Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Exodo 37:1-29

37  Ni Bezalel+ inaramidna ita ti Lakasa+ manipud kayo ti akasia. Dua a kasiko ket kagudua ti kaatiddogna, ket maysa a kasiko ket kagudua ti kaakabana, ket maysa a kasiko ket kagudua ti kangatona.+  Kalpasanna kinalupkopanna iti puro a balitok iti uneg ken iti ruar ket inyaramidanna iti bilid a balitok iti aglikmut.+  Kalpasan dayta insukoganna iti uppat a singsing a balitok, maipaay iti ngatuen ti uppat a sakana, nga addaan dua a singsing iti maysa a sikiganna ken dua a singsing iti sabali pay a sikiganna.+  Simmaruno a nangaramid kadagiti assiw a kayo ti akasia ket kinalupkopanna ida iti balitok.+  Kalpasanna dagiti assiw inyusokna kadagiti singsing nga adda kadagiti sikigan ti Lakasa a pangawit iti Lakasa.+  Ket inaramidna ti kalub+ a puro a balitok. Dua a kasiko ket kagudua ti kaatiddogna, ket maysa a kasiko ket kagudua ti kaakabana.+  Nangaramid pay iti dua a kerubin a balitok. Iti aramid a pinitpit inaramidna ida iti dua a pungto ti kalub.+  Maysa a kerubin ti adda sadiay a pungto, ket ti sabali pay a kerubin ditoy a pungto. Inaramidna dagiti kerubin iti kalub iti dua a pungtona.+  Ket nagbalinda a kerubin a siuukrad ti dua a payakda nga agpangato, a salsalingdanda ti kalub babaen kadagiti payakda,+ ket nagsinnango dagiti rupada. Ti ruprupa dagiti kerubin situturong idi iti kalub.+ 10  Ket inaramidna ti lamisaan a kayo ti akasia.+ Dua a kasiko ti kaatiddogna, ket maysa a kasiko ti kaakabana, ket maysa a kasiko ket kagudua ti kangatona.+ 11  Kalpasanna kinalupkopanna iti puro a balitok ket inyaramidanna iti bilid a balitok iti aglikmut.+ 12  Sumaganad inyaramidanna iti iking a sangadakulapan iti aglikmut ken nangaramid iti bilid a balitok maipaay iti ikingna iti aglikmut.+ 13  Kanayonanna, insukoganna iti uppat a singsing a balitok ket inkabilna dagiti singsing iti uppat a suli nga agpaay iti uppat a saka.+ 14  Dagiti singsing asidegda idi iti iking, kas pangpatibker kadagiti assiw a pangawit iti lamisaan.+ 15  Kalpasanna inaramidna dagiti assiw a kayo ti akasia ket kinalupkopanna ida iti balitok a pangawit iti lamisaan.+ 16  Kalpasan dayta inaramidna dagiti aruaten nga adda iti rabaw ti lamisaan, dagiti pingganna ken dagiti kopana ken dagiti malukongna ken dagiti harrana a pangibukbok iti sakripisio nga inumen, manipud iti puro a balitok.+ 17  Kalpasanna inaramidna ti pagsaadan ti silaw+ a puro a balitok. Iti aramid a pinitpit inaramidna ti pagsaadan ti silaw. Dagiti sikiganna ken dagiti sangana, dagiti kopana, dagiti timbukelna ken dagiti sabongna nagtaud iti dayta.+ 18  Ket innem a sanga ti nagtaud kadagiti sikiganna, tallo a sanga ti pagsaadan ti silaw manipud maysa a sikiganna ket tallo a sanga ti pagsaadan ti silaw manipud sabali pay a sikiganna.+ 19  Tallo a kopa a nasukog a kasla sabsabong ti almendro adda idi iti maysa a punipon ti sangsanga, nga addaan kadagiti timbukel ken sabsabong nga agbibinnal-et; ket tallo a kopa a nasukog a kasla sabsabong ti almendro adda idi iti sabali pay a punipon ti sangsanga, nga addaan kadagiti timbukel ken sabsabong nga agbibinnal-et. Kasta idi ti maipaay iti innem a sanga a rumrummuar manipud pagsaadan ti silaw.+ 20  Ket iti pagsaadan ti silaw adda idi uppat a kopa a nasukog a kasla sabsabong ti almendro, a dagiti timbukelna ken sabsabongna agbibinnal-etda.+ 21  Ket ti timbukel iti baba ti dua a sanga nagtaud iti dayta, ket ti timbukel iti baba ti dua a sabali a sanga nagtaud iti dayta, ket ti timbukel iti baba ti dua pay a sanga nagtaudda iti dayta, maipaay iti innem a sanga a rumrummuar manipud pagsaadan ti silaw.+ 22  Dagiti timbukelda ken dagiti sangada nagtaud iti dayta. Isuamin dayta ket maysa idi a pedaso ti aramid a pinitpit, a puro a balitok.+ 23  Kalpasanna inaramidna ti pito a pagsilawanna ken dagiti pangarsangna ken dagiti pagikkanna iti apuy manipud puro a balitok.+ 24  Iti maysa a talento a puro a balitok inaramidna dayta ken amin dagiti aruatenna. 25  Inaramidna ita ti altar ti insienso+ manipud kayo ti akasia.+ Maysa a kasiko idi ti kaatiddogna ken maysa a kasiko ti kaakabana, a kuadrado dayta, ket dua a kasiko ti kangatona. Dagiti sarana nagtaud iti dayta.+ 26  Kalpasanna kinalupkopanna iti puro a balitok, ti makinngato a rabawna ken dagiti sikiganna iti aglikmut ken dagiti sarana, ket inyaramidanna iti bilid a balitok iti aglikmut.+ 27  Ket inyaramidanna iti dua a singsing a balitok iti baba ti bilidna iti dua kadagiti sikiganna, iti dua nga agsinnumbangir a sikiganna, kas pangpatibker kadagiti assiw a pangawit iti dayta.+ 28  Kalpasan dayta inaramidna dagiti assiw a kayo ti akasia ket kinalupkopanna ida iti balitok.+ 29  Innayonna nga inaramid ti nasantuan a pangpulot a lana+ ken ti puro, napabanglo nga insienso,+ ti aramid ti managaramid iti sapsapo.

Footnotes