Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Exodo 9:1-35

9  Iti kasta ni Jehova kinunana ken Moises: “Mapanka ken Faraon ket masapul nga isaom kenkuana,+ ‘Daytoy ti kinuna ni Jehova a Dios dagiti Hebreo: “Palubosam ti ilik tapno makapagserbida kaniak.  Ngem no itultuloymo ti agkitakit a mamalubos kadakuada ket itultuloymo pay laeng nga igawid ida,+  adtoy! ti ima ni Jehova+ umay kadagiti dinguenmo+ nga adda iti tay-ak. Kadagiti kabalio, kadagiti asno, kadagiti kamelio, iti pangen ken iti arban addanto nakaro unay nga angol.+  Ket sigurado a mangaramidto ni Jehova ti pagdumaan dagiti dinguen ti Israel ken dagiti dinguen ti Egipto, ket awanto ti matay iti isuamin a kukua ti annak ti Israel.”’”+  Mainayon pay, nangikeddeng ni Jehova iti naituding a tiempo, a kunkunana: “Inton bigat aramidento ni Jehova daytoy a banag iti daga.”+  Ngarud inaramid ni Jehova daytoy a banag iti sumaganad nga aldaw, ket nangrugi a matay ti amin a kita ti dinguen ti Egipto;+ ngem awan maysa a natay kadagiti dinguen ti annak ti Israel.  Idin nagbaon ni Faraon, ket, adtoy! awan natay uray koma maysa kadagiti dinguen ti Israel. Nupay kasta, ti puso ni Faraon nagtalinaed nga awanan panagtignay,+ ket saanna a pinalubosan dagiti umili.  Kalpasan dayta kinuna ni Jehova kada Moises ken Aaron: “Mangalakayo maipaay kadakayo iti dua a rakem nga iro manipud iti pugon,+ ket masapul nga ipuruak ni Moises nga agpalangit iti imatang ni Faraon.  Ket agbalinto a pulbos iti rabaw ti intero a daga ti Egipto, ket agbalinto a busbusali a tumanor nga addaan kadagiti kapuyo+ iti tao ken animal iti intero a daga ti Egipto.” 10  Gapuna innalada ti iro ti maysa a pugon ket nagtakderda iti sanguanan ni Faraon, ket impuruak ni Moises nga agpalangit, ket nagbalin a busbusali nga addaan kadagiti kapuyo,+ a tumantanor iti tao ken animal. 11  Ket dagiti managsalamangka a papadi saanda a nabalinan ti agtakder iti sanguanan ni Moises kas imbunga ti busbusali, agsipud ta ti busbusali timmanor kadagiti managsalamangka a papadi ken kadagiti amin nga Egipcio.+ 12  Ngem binay-an ni Jehova a sumubeg ti puso ni Faraon, ket saan nga immimdeng kadakuada, kas iti sinao ni Jehova ken Moises.+ 13  Kalpasanna ni Jehova kinunana ken Moises: “Bumangonka a nasapa iti bigat ket agsaadka iti sango ni Faraon,+ ket masapul a kunaem kenkuana, ‘Daytoy ti kinuna ni Jehova a Dios dagiti Hebreo: “Palubosam ti ilik tapno makapagserbida kaniak.+ 14  Ta iti daytoy a tiempo ibaonko dagiti amin a pangkabilko ita pusom ken kadagiti adipenmo ken kadagiti umilim, iti panggep a maammuam koma nga awan ti kas kaniak iti intero a daga.+ 15  Ta ita inyunnatko koman ti imak tapno makabilka ken dagiti umilim babaen iti angol ken tapno mapunaska iti daga.+ 16  Ngem, iti kinapudnona, gapu itoy pinagtalinaedka,+ maipagapu iti panangipakitak kenka ti pannakabalinko ken tapno maideklara ti naganko iti intero a daga.+ 17  Agtigtignayka pay laeng kadi a sitatangsit maibusor iti ilik iti saanmo a panangpalubos kadakuada?+ 18  Adtoy inton bigat iti agarup kastoy nga oras pagtuduek iti nakaro unay nga uraro, a ti kaaspingna saan pay a pulos napasamak iti Egipto manipud aldaw ti pannakaibangonna agingga ita.+ 19  Ket ita agbaonka, ilinongmo amin a dinguenmo ken ti isuamin a kukuam idiay tay-ak. No maipapan iti asinoman a tao ken animal a masarakanto idiay tay-ak ket saan a naurnong iti balay, agtinnagto kadakuada ti uraro,+ ket mataydanto.”’” 20  Asinoman a nagbuteng iti sao ni Jehova kadagiti adipen ni Faraon pinagkamangna dagiti bukodna nga adipen ken dinguenna kadagiti balay,+ 21  ngem siasinoman a di nangisaad iti pusona tapno ipategna ti sao ni Jehova binaybay-anna dagiti adipenna ken dinguenna idiay tay-ak.+ 22  Ni Jehova kinunana ita ken Moises: “Iyunnatmo ta imam+ a maiturong iti langlangit, tapno agtinnag koma ti uraro+ iti intero a daga ti Egipto, iti tao ken animal ken isuamin a mulmula iti talon iti daga ti Egipto.” 23  Gapuna inyunnat ni Moises ti sarukodna a maiturong iti langlangit; ket ni Jehova nangipaay kadagiti gurruod ken uraro,+ ket ti apuy bumaba iti daga, ket intultuloy ni Jehova a pinagtudo iti uraro iti daga ti Egipto. 24  Ngarud dimteng ti uraro, ken apuy nga agkuykuyegyeg iti baet dagiti uraro. Nakaro unay daydi, iti kasta awan pay napasamak nga aniaman a kas iti dayta iti intero a daga ti Egipto manipud iti tiempo ti panagbalinna a nasion.+ 25  Ket ti uraro kinabilna ti intero a daga ti Egipto. Ti uraro kinabilna ti isuamin nga adda iti tay-ak, manipud iti tao agingga iti animal, ken dagiti amin a kita ti mulmula iti talon; ket sinip-akna amin a kita ti kaykayo iti tay-ak.+ 26  Idiay laeng daga ti Gosen, nga ayan idi ti annak ti Israel, nga awan dimteng nga uraro.+ 27  Iti kamaudiananna nagbaon ni Faraon ket pinaayabanna da Moises ken Aaron ket kinunana kadakuada: “Nagbasolak iti daytoy a gundaway.+ Ni Jehova nalinteg,+ ket siak ken dagiti umilik nagbiddutkami. 28  Agpakaasikayo ken Jehova nga umanay koma daytoyen a pannakapasamak dagiti gurruod ken uraro ti Dios.+ Kalpasanna situtulokak a mamalubos kadakayo, ket saankayton nga agtalinaed.” 29  Gapuna kinuna kenkuana ni Moises: “Apaman a makaruarak iti siudad iyunnatkonto dagiti imak ken Jehova.+ Agsardengto dagiti gurruod ket saanton nga agtultuloy ti uraro, tapno maammuam koma a ti daga kukua ni Jehova.+ 30  No maipapan kenka ken kadagiti adipenmo, ammokon a saanyonto pay laeng nga ipakita ti panagbuteng gapu ken Jehova a Dios.”+ 31  Kas iti sigud, ti lino ken ti sebada nadadaeldan, agsipud ta ti sebada sidadawa idi ket ti lino addaan busbusel ti sabong.+ 32  Ngem ti trigo ken ti espelta+ saan a nadadael, agsipud ta naladaw ti panawenda. 33  Rimmuar ita ni Moises iti siudad manipud ken Faraon ket inyunnatna dagiti imana maiturong ken Jehova, ket dagiti gurruod ken ti uraro nangrugi nga agsardeng ket ti tudo saan a nagtinnag iti daga.+ 34  Idi nakita ni Faraon a nagsardeng ti tudo ken ti uraro ken dagiti gurruod, nagbasol manen ken pinagbalinna ti pusona nga awanan panagtignay,+ isu kasta met dagiti adipenna. 35  Ket ti puso ni Faraon nagtultuloy a nasubeg, ket saanna a pinalubosan ti annak ti Israel, kas iti sinao ni Jehova babaen ken Moises.+

Footnotes