Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Ezequiel 3:1-27

3  Ket kinunana kaniak: “Anak ti tao, no ania ti masarakam, kanem. Kanem daytoy a lukot,+ ket mapanka, agsaoka iti balay ti Israel.”  Gapuna nginangak ti ngiwatko, ket in-inut nga impakanna kaniak daytoy a lukot.+  Ket kinunana kaniak: “Anak ti tao, pakanem koma ti tianmo, iti kasta mapunnom dagiti mismo a bagismo iti daytoy a lukot nga itedko kenka.” Ket rinugiak a kanen, ket iti ngiwatko nagbalin a kas iti diro ti kasam-itna.+  Ket intuloyna a kinuna kaniak: “Anak ti tao, mapanka, sumrekka iti tengnga ti balay+ ti Israel, ket masapul nga agsaoka kadakuada babaen ti sasaok.  Ta saan nga iti ili a di makatarus iti pagsasao+ wenno nadagsen ti dilana+ ti pakaibabaonam—iti balay ti Israel,  saan nga iti nakaad-adu nga ili a di makatarus iti pagsasao wenno nadagsen ti dilada, a ti sasaoda saanmo a mangngeg buyogen ti pannakaawat.+ No koma kadakuada ti nangibaonak kenka, dagidiay a mismo umimdengda kenka.+  Ngem no maipapan iti balay ti Israel, saandanto a kayat ti umimdeng kenka, ta saanda a tarigagayan ti umimdeng kaniak;+ agsipud ta amin dagiti kameng ti balay ti Israel natangken ti panagul-uloda ken natangken ti panagpuspusoda.+  Adtoy! Pinagbalinko ta rupam nga apag-isu a katangtangken dagiti rupada+ ken ta mugingmo nga apag-isu a katangtangken dagiti mugingda.+  Pinagbalinko ti mugingmo a kas iti diamante, a natangtangken ngem iti pamulinawen.+ Dika agbuteng kadakuada,+ ket dika agaligaget kadagiti rupada,+ ta rebeliosoda a balay.”+ 10  Ket intultuloyna a kunaen kaniak: “Anak ti tao, amin a sasaok a sawek kenka, awatem ita pusom+ ket denggem kadagiti bukodmo a lapayag. 11  Ket mapanka, sumrekka iti tengnga dagiti naidestiero nga umili,+ iti tengnga ti annak dagiti kailiam, ket masapul nga agsaoka kadakuada ket kunaem kadakuada, ‘Daytoy ti kinuna ti Soberano nga Apo Jehova,’ uray no dumngegda wenno agkedkedda.”+ 12  Ket inawitnak ti maysa nga espiritu+ ket nangrugi a mangngegko iti likudak ti ungor ti dakkel a panagdaruros:+ “Bendito koma ti dayag ni Jehova manipud dissona.”+ 13  Ket adda idi ti uni ti paypayak dagiti sibibiag a parsua a sidedekket ti pannakaisagidda iti maysa ken maysa,+ ken ti uni dagiti pilid nga adda iti dennada,+ ken ti uni ti dakkel a panagdaruros. 14  Ket inawitnak ti espiritu+ ket innalanak, iti kasta napanak a sipapait buyogen ti panagpungtot ti espirituk, ket ti ima ni Jehova nga adda kaniak napigsa.+ 15  Gapuna simrekak iti tengnga dagiti naidestiero nga umili idiay Tel-abib, isuda nga agnanaed+ iti igid ti karayan Kebar,+ ket nangrugiak nga agnaed iti pagnanaedanda; ket nagnanaedak sadiay iti pito nga aldaw, a naikulengak iti tengngada.+ 16  Ket naaramid iti ngudo ti pito nga aldaw a ti sao ni Jehova dimteng kaniak, a kunkunana: 17  “Anak ti tao, inaramidka a managwanawan iti balay ti Israel,+ ket masapul a dumngegka iti sasao manipud ngiwatko ket masapul a pakdaaram ida manipud kaniak.+ 18  No kunaek iti maysa a nadangkes, ‘Di bumurong a mataykanto,’+ ket pudno a saanmo a pakdaaran ken pagsawan tapno pakdaaram daydiay nadangkes manipud nadangkes a dalanna tapno isu taginayonem a sibibiag,+ yantangay nadangkes, matayto gapu iti biddutna,+ ngem ti darana singirekto iti bukodmo nga ima.+ 19  Ngem no maipapan kenka, no kas pagarigan pinakdaaram ti maysa a nadangkes+ ket pudno a saan a tumallikud iti kinadangkesna ken iti nadangkes a dalanna, isu matayto gapu iti biddutna;+ ngem no maipapan kenka, naispalmonto ti bukodmo a kararua.+ 20  Ket no ti maysa a nalinteg tumallikud iti kinalintegna+ ket pudno nga agaramid iti di kinahustisia ket mangikabilakto iti pakaitibkolan iti sanguananna,+ isu matayto agsipud ta saanmo a pinakdaaran. Gapu iti basolna isu matayto,+ ket dagiti nalinteg nga aramidna nga inaramidna saanto a malagip,+ ngem ti darana singirekto iti bukodmo nga ima.+ 21  Ket no maipapan kenka, no kas pagarigan pinakdaaram ti maysa a nalinteg tapno daydiay nalinteg saan koma nga agbasol,+ ket isu pudno a saan nga agbasol, di bumurong nga agtultuloyto nga agbiag agsipud ta napakdaaran,+ ket sika naispalmonto ti bukodmo a kararua.”+ 22  Ket ti ima ni Jehova naadda kaniak sadiay ket kinunana kaniak: “Bumangonka, mapanka idiay ginget a tanap,+ ket sadiay makisaoakto kenka.” 23  Gapuna timmakderak ket napanak idiay ginget a tanap, ket, adtoy! ti dayag ni Jehova sitatakder sadiay,+ kas iti dayag a nakitak iti igid ti karayan Kebar,+ ket insubusobko ti rupak.+ 24  Idin simrek kaniak ti espiritu+ ket pinatakdernak kadagiti sakak,+ ket isu nangrugi a makisao kaniak ken agkuna kaniak: “Umayka, mairikepanka iti uneg ti balaymo. 25  Ket sika, O anak ti tao, adtoy! sigurado a mangikabildanto kenka kadagiti singdan ket parautandaka kadagita iti kasta saanka a makapan iti tengngada.+ 26  Ket ti mismo a dilam idekketkonto iti ngangawmo,+ ket sigurado nga agumelkanto,+ ket saankanto nga agbalin kadakuada a maysa a lalaki a mangipapaay iti pannubngar,+ agsipud ta rebeliosoda+ a balay. 27  Ket inton makisaoak kenka luktakto ta ngiwatmo, ket masapul a kunaem kadakuada,+ ‘Daytoy ti kinuna ti Soberano nga Apo Jehova.’ Daydiay dumdumngeg dumngeg koma,+ ket daydiay agkedkedked agkedked koma, agsipud ta rebeliosoda a balay.+

Footnotes