Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Exodo 34:1-35

34  Kalpasanna ni Jehova kinunana ken Moises: “Mangkitikitka maipaay kenka iti dua a tapi a bato a kas kadagidiay immuna,+ ket isuratkonto iti rabaw dagiti tapi ti sasao a nagparang kadagidi immuna a tapi,+ a binurakmo.+  Ket agsaganaka maipaay iti bigat, yantangay masapul a sumang-atka iti bigat idiay Bantay Sinai ket agsaadka iti sibayko sadiay tapaw ti bantay.+  Ngem awan koma ti asinoman a makipagsang-at kenka ken, kasta met, awan koma ti asinoman a sabali a makita iti intero a bantay.+ Kanayonanna, rebbeng nga awan arban wenno pangen nga agar-arab iti sanguanan dayta a bantay.”+  Iti kasta nangkitikit ni Moises iti dua a tapi a bato a kas kadagidiay immuna ket bimmangon a nasapa iti bigat ket simmang-at iti Bantay Sinai, kas iti imbilin kenkuana ni Jehova, ket awit-awitna idi iti imana ti dua a tapi a bato.  Ket bimmaba ni Jehova+ iti ulep ket nagsaad a kaduana sadiay ken indeklarana ti nagan ni Jehova.+  Ket limmabas ni Jehova iti sanguananna ken indeklarana: “Jehova, Jehova, maysa a Dios a naasi+ ken managparabur,+ nabannayat nga agunget+ ken naruay iti naayat a kinamanangngaasi+ ken kinapudno,+  mangsalsalimetmet iti naayat a kinamanangngaasi maipaay iti rinibu,+ mamakpakawan iti biddut ken salungasing ken basol,+ ngem nikaanoman saanto a mangipaay iti pannakailaksid iti dusa,+ a gapu iti biddut ti amma mangyeg iti pannusa iti annak ken iti appoko, iti maikatlo a kaputotan ken iti maikapat a kaputotan.”+  Dagus a ni Moises nagdardaras nga agrukob agingga iti daga ket inruknoyna ti bagina.+  Kalpasanna kinunana: “No, ita, nakasarakak iti pabor kadagiti matam, O Jehova, ni Jehova, pangngaasim, kumuyog koma iti tengngami,+ agsipud ta natangken ti panaglenglengngesna nga ili dayta,+ ket kasapulan a pakawanem ti biddutmi ken ti basolmi,+ ket masapul nga alaennakami a kas sanikuam.”+ 10  Kinunana kalpasanna: “Adtoy mamatalgedak iti tulag: Iti sanguanan dagiti amin nga umilim mangaramidakto iti nakaskasdaaw a bambanag a saan pay a pulos naparsua iti intero a daga wenno iti tengnga ti amin a nasnasion;+ ket amin dagiti umili nga iti tengngada addaka pudno a makitadanto ti aramid ni Jehova, agsipud ta maysa a nakaam-amak a banag ti aramidek babaen kenka.+ 11  “Iti biangmo salimetmetam ti ibilbilinko kenka ita nga aldaw.+ Adtoy pagtalawek iti sanguanam dagiti Amoreo ken dagiti Canaanita ken dagiti Heteo ken dagiti Perizeo ken dagiti Heveo ken dagiti Jebuseo.+ 12  Aluadam ti bagim a dika mamatalged iti tulag kadagiti agnanaed iti daga a papanam,+ ta amangan no agbalin dayta a silo iti tengngam.+ 13  No di ket dagiti altarda rugpuenyo, ket dagiti sagrado a munmonda burakenyo, ket dagiti sagrado a teddekda pukanenyo.+ 14  Ta dika iruknoy ti bagim iti sabali a dios,+ agsipud ta ni Jehova, a ti naganna ket Naimon, isu maysa a naimon a Dios;+ 15  amangan no mamatalgedka iti tulag kadagiti agnanaed iti daga, ta pudno unay a maaddaandanto iti imoral a pannakidenna iti didiosda+ ken agisakripisioda iti didiosda,+ ket sigurado nga addanto mangawis kenka, ket pudno unay a mangankanto iti sakripisiona.+ 16  Kalpasanna kasapulan a mangalakanto iti annakda a babbai a maipaay iti annakmo a lallaki,+ ket ti annakda a babbai sigurado a maaddaandanto iti imoral a pannakidenna iti didiosda ket imoral a pakidennaenda ti annakmo a lallaki iti didiosda.+ 17  “Dika mangaramid iti sinukog nga idolo a didios maipaay kenka.+ 18  “Ti piesta dagiti di pinaalsa a tinapay salimetmetam.+ Mangankanto kadagiti di pinaalsa a tinapay, kas iti imbilinko kenka, iti pito nga aldaw iti naituding a tiempo iti bulan ti Abib,+ agsipud ta iti bulan ti Abib a rimmuarka manipud Egipto. 19  “Isuamin nga umuna a mangilukat iti aanakan kukuak,+ ken, no maipapan iti isuamin a dinguenmo, ti kalakian nga inauna ti toro ken ti karnero.+ 20  Ket ti inauna ti maysa nga asno subbotem iti maysa a karnero.+ Ngem no saanmonto a subboten, ngarud masapul a rung-uem ti tengngedna. Tunggal inauna iti annakmo subbotem.+ Ket masapul a saanda nga agparang nga ima-ima iti sanguanak.+ 21  “Innem nga aldaw nga agbannogka, ngem iti maikapito nga aldaw salimetmetamto ti sabbath.+ Iti tiempo ti panagarado ken iti panagani salimetmetamto ti sabbath.+ 22  “Ket rambakamto ti piesta dagiti lawasmo buyogen ti umuna a naluom a bungbunga ti ani a trigo,+ ken ti piesta ti panagurnong iti panagbaliw ti tawen.+ 23  “Mamitlo iti makatawen nga agparang ti tunggal lalaki kenka+ iti sanguanan ti pudno nga Apo, ni Jehova, ti Dios ti Israel. 24  Ta dagiti nasion pagtalawekto iti sanguanam,+ ket palawaekto ti teritoriam;+ ket awanto ti asinoman a mangtarigagay iti dagam bayat a sumangsang-atka a mangkita iti rupa ni Jehova a Diosmo mamitlo iti makatawen.+ 25  “Ti dara ti sakripisiok dika partien a mapakuyogan iti nalebaduraan.+ Ket ti sakripisio iti piesta ti paskua rebbeng a di agtalinaed nga agpatnag agingga iti bigat.+ 26  “Ti kasayaatan kadagiti umuna a naluom a bunga+ ti dagam iyegmo iti balay ni Jehova a Diosmo.+ “Dika ilambong ti maysa nga urbon a kalding iti gatas ti inana.”+ 27  Ket intultuloy ni Jehova a kunaen ken Moises: “Isuratmo maipaay kenka dagitoy a sasao,+ agsipud ta maitunos kadagitoy a sasao a mamatalgedak iti tulag kenka ken iti Israel.”+ 28  Ket nakipagtalinaed sadiay ken Jehova iti uppat a pulo nga aldaw ken uppat a pulo a rabii. Saan a nangan iti tinapay ken saan nga imminum iti danum.+ Ket insuratna iti rabaw dagiti tapi ti sasao ti tulag, ti Sangapulo a Sasao.+ 29  Ita naaramid idi simmalog ni Moises iti Bantay Sinai a ti dua a tapi ti Pammaneknek adda iti ima ni Moises idi simmalog iti bantay,+ ket saan nga ammo ni Moises a ti kudil ti rupana nangisilnag kadagiti sinamar gapu iti pannakisaona kenkuana.+ 30  Idi a ni Aaron ken ti amin nga annak ti Israel nakitada ni Moises, ay ket, adtoy! ti kudil ti rupana nangisilnag kadagiti sinamar ket nagbutengda nga umasideg kenkuana.+ 31  Ket inayaban ida ni Moises. Gapuna nagsubli kenkuana ni Aaron ken amin dagiti panguluen iti tengnga ti gimong, ket rinugian ni Moises ti agsao kadakuada. 32  Umuna kalpasan dayta ti amin nga annak ti Israel immasidegda kenkuana, ket rinugianna nga imbilin kadakuada ti isuamin a sinao ni Jehova kenkuana idiay Bantay Sinai.+ 33  No malpas ni Moises a makisao kadakuada, mangikabil iti abbungot iti rupana.+ 34  Ngem no sumrek ni Moises iti sanguanan ni Jehova tapno makisao kenkuana, ikkatenna ti abbungot agingga iti iruruarna.+ Ket rimmuar ket sinaona iti annak ti Israel no ania ti maibilin kenkuana.+ 35  Ket nakita ti annak ti Israel ti rupa ni Moises, a ti kudil ti rupa ni Moises nangisilnag kadagiti sinamar;+ ket insubli ni Moises ti abbungot iti rupana agingga a simrek a makisao kenkuana.+

Footnotes