ti kaatiddogna, ket ti kaakabana duapulo ket lima a kasiko. 22  Ket dagiti tawana ken ti berandana ken dagiti ladawan ti kayo a palma+ iti dayta kapadpadada ti rukod dagidiay adda iti ruangan a ti sangoda agpadaya. Ket babaen iti pito a tukad makauli iti dayta dagiti tattao, ket ti berandana adda iti sanguananda. 23  Ket ti ruangan ti makin-uneg a paraangan kabinnatog ti ruangan iti amianan; kasta met ti maysa iti daya. Ket nangrukod manipud ruangan agingga iti ruangan iti sangagasut a kasiko. 24  Ket nagin-inut nga inturongnak iti abagatan, ket, adtoy! adda maysa a ruangan nga agpaabagatan,+ ket rinukodna dagiti makin-igid nga adigina ken ti berandana a kas met laeng kadagiti rukod dagitoy. 25  Ket dayta ken ti berandana addaanda kadagiti tawa iti intero nga aglikmut, kas kadagitoy a tawa. Limapulo a kasiko ti kaatiddogna, ket ti kaakabana duapulo ket lima a kasiko. 26  Ket adda pito a tukad a pagulian iti dayta,+ ket ti berandana adda iti sangoda. Ket addaan ladladawan ti kayo a palma, maysa iti daytoy a sikigan ken maysa iti dayta a sikigan kadagiti makin-igid nga adigina. 27  Ket ti makin-uneg a paraangan addaan iti ruangan nga agpaabagatan. Ket nangrukod manipud iti ruangan agingga iti ruangan nga agpaabagatan iti sangagasut a kasiko. 28  Ket nagin-inut nga impannak iti makin-uneg a paraangan babaen ti ruangan iti abagatan. Ket rinukodna ti ruangan iti abagatan a kas met laeng kadagiti rukod dagitoy. 29  Ket dagiti pasetna a silsiled-ti-guardia ken dagiti makin-igid nga adigina ken ti berandana kapadpada dagiti rukod dagitoy. Ket dayta ken ti berandana addaanda kadagiti tawa iti aglikmut. Limapulo a kasiko ti kaatiddogna, ket ti kaakabana duapulo ket lima a kasiko.+ 30  Ket adda berberanda iti intero nga aglikmut; ti kaatiddogda duapulo ket lima a kasiko, ket ti kaakabada lima a kasiko. 31  Ket ti berandana tumurongda iti makinruar a paraangan, ket dagiti ladawan ti kayo a palma addada kadagiti makin-igid nga adigina,+ ket ti pagulianna walo a tukad.+ 32  Ket nagin-inut nga impannak iti makin-uneg a paraangan a dumalan iti daya, ket rinukodna ti ruangan a kas met laeng iti rukod dagitoy. 33  Ket dagiti pasetna a silsiled-ti-guardia ken dagiti makin-igid nga adigina ken ti berandana kapadpadada ti rukod dagitoy, ket dayta ken ti berandana addaanda kadagiti tawa iti intero nga aglikmut. Ti kaatiddogna limapulo a kasiko, ket ti kaakabana duapulo ket lima a kasiko. 34  Ket ti berandana agturong iti makinruar a paraangan, ket ti ladladawan ti kayo a palma addada kadagiti makin-igid nga adigina iti daytoy a sikigan ken iti dayta a sikigan. Ket ti pagulianna walo a tukad. 35  Ket impannak iti ruangan iti amianan,+ ket rinukodna, iti isu met laeng a rukod a kas kadagitoy,+ 36  dagiti pasetna a silsiled-ti-guardia, dagiti makin-igid nga adigina ken ti berandana. Ket addaan kadagiti tawa iti intero nga aglikmut. Ti kaatiddogna limapulo a kasiko, ket ti kaakabana duapulo ket lima a kasiko. 37  Ket dagiti makin-igid nga adigina agturongda iti makinruar a paraangan, ket ti ladladawan ti kayo a palma addada kadagiti makin-igid nga adigina iti daytoy a sikigan ken iti dayta a sikigan.+ Ket ti pagulianna walo a tukad. 38  Ket ti maysa a siled a panganan agraman ti pagserkanna adda iti sibay dagiti makin-igid nga adigi dagiti ruangan. Sadiay idi nga ugasanda ti sibubukel a daton a mapuoran.+ 39  Ket iti beranda ti ruangan adda dua a lamisaan iti daytoy a sikigan ken dua a lamisaan iti dayta a sikigan, a kadagita ti pangpartian iti sibubukel a daton a mapuoran+ ken iti daton gapu iti basol+ ken iti daton gapu iti babak.+ 40  Ket iti makinruar a sikigan, no ti maysa umuli nga agturong iti pagserkan ti ruangan iti amianan, adda dua a lamisaan. Ket iti sabali a sikigan a paset ti beranda ti ruangan adda dua a lamisaan. 41  Adda uppat a lamisaan ditoy ken uppat a lamisaan sadiay iti sikigan ti ruangan—walo a lamisaan, a kadagita ti pagpartianda. 42  Ket ti uppat a lamisaan maipaay iti sibubukel a daton a mapuoran naaramidda iti tinikapan a bato. Ti kaatiddogna maysa ket kagudua a kasiko, ket ti kaakabana maysa ket kagudua a kasiko, ket ti kangatona maysa a kasiko. Idulinda met kadakuada ti ramramit a pangpartida iti sibubukel a daton a mapuoran ken iti sakripisio. 43  Ket dagiti parudipad a pangisaadan iti bambanag sangadakulapanda, a naikapetda a sititibker iti uneg, iti intero nga aglikmut; ket kadagiti lamisaan iparabawda ti lasag ti daton a sagut.+ 44  Ket iti ruar ti makin-uneg a ruangan adda dagiti siled a panganan dagiti kumakanta,+ iti makin-uneg a paraangan, nga adda iti sikigan ti ruangan iti amianan. Ket ti makinsango a sikiganda tumurong iti abagatan. Adda maysa iti sikigan ti ruangan iti daya. Ti sangona tumurong iti amianan. 45  Ket isu nagsao kaniak: “Daytoy maysa, ti siled a panganan a ti sangona tumurong iti abagatan, agpaay iti papadi a mangas-asikaso iti pagrebbengan iti balay.+ 46  Ket ti siled a panganan a ti sangona tumurong iti amianan agpaay iti papadi a mangas-asikaso iti pagrebbengan iti altar.+ Isuda ti annak ni Sadok,+ isuda a, manipud iti annak ni Levi, umad-adani ken Jehova tapno agserbida kenkuana.”+ 47  Ket rinukodna ti makin-uneg a paraangan. Ti kaatiddogna sangagasut a kasiko, ket ti kaakabana sangagasut a kasiko, kuadrado. Ket ti altar adda iti sanguanan ti balay. 48  Ket impannak iti beranda ti balay,+ ket rinukodna ti makin-igid nga adigi ti beranda, lima a kasiko iti daytoy a sikigan ken lima a kasiko iti dayta a sikigan. Ket ti kaakaba ti ruangan tallo a kasiko iti daytoy a sikigan ken tallo a kasiko iti dayta a sikigan. 49  Ti kaatiddog ti beranda duapulo a kasiko, ket ti kaakabana sangapulo ket maysa a kasiko. Ket babaen kadagiti tukad ti iyuulida iti dayta. Ket adda ad-adigi kadagiti makin-igid a teddek, maysa ditoy ken maysa sadiay.+

Footnotes