Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Exodo 7:1-25

7  Iti kasta ni Jehova kinunana ken Moises: “Kitaem, pinagbalinka a Dios ken Faraon,+ ket ni Aaron a bukodmo a kabsat agbalinto a mammadtom.+  Sika—sawemto amin nga ibilinko kenka;+ ket ni Aaron a kabsatmo ti agsaonto ken Faraon,+ ket masapul a palubosanna manipud iti dagana ti annak ti Israel.+  No maipapan kaniak, bay-akto a sumubeg ti puso ni Faraon,+ ket pudno unay a paaduekto dagiti pagilasinak ken dagiti milagrok iti daga ti Egipto.+  Ket saanto nga umimdeng kadakayo ni Faraon;+ ket kasapulan nga ipataykonto ti imak iti Egipto ket iruarko dagiti buyotko,+ ti ilik,+ ti annak ti Israel,+ manipud daga ti Egipto buyogen kadagiti dadakkel a panangukom.+  Ket sigurado a maammuanto dagiti Egipcio a siak ni Jehova inton iyunnatko ti imak maibusor iti Egipto,+ ket pudno nga iruarko ti annak ti Israel manipud iti tengngada.”+  Ket da Moises ken Aaron inar-aramidda ti kas iti imbilin kadakuada ni Jehova.+ Inaramidda ti kasta met laeng.+  Ket ni Moises walopulo ti tawenna idi ket ni Aaron walopulo ket tallo ti tawenna iti tiempo ti panagsaoda ken Faraon.+  Kinuna ita ni Jehova kada Moises ken Aaron:  “No kas pagarigan ta agsao kadakayo ni Faraon, a kunkunana, ‘Mangpataudkayo iti milagro iti biangyo,’+ ngarud masapul a kunaem ken Aaron, ‘Alaem ti sarukodmo+ ket ipuruakmo iti sanguanan ni Faraon.’ Agbalinto dayta a dakkel nga uleg.”+ 10  Gapuna da Moises ken Aaron napanda ken Faraon ket inaramidda nga apagpag-isu kas iti imbilin ni Jehova. Iti kasta impuruak ni Aaron ti sarukodna iti sanguanan ni Faraon ken dagiti adipenna ket nagbalin a dakkel nga uleg. 11  Nupay kasta, inayaban met ni Faraon dagiti masirib a tattao ken dagiti mangkukulam;+ ket dagiti mismo a managsalamangka a papadi ti Egipto inaramidda ti isu met laeng a banag babaen kadagiti arte ti panagsalamangkada.+ 12  Gapuna impuruakda tunggal maysa ti sarukodna, ket nagbalinda a dadakkel nga uleg; ngem ti sarukod ni Aaron inalun-onna dagiti sarukodda. 13  Kaskasdi, ti puso ni Faraon simmubeg,+ ket saan nga immimdeng kadakuada, kas iti sinao ni Jehova. 14  Kalpasanna ni Jehova kinunana ken Moises: “Ti puso ni Faraon awanan panagtignay.+ Nagkitakit a mamalubos kadagiti umili.+ 15  Mapanka ken Faraon iti bigat. Adtoy! Isu agturong iti danum!+ Ket masapul nga isaadmo ta bagim a sumabet kenkuana iti igid ti Karayan Nilo,+ ket ti sarukod a nagbalin a serpiente alaem ita imam.+ 16  Ket masapul a kunaem kenkuana, ‘Ni Jehova a Dios dagiti Hebreo imbaonnak kenka,+ a kunkunana: “Palubosam ti ilik tapno makapagserbida kaniak idiay let-ang,”+ ngem adtoy saanka a nagtulnog agingga ita. 17  Daytoy ti kinuna ni Jehova:+ “Babaen itoy maammuamto a siak ni Jehova.+ Adtoy kabilek iti sarukod nga adda iti imak ti danum nga adda iti Karayan Nilo,+ ket sigurado nga agbalinto dayta a dara.+ 18  Ket dagiti ikan nga adda iti Karayan Nilo mataydanto,+ ket ti Karayan Nilo pudno a bumangsitto,+ ket dagiti Egipcio pudno a saandanto a mairusok ti uminum iti danum manipud iti Karayan Nilo.”’”+ 19  Kalpasanna ni Jehova kinunana ken Moises: “Kunaem ken Aaron, ‘Alaem ti sarukodmo ket iyunnatmo ta imam+ iti rabaw ti dandanum ti Egipto, iti rabaw dagiti karayanda, iti rabaw dagiti kanal ti Nilo a kukuada ken iti rabaw dagiti naruno a ban-awda+ ken iti rabaw ti amin a naurnong a dandanumda, tapno agbalinda koma a dara.’ Ket sigurado nga addanto dara iti intero a daga ti Egipto ken kadagiti basehas a kayo ken kadagiti basehas a bato.” 20  Dagus nga inaramid da Moises ken Aaron ti kasta,+ kas iti imbilin ni Jehova,+ ket intag-ayna ti sarukod ket kinabilna ti danum nga adda idi iti Karayan Nilo iti imatang ni Faraon ken dagiti adipenna,+ ket ti isuamin a danum nga adda idi iti Karayan Nilo nagbalin a dara.+ 21  Ket natay dagiti ikan nga adda iti Karayan Nilo,+ ket nangrugi a bumangsit ti Karayan Nilo; ket saan a nabalinan dagiti Egipcio ti uminum iti danum manipud iti Karayan Nilo;+ ket ti dara adda idi iti intero a daga ti Egipto. 22  Nupay kasta, dagiti managsalamangka a papadi ti Egipto inaramidda ti isu met laeng a banag babaen kadagiti nalimed nga arteda;+ iti kasta ti puso ni Faraon nagtultuloy a nasubeg,+ ket saan nga immimdeng kadakuada, kas iti sinao ni Jehova.+ 23  Gapuna nagbaw-ing ni Faraon ket simrek iti balayna, ket saanna nga insaad ti pusona a mangipateg uray iti daytoy.+ 24  Ket amin dagiti Egipcio nagkalkalida iti aglawlaw ti Karayan Nilo maipaay iti danum nga inumen, agsipud ta saanda a nabalinan ti uminum iti aniaman a danum ti Karayan Nilo.+ 25  Ket pito nga aldaw ti natungpal kalpasan ti panangkabil ni Jehova iti Karayan Nilo.

Footnotes