Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Ezequiel 36:1-38

36  “Ket no maipapan kenka, O anak ti tao, agipadtoka maipapan iti bambantay ti Israel, ket masapul a kunaem, ‘O bambantay ti Israel,+ denggenyo ti sao ni Jehova.  Daytoy ti kinuna ti Soberano nga Apo Jehova: “Iti rason a ti kabusor kinunana maibusor kadakayo,+ ‘Aha! Uray dagiti nangato a disso idi un-unana a tiempo+—kas sanikua nagbalin a kukuami!’”’+  “Gapuna agipadtoka, ket masapul a kunaem, ‘Daytoy ti kinuna ti Soberano nga Apo Jehova: “Iti rason, iti mismo a rason nga adda panamaglangalang+ ken panangsikbab kadakayo manipud iti amin a sikigan,+ tapno agbalinkayo a sanikua kadagidiay nabatbati iti nasnasion+ ket agtultuloy a mapagsasaritaankayo babaen ti dila+ ket adda dakes a damag iti tengnga ti ili,+  gapuna, O bambantay ti Israel,+ denggenyo ti sao ti Soberano nga Apo Jehova! Daytoy ti kinuna ti Soberano nga Apo Jehova kadagiti bantay ken kadagiti turod, kadagiti pagayusan ti waig ken kadagiti ginget ken kadagiti walangwalang a disso a napaglangalang+ ken kadagiti napanawan a siudad a nagbalin a samsamen ken uyawen dagidiay nabatbati iti nasnasion nga adda iti aglikmut;+  gapuna daytoy ti kinuna ti Soberano nga Apo Jehova, ‘Sigurado nga iti apuy ti regtak agsaoakto+ maibusor kadagidiay nabatbati iti nasnasion ken maibusor iti Edom, ti intero dayta,+ dagidiay a nangited iti dagak iti bagbagida kas sanikua buyogen ti panagrag-o ti isuamin a puso,+ buyogen ti pananglais iti kararua,+ maipagapu iti pagpaarabanna ken maipaay a samsam.’”’+  “Gapuna agipadtoka maipapan iti daga ti Israel, ket masapul a kunaem kadagiti bantay ken kadagiti turod, kadagiti pagayusan ti waig ken kadagiti ginget, ‘Daytoy ti kinuna ti Soberano nga Apo Jehova: “Adtoy! Siak iti regtak ken iti pungtotko masapul nga agsaoak, iti rason a ti pannakaipababa babaen kadagiti nasion isu ti inawityo.”’+  “Gapuna daytoy ti kinuna ti Soberano nga Apo Jehova, ‘Siak intag-ayko ti imak iti maysa a sapata+ a dagiti nasion nga adda kadakayo iti aglikmut—isuda awitendanto ti bukodda a pannakaipababa.+  Ket dakayo, O bambantay ti Israel, isaringityonto dagiti bukodyo a kangrunaan a sanga ket ipaayyo ti bukodyo a bunga maipaay iti ilik nga Israel,+ ta immasidegda agingga iti punto a sumrekda.+  Ta adtoy paborak kadakayo, ket sigurado a bumaw-ingakto kadakayo,+ ket pudno a matalonkayto ken mamulaan iti bin-i.+ 10  Ket paaduekto kadakayo dagiti tattao, ti intero a balay ti Israel, isuamin dayta,+ ket masapul a mapagnaedan dagiti siudad,+ ket dagiti met laeng walangwalang a disso mabangondanto manen.+ 11  Wen, paaduekto kadakayo dagiti tattao ken dagiti animal,+ ket sigurado nga umadudanto ken agbalinda a nabunga, ket pudno a pagbalinenkayto a mapagnaedan kas idi immuna a kasasaadyo+ ket agaramidakto iti naim-imbag ngem idi damo a kasasaadyo;+ ket kasapulanto a maammuanyo a siak ni Jehova.+ 12  Ket kadakayo papagnaekto dagiti tattao, ti mismo nga ilik nga Israel, ket tagikuaendakayto,+ ket agbalinkayto kadakuada a pagtatawidan a sanikua,+ ket saanyonto nga ulilaen+ manen ida iti uray aniaman nga annak.’” 13  “Daytoy ti kinuna ti Soberano nga Apo Jehova, ‘Iti rason nga adda dagidiay agkunkuna kadakayo: “Sika maysaka a manangalun-on kadagiti tattao, ket nagbalinka a daga a mangulila kadagiti nasionmo iti annak,”’+ 14  ‘gapuna saanmonton nga alun-onen dagiti tattao,+ ket dagiti nasionmo saanmonton nga ulilaen iti annak,’+ kuna ti Soberano nga Apo Jehova. 15  ‘Ket saanakton a mangipangngeg pay iti mangipababa a panagsao dagiti nasion maipapan kenka,+ ket saanmonton nga awiten ti panangumsi dagiti ili,+ ket saanmonton a pagtibkolen dagiti nasionmo,’ kuna ti Soberano nga Apo Jehova.” 16  Ket ti sao ni Jehova nagtultuloy a dumteng kaniak, a kunkunana: 17  “Anak ti tao, ti balay ti Israel agnanaedda idi iti dagada, ket rinugrugitanda dayta babaen iti dalanda ken babaen kadagiti pannakilangenda.+ Kas iti kinarugit ti panagkadawyan ti nagbalinan ti dalanda iti sanguanak.+ 18  Ket imbuyatko ti pungtotko kadakuada maigapu iti dara nga imbuyatda iti daga,+ ti daga a rinugitanda babaen kadagiti makadurmen nga idoloda.+ 19  Ket pinagwarawarak ida kadagiti nasion, iti kasta naiwarawarada iti dagdaga.+ Inukomko ida maitunos iti dalanda ken maitunos iti pannakilangenda.+ 20  Gapuna simrekda kadagiti nasion a simrekanda, ket dagiti tattao tinabbaawanda ti nasantuan a naganko+ iti panangikunada mainaig kadakuada, ‘Dagitoy isuda ti ili ni Jehova, ket rimmuarda manipud iti dagana.’+ 21  Ket kaasiakto ti nasantuan a naganko, a tinabbaawan ti balay ti Israel iti tengnga dagiti nasion a simrekanda.”+ 22  “Gapuna kunaem iti balay ti Israel, ‘Daytoy ti kinuna ti Soberano nga Apo Jehova: “Saan a maipagapu kadakayo nga aramidek dayta, O balay ti Israel, no di ket maigapu iti nasantuan a naganko, a tinabbaawanyo iti tengnga dagiti nasion a simrekanyo.”’+ 23  ‘Ket sigurado a santipikarekto ti naindaklan a naganko,+ a matabtabbaawan idi iti tengnga dagiti nasion, a tinabbaawanyo iti tengngada; ket kasapulanto a maammuan dagiti nasion a siak ni Jehova,’+ kuna ti Soberano nga Apo Jehova, ‘inton masantipikarak kadakayo iti imatangda.+ 24  Ket alaenkayto manipud kadagiti nasion ket ummongenkayo a sangsangkamaysa manipud iti amin a dagdaga ket iyegkayo iti dagayo.+ 25  Ket mangiwarsiakto kadakayo iti nadalus a danum, ket agbalinkayto a nadalus;+ dalusankayto kadagiti amin a kinarugityo+ ken kadagiti amin a makadurmen nga idoloyo.+ 26  Ket ikkankayto iti baro a puso,+ ket mangikabilak iti unegyo iti baro nga espiritu,+ ket ikkatekto ti puso a bato iti lasagyo ket ikkankayo iti puso a lasag.+ 27  Ket ikabilkonto ti espirituk iti unegyo,+ ket agtignayakto tapno iti kasta magnakayto kadagiti alagadek,+ ket salimetmetanyonto dagiti hudisial a pangngeddengko ket pudno nga itungpalyo.+ 28  Ket sigurado nga agnaedkayto iti daga nga intedko kadagidi ammayo,+ ket agbalinkayto nga ilik ket siak agbalinakto a Diosyo.’+ 29  “‘Ket isalakankayto kadagiti amin a kinarugityo+ ket awagak ti bukel ken paaduek, ket saanakto a mangipagteng kadakayo iti nakaro a bisin.+ 30  Ket sigurado a paaduekto ti bunga ti kayo, ken ti apit ti talon, tapno iti kasta saanyonton nga awaten ti umsi ti nakaro a bisin iti tengnga dagiti nasion.+ 31  Ket sigurado a malagipyonto dagiti dakes a dalanyo ken dagiti pannakilangenyo a saan a naimbag,+ ket sigurado a makariknakayto iti pannakarumen iti bukodyo a kinatao maigapu kadagiti biddutyo ken maigapu iti nakarimrimon a bambanagyo.+ 32  Saan a maipagapu kadakayo nga aramidek daytoy,’+ kuna ti Soberano nga Apo Jehova, ‘maammuanyo koma. Agbainkayo ken makariknakayo iti pannakaipababa gapu iti daldalanyo, O balay ti Israel.’+ 33  “Daytoy ti kinuna ti Soberano nga Apo Jehova, ‘Iti aldaw ti panangdalusko kadakayo manipud kadagiti amin a biddutyo pagbalinekto met a mapagnaedan dagiti siudad,+ ket masapul a mabangon manen dagiti walangwalang a disso.+ 34  Ket ti met laeng langalang a daga matalonto, yantangay nagbalin a langalang a rebbek iti imatang ti tunggal lumablabas.+ 35  Ket sigurado a kunaento dagiti tattao: “Daydiay a daga a napaglangalang nagbalin a kas iti minuyongan ti Eden,+ ket dagiti siudad a rebbek ken napaglangalang ken narba nasarikedkedan; nagbalinda a mapagnaedan.”+ 36  Ket dagiti nasion a mabatinto iti aglikmutyo kasapulanto a maammuanda a siak, ni Jehova, binangonko ti bambanag a narba,+ minulaak ti napaglangalang. Siak, ni Jehova, sinaok ket inaramidko dayta.’+ 37  “Daytoy ti kinuna ti Soberano nga Apo Jehova, ‘Daytoy ti bay-akto pay a biroken kaniak ti balay ti Israel nga aramiden maipaay kadakuada:+ Paaduekto ida kadagiti tattao kas iti maysa nga arban.+ 38  Kas iti maysa nga arban dagiti nasantuan a tattao, kas iti arban ti Jerusalem kadagiti panawen ti piestana,+ iti kasta dagiti siudad a rebbek mapnodanto iti arban dagiti tattao;+ ket kasapulanto a maammuan dagiti tattao a siak ni Jehova.’”

Footnotes