Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Ezequiel 34:1-31

34  Ket ti sao ni Jehova nagtultuloy a dumteng kaniak, a kunkunana:  “Anak ti tao, agipadtoka maibusor kadagiti pastor ti Israel. Agipadtoka, ket masapul a kunaem kadakuada, kadagiti pastor, ‘Daytoy ti kinuna ti Soberano nga Apo Jehova: “Asi pay dagiti pastor ti Israel,+ a nagbalin a manangpakan iti bagbagida!+ Saan aya a ti arban ti rebbeng a pakanen dagiti pastor?+  Ti taba ti kankanenyo,+ ket kawkawesanyo ti bagbagiyo iti delana. Ti nalukmeg+ nga animal ti parpartienyo.+ Ti met laeng arban saanyo a pakanen.  Dagidiay addaan sakit saanyo a pinapigsa,+ ket daydiay masaksakit saanyo a pinaimbag, ket daydiay nadunor saanyo a pinatapatan, ket daydiay naiwara saanyo nga insubli, ket daydiay napukaw saanyo nga inkagumaan a saraken,+ no di ket pinagpasakupyo ida buyogen ti kinagubsang, buyogen pay ti panangikuspil.+  Ket nagin-inut a naiwarawarada gapu iti kaawan ti pastor,+ iti kasta nagbalinda a taraon maipaay iti tunggal atap nga animal ti tay-ak, ket nagtultuloyda a naiwarawara.+  Dagiti karnerok nagtultuloyda a naiwawa iti amin a bambantay ken iti tunggal nangato a turod;+ ket iti intero a rabaw ti daga naiwarawara dagiti karnerok,+ nga awan ti mangar-aramid iti panangbirok ken awan ti mangikagkagumaan a mangsarak.  “‘“Gapuna, dakayo a papastor, denggenyo ti sao ni Jehova,  ‘“Kas sibibiagak,” kuna ti Soberano nga Apo Jehova, “sigurado nga iti rason a dagiti karnerok nagbalinda a maysa a banag a samsamen ket dagiti karnerok nagtultuloyda a taraon maipaay iti tunggal atap nga animal ti tay-ak, agsipud ta awan pastor, ket ti papastorko saanda a binirok dagiti karnerok, no di ket ti papastor pinakpakanda ti bagbagida,+ ket saanda a pinakan dagiti bukodko a karnero,”’  gapuna, dakayo a papastor, denggenyo ti sao ni Jehova. 10  Daytoy ti kinuna ti Soberano nga Apo Jehova, ‘Adtoy bumusorak kadagiti pastor,+ ket sigurado a dawatekto a maisubli dagiti karnerok manipud iti imada ket pagsardengek ida a mangpakan kadagiti karnerok,+ ket dagiti pastor saandanton a pakanen ti bagbagida;+ ket ispalekto dagiti karnerok manipud iti ngiwatda, ket saandanto nga agbalin a taraon maipaay kadakuada.’”+ 11  “‘Ta daytoy ti kinuna ti Soberano nga Apo Jehova: “Adtoyak, siak, ket birokekto dagiti karnerok ken aywanak ida.+ 12  Mayannurot iti panangaywan daydiay mangpakpakan iti pangenna+ iti aldaw a kaaddana iti tengnga dagiti karnerona a naiwaras a sisasaknap,+ kasta ti panangaywanko kadagiti karnerok; ket ispalekto ida manipud kadagiti amin a lugar a nakaiwarawaraanda iti aldaw dagiti ulep ken napuskol a daguyemyem.+ 13  Ket iruarkonto ida+ manipud kadagiti ili ket ummongek ida a sangsangkamaysa manipud iti dagdaga ket iyegko ida iti dagada+ ket pakanek ida iti bambantay ti Israel, iti denna dagiti pagayusan ti waig ken iti denna dagiti amin a mapagnaedan a disso ti daga.+ 14  Iti nasayaat a pagaraban pakanekto ida, ket iti nangato a bambantay ti Israel isunto ti disso a pagyananda.+ Sadiay agiddadanto iti nasayaat a disso a pagyanan,+ ket iti nataba a pagaraban mangandanto iti rabaw ti bambantay ti Israel.” 15  “‘“Siak pakanekto dagiti karnerok,+ ket siak pagiddaekto ida,”+ kuna ti Soberano nga Apo Jehova. 16  “Daydiay napukaw birokekto,+ ket daydiay naiwara isublikto, ket daydiay nadunor patapatakto ket daydiay masaksakit papigsaekto, ngem daydiay nalukmeg+ ken daydiay napigsa talipuposekto. Pakanekto dayta iti pannakaukom.”+ 17  “‘Ket no maipapan kadakayo a karnerok, daytoy ti kinuna ti Soberano nga Apo Jehova: “Adtoy mangukomak iti nagbaetan ti karnero ken karnero, iti nagbaetan dagiti kalakian a karnero ken dagiti kalakian a kalding.+ 18  Bassit kadi laeng a banag kadakayo nga agtaraonkayo iti mismo a kasayaatan a pagpaaraban+ ngem ti natedda kadagiti pagpaarabanyo ipayatpayatyo kadagiti sakayo, ket uminumkayo iti nalitnaw a dandanum ngem dagidiay natedda rugitanyo babaen iti panangpaddapaddak kadagiti mismo a sakayo? 19  Ket no maipapan kadagiti karnerok, agarabda aya iti pagpaaraban nga impayatpayat dagiti sakayo ket inumenda aya ti danum a narugitan babaen iti panagpaddapaddak dagiti sakayo?” 20  “‘Gapuna daytoy ti kinuna kadakuada ti Soberano nga Apo Jehova: “Adtoyak, siak, ket sigurado a mangukomakto iti nagbaetan ti nalukmeg a karnero ken nalagpit a karnero, 21  iti rason a babaen iti bakrang ken babaen iti abaga nagidurduronkayo ket babaen kadagiti sarayo indupdupiryo amin dagidiay addaan sakit agingga a naiwarawarayo ida iti ruar.+ 22  Ket isalakankonto dagiti karnerok, ket saandanton nga agbalin a maysa a banag a samsamen;+ ket mangukomakto iti nagbaetan ti karnero ken karnero. 23  Ket mangibangonakto kadakuada iti maysa a pastor,+ ket masapul a pakanenna ida, ni adipenko a David a mismo.+ Isu pakanennanto ida, ket isu agbalinto a pastorda.+ 24  Ket siak, ni Jehova, agbalinakto a Diosda,+ ket ni adipenko a David panguluen iti tengngada.+ Siak, ni Jehova, sinaok. 25  “‘“Ket mamatalgedakto kadakuada iti tulag iti kappia,+ ket sigurado a pagpukawekto ti makadangran nga atap nga animal manipud iti daga,+ ket pudno nga agnaeddanto a sitatalged iti let-ang ket maturogda kadagiti bakir.+ 26  Ket pagbalinekto ida ken dagiti aglawlaw ti turodko a maysa a bendision,+ ket ti agbuyat a tudo pababaekto iti tiempona. Addanto dagiti agbuyat a tudo ti bendision.+ 27  Ket ti kayo ti tay-ak itednanto ti bungana,+ ket ti met laeng daga itednanto ti apitna,+ ket pudno nga addadanto a sitatalged iti dagada.+ Ket kasapulanto a maammuanda a siak ni Jehova inton tukkolek dagiti barra ti sangolda+ ken naispalkon ida iti ima dagidiay mangus-usar idi kadakuada kas ad-adipen.+ 28  Ket saandanton nga agbalin a maysa a banag a samsamen maipaay kadagiti nasion;+ ket no maipapan iti atap nga animal ti daga, saannanto nga alun-onen ida, ket pudno nga agnaeddanto a sitatalged, nga awan asinoman a mamagpigerger kadakuada.+ 29  “‘“Ket ibangonakto ida iti pagmulaan maipaay iti nagan,+ ket saandanton nga agbalin a dagidiay naipanaw babaen iti nakaro a bisin iti daga,+ ket saandanton nga awiten ti panangipababa dagiti nasion.+ 30  ‘Ket kasapulanto a maammuanda a siak, ni Jehova a Diosda, addaak kadakuada+ ket isuda ti ilik, ti balay ti Israel,’ kuna ti Soberano nga Apo Jehova.”’+ 31  “‘Ket no maipapan kadakayo a karnerok,+ dagiti karnero iti panagipaarabko, naindagaankayo a tattao. Siak ti Diosyo,’ kuna ti Soberano nga Apo Jehova.”

Footnotes