Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Ezequiel 28:1-26

28  Ket ti sao ni Jehova nagtultuloy a dumteng kaniak, a kunkunana:  “Anak ti tao, sawem iti panguluen ti Tiro, ‘Daytoy ti kinuna ti Soberano nga Apo Jehova: “‘“Iti rason a timmangsit ta pusom,+ ket kunkunaem, ‘Maysaak a dios.+ Iti tugaw ti dios nagtugawak,+ iti puso ti nawayang a baybay,’+ idinto ta maysaka a naindagaan a tao,+ ket saan a maysa a dios,+ ket pagbalbalinem ta pusom a kas iti puso ti dios—  adtoy! nasirsiribka ngem ni Daniel.+ Awan dagiti palimed a maitupag idi kenka.+  Babaen ti siribmo ken babaen ti panangilasinmo nakagun-odka iti kinabaknang maipaay iti bagim, ket agtultuloy a gumun-odka iti balitok ken pirak kadagiti kamaligmo.+  Babaen iti kinaruay ti siribmo,+ babaen kadagiti tagilakom,+ pinaadum ti kinabaknangmo,+ ket nangrugi nga agtangsit ta pusom gapu iti kinabaknangmo.”’+  “‘Gapuna daytoy ti kinuna ti Soberano nga Apo Jehova: “Iti rason a pagbalinem ta pusom a kas iti puso ti dios,+  ngarud adtoy iyeganka kadagiti ganggannaet,+ dagiti manangikuspil iti nasnasion,+ ket sigurado nga asutendanto dagiti kampilanda maibusor iti pintas ti kinasiribmo ket tabbaawanda ti agsilnasilnag a kinangayedmo.+  Ipababadakanto iti abut,+ ket masapul a matayka iti ipapatay ti maysa a napapatay iti puso ti nawayang a baybay.+  Di bumurong a kunaemto kadi, ‘Maysaak a dios,’ iti sanguanan daydiay mangpapatay kenka,+ idinto ta maysaka laeng a naindagaan a tao, ket saan a maysa a dios,+ iti ima dagidiay mangtabtabbaaw kenka?”’ 10  “‘Kadagiti ipapatay dagidiay di nakugit mataykanto babaen iti ima dagiti ganggannaet,+ ta siak sinaok,’ kuna ti Soberano nga Apo Jehova.” 11  Ket ti sao ni Jehova nagtultuloy a dumteng kaniak, a kunkunana: 12  “Anak ti tao, mangipigsaka iti dung-aw maipapan iti ari ti Tiro,+ ket masapul a kunaem kenkuana, ‘Daytoy ti kinuna ti Soberano nga Apo Jehova: “‘“Mangselselioka iti pagtuladan, a napnuan sirib+ ken naan-anay iti pintas.+ 13  Idiay Eden, ti minuyongan ti Dios, addaka idi.+ Tunggal napateg a bato isu ti abbongmo, rubi, topasio ken jaspe; krisolito, onix+ ken jade; safiro, turkesa+ ken esmeralda; ket balitok ti nakaaramidan dagiti pagitampokam ken dagiti susulbongam nga adda kenka. Idi aldaw a pannakaparsuam naisaganada. 14  Sika ti napulotan a kerubin a mangabbong, ket insaadka. Addaka idi iti nasantuan a bantay ti Dios.+ Iti tengnga dagiti gumilgil-ayab a bato nagpagnapagnaka. 15  Awan pagkurangam iti daldalanmo manipud idi aldaw a pannakaparsuam+ agingga a ti kinakillo nasarakan kenka.+ 16  “‘“Gapu iti kinaruay dagiti tagilakom+ pinunnoda ti tengngam iti kinaranggas, ket nangrugika nga agbasol.+ Ket papanawenkanto a kas tabbaaw manipud iti bantay ti Dios, ket dadaelenkanto,+ O kerubin a mangabbong, manipud iti tengnga ti gumilgil-ayab a batbato. 17  “‘“Ti pusom timmangsit gapu iti pintasmo.+ Dinadaelmo ti siribmo gapu iti agsilnasilnag a kinangayedmo.+ Ipuruakkanto iti daga.+ Isaadkanto iti sanguanan ti ar-ari, tapno kitaendaka.+ 18  “‘“Maigapu iti kinaruay dagiti biddutmo,+ gapu iti di kinahustisia kadagiti tagilakom,+ tinabbaawam dagiti santuariom. Ket mangiruarakto iti apuy manipud iti tengngam. Dayta ti masapul a mangalun-on kenka.+ Ket pagbalinenkanto a dapdapo iti rabaw ti daga iti imatang dagidiay amin a makakita kenka.+ 19  No maipapan kadagiti amin a makaam-ammo kenka kadagiti ili, sigurado a sisisiddaaw a mulagatandakanto.+ Dagiti kellaat a pagaligagetan isu ti pagbalinamto, ket awankanton agingga iti tiempo a di nakedngan.”’”+ 20  Ket ti sao ni Jehova nagtultuloy a dumteng kaniak, a kunkunana: 21  “Anak ti tao, isangom ta rupam iti Sidon,+ ket agipadtoka maibusor kenkuana. 22  Ket masapul a kunaem, ‘Daytoy ti kinuna ti Soberano nga Apo Jehova: “Adtoy bumusorak kenka,+ O Sidon, ket sigurado a maipadayagakto iti tengngam;+ ket kasapulanto a maammuan dagiti tattao a siak ni Jehova inton mangipakatak kenkuana kadagiti aramid ti panangukom+ ket pudno a masantipikarak kenkuana.+ 23  Ket mangibaonakto iti angol kenkuana ken dara kadagiti kalsadana.+ Ket daydiay napapatay masapul a mapasag iti tengngana babaen ti kampilan a maibusor kenkuana iti tunggal sikigan;+ ket kasapulanto a maammuan dagiti tattao a siak ni Jehova.+ 24  Ket iti balay ti Israel awanton ti makapapatay a puris+ wenno naut-ot a siit manipud kadagidiay amin nga adda iti aglikmutda, dagidiay mangtartrato kadakuada buyogen ti pananglais; ket kasapulanto a maammuan dagiti tattao a siak ti Soberano nga Apo Jehova.”’ 25  “‘Daytoy ti kinuna ti Soberano nga Apo Jehova: “Inton ummongek a sangsangkamaysa ti balay ti Israel manipud kadagiti ili nga iti tengngada naiwarawarada,+ masantipikarakto met iti tengngada iti imatang dagiti nasion.+ Ket sigurado nga agnaeddanto iti dagada+ nga intedko iti adipenko, ken Jacob.+ 26  Ket pudno nga agnaeddanto a sitatalged+ iti dayta ket agibangonda kadagiti balay+ ken agmulada kadagiti kaubasan,+ ket masapul nga agnaedda a sitatalged+ inton mangipakatak iti ar-aramid ti panangukom kadagidiay amin a mangtartrato kadakuada buyogen ti pananglais iti intero nga aglikmutda;+ ket kasapulanto a maammuanda a siak ni Jehova a Diosda.”’”

Footnotes