Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Ezequiel 31:1-18

31  Ket napasamak pay nga iti maikasangapulo ket maysa a tawen, iti maikatlo a bulan, iti umuna nga aldaw ti bulan, dimteng kaniak ti sao ni Jehova, a kunkunana:  “Anak ti tao, sawem ken Faraon nga ari ti Egipto ken iti bunggoyna,+ “‘Siasino ti kaar-arngim iti kinanaindaklanmo?  Adtoy! Maysa nga Asirio, maysa a sedro iti Libano,+ nalibnos ti kangrunaan a sangana,+ nga addaan iti kasamekan nga aduan kayo a mangipaay iti linong, ken nawasnay ti kinatayagna,+ iti kasta ti aringgawisna adda idi kadagiti ulep.+  Dandanum ti nangpadakkel iti dayta;+ ti nadanum a yuyeng ti nangpatayag iti dayta. Babaen kadagiti waigna mapan iti intero nga aglawlaw ti pagmulaan a dissona; ket inturongna dagiti kalasuganna iti amin a kaykayo ti tay-ak.  Dayta ti makagapu a dimmakkel a nawaswasnay ti kinatayagna ngem iti amin a sabsabali a kaykayo ti tay-ak.+ “‘Ket nagtultuloy nga immadu dagiti kangrunaan a sangana, ket nagtultuloy nga immatiddog dagiti sangana gapu iti adu a danum kadagiti pagay-ayusan ti danumna.+  Kadagiti kangrunaan a sangana dagiti amin nga agtaytayab a parsua iti langlangit inaramidda dagiti umokda,+ ket iti sirok dagiti sangana nagpasngay dagiti amin nga atap nga animal ti tay-ak,+ ket iti linongna agnaed dagiti amin nga aduan umilina a nasion.  Ket nagbalin a nalibnos iti kinanaindaklanna,+ iti kaatiddog ti bulbulongna, ta ti sistema ti ramutna adda iti rabaw ti adu a danum.  Dagiti sabsabali a sedro saanda a pumadpad iti dayta iti minuyongan ti Dios.+ No maipapan kadagiti kayo a parwa, awan ti pannakiarngida no maipapan kadagiti kangrunaan a sangana. Ket dagiti met laeng kayo a platano saanda idi a kas iti dayta no kadagiti sanga. Awan sabali a kayo iti minuyongan ti Dios ti umarngi iti dayta no iti kinalibnosna.+  Nalibnos ti wagas a panangaramidko iti dayta iti kinaruay ti bulbulongna,+ ket inap-apalan+ dayta dagiti amin a dadduma a kayo ti Eden nga adda iti minuyongan ti pudno a Dios.’ 10  “Gapuna daytoy ti kinuna ti Soberano nga Apo Jehova, ‘Iti rason a nagbalinka a nawasnay ti kinatayagna, iti kasta insaadna ti aringgawisna kadagiti mismo nga ulep+ ket ti pusona timman-ok gapu iti katayagna,+ 11  iyawatkonto met dayta iti ima ti naulpit nga agturay kadagiti nasion.+ Di bumurong nga isu agtignayto a maibusor iti dayta. Paruarekto dayta maitunos iti kinadangkesna.+ 12  Ket dagiti ganggannaet, dagiti manangikuspil kadagiti nasion, pukanendanto dayta, ket dagiti tattao baybay-andanto dayta iti rabaw ti bambantay; ket kadagiti amin a ginget sigurado nga agtinnagto ti bulbulongna, ket dagiti sangana matukkolto iti tengnga dagiti amin a pagayusan ti waig ti daga.+ Ket manipud iti linongna bumabanto dagiti amin nga ili ti daga ket baybay-anda.+ 13  Iti natuang a puonna agtaengto amin dagiti agtaytayab a parsua iti langlangit, ket kadagiti sangana sigurado nga addanto amin dagiti atap nga animal ti tay-ak;+ 14  iti panggep nga awan kadagiti kayo a nasibugan ti agbalin a nawasnay ti kinatayagda, wenno mangisaad kadagiti aringgawisda kadagiti mismo nga ulep, ken tapno awan ti aniaman nga umin-inum iti danum a makapagtakder maibusor kadakuada iti kinatayagda, ta sigurado a mayawatdanto amin ken patay,+ iti daga iti baba,+ iti tengnga ti annak ti sangatauan, kadagidiay bumaba iti abut.’ 15  “Daytoy ti kinuna ti Soberano nga Apo Jehova, ‘Iti aldaw nga ibababana iti Sheol sigurado a mamataudakto iti panagleddaang.+ Maigapu iti dayta abbongakto ti nadanum a yuyeng, tapno mamedmedak dagiti waigna ken tapno mapawilan ti adu a danum; ket maigapu iti dayta pagsipngetekto ti Libano, ket maigapu iti dayta matalimudawto amin dagiti kayo ti tay-ak. 16  Iti uni ti pannakatnagna sigurado a yugayogekto dagiti nasion inton ipababak dayta iti Sheol a maikuyog kadagidiay agpababa iti abut,+ ket iti daga iti baba maliwliwanto+ dagiti amin a kayo ti Eden,+ dagiti napili ken dagiti kasayaatan ti Libano, amin dagidiay umin-inum iti danum. 17  Maikuyog kenkuana isuda met bimmabada iti Sheol,+ kadagidiay napapatay iti kampilan, ken dagidiay a kas bin-ina nagnaedda iti salinongna iti tengnga dagiti nasion.’+ 18  “‘Siasino ti kaar-arngim a kasta iti dayag+ ken kinanaindaklan iti tengnga dagiti kayo ti Eden?+ Ngem sigurado a maipababakanto a maikuyog kadagiti kayo ti Eden agingga iti daga iti baba.+ Iti tengnga dagidiay di nakugit makikaiddakanto kadagidiay napapatay iti kampilan. Daytoy isu ni Faraon ken ti intero a bunggoyna,’ kuna ti Soberano nga Apo Jehova.”

Footnotes